الماتىدا زاڭسىز ساۋدا ورىندارىنا قارسى ارنايى رەيد جۇرگىزىلدى
«المالى اۋدانىنىڭ اكىمدىگى مەن اۋداندىق ءى ءى ب بىرلەسكەن جوبا ءبىر اي بۇرىن قولعا الىنعان. العاشقى كەزدە زاڭسىز ساۋدا جۇرگىزگەن ساۋداگەرلەردىڭ بارلىعىنا قاتاڭ ەسكەرتۋلەر جاسالدى. ەندى مىنە، ءبىر اپتانىڭ ىشىندە ەسكەرتۋلەردى ەلەڭ قىلماعان ساۋداگەرلەرگە قاتىستى اكىمشىلىك قۇقىق بۇزۋشىلىق كودەكسىنىڭ 387- بابى (قالانىڭ كوركىن بۇزۋ) جانە 165 - بابى (بەلگىلەنبەگەن جەردە ساۋدا جۇرگىزۋ) بويىنشا، 40 اكىمشىلىك حاتتاما جاسالىپ، اكىمشىلىك ايىپپۇل سالىندى. ءبىر ايىپپۇلدىڭ كولەمى - 5 ايلىق ەسەپتىك كورسەتكىش، ياعني 9260 تەڭگە. ونىڭ 80 پايىزدان استامى تولەندى. قازىر قالادا تاستاق بازىرىنان باسقا، جۇلدىز كوتەرمە ساۋدا بازارى مەن نيكولسكيي بازارىنىڭ اۋماعى دا «جابايى ساۋدادان» تازارتىلۋدا. بۇل شارا قازىر الماتى قالاسى اكىمىنىڭ باقىلاۋىندا. اۋدان اكىمىنىڭ ءوزى كۇن سايىن تەكسەرۋ جۇرگىزەدى.
جاز مەزگىلىندە قالادا ساۋدا قىزادى. وكىنىشتىسى، ساۋداگەرلەر بازارعا كىرە بەرىستە، جول جيەكتەرىندە تۇرىپ، ءارتۇرلى تاماق، باۋ-باقشا ونىمدەرىن ساتادى. ال ولار سەرتيفيكاتتالماعان. ادامنىڭ ۋلانىپ قالماسىنا ەشقانداي كەپىلدىك جوق. سول ءۇشىن تۇرعىنداردى وسىنداي زاڭسىز ساۋدا نۇكتەلەرىنەن تاۋار ساتىپ الماۋعا شاقىرامىز. ادامداردىڭ وزدەرى دە سۇرانىس تۋعىزباۋ كەرەك» - دەدى المالى اۋدانى اكىمىنىڭ ورىنباسارى جانسۇلتان وڭالبايەۆ
***
الدىن الا جاسالعان ەسكەرتۋلەردى، سالىنعان ايىپپۇلداردى ەلەڭ قىلماعان ساۋداگەرلەردىڭ تاۋارلارى كولىككە تيەلىپ، قالا سىرتىنا جونەلتىلىپ جاتتى. ارەكەتتەرىنە ەندى ۇيالسا كەرەك، كوبىسى ءۇي اراسىنان، تال، بۇتالاردان سىعالاپ، جاقىنداي المادى. ال بۇرىن جابايى ساۋدانىڭ وشاعىنا اينالعان برۋسيلوۆسكيي كوشەسىنىڭ جيەگى مەن تروتۋارلارى ءاپ-ساتتە اشىلىپ، تازارتىلدى. كولىكتەردىڭ دە، ادامداردىڭ دا ءجۇرىسى جەڭىلدەپ قالعانداي. بۇل ەندى قانشا ۋاقىتقا سوزىلار ەكەن؟
اۆتور: جاپپاربەرگەن ايبوتا