ءامىر ءبىرالين، تۇرسىنبەك نۇريسلام، يسا دانات «التىن» مەدال الدى
بۇل تۋرالى بۇگىن ەلورداداعى بەيبىتشىلىك پەن كەلىسىم سارايىندا اتالعان ءبىلىم بايگەسىنىڭ جەڭىمپازدارىن ماراپاتتاۋ الدىندا تىلشىلەرگە بەرگەن سۇحباتىندا IРhO- نى ۇيىمداستىرۋشى كوميتەت مەن اكادەميالىق كوميتەتتىڭ مۇشەسى، فيزيكادان قازاقستان ۇلتتىق قۇراما كومانداسىنىڭ جاتتىقتىرۋشىسى ەرنۇر رىسماعامبەتوۆ ءمالىم ەتتى.
ونىڭ سوزىنە قاراعاندا، بۇل ءبىلىم سايىسىندا «التىن» مەدالدى ءامىر ءبىرالين، تۇرسىنبەك نۇريسلام، يسا دانات يەلەندى. ال نۇربەك دىنمۇحاممەد پەن داۋلەت قۇرمانتايەۆ «كۇمىس» جۇلدەنى ەنشىلەدى.
ە. رىسماعامبەتوۆ قازاقستان نامىسىن قورعاعان بەس وقۋشىنىڭ بارلىعى جۇلدەلى بولعانىن اتاپ ءوتتى. «ءار جىلدا وسى وليمپياداعا 5 بالادان قاتىسقانىن ەسكەرسەك، سوڭعى التى جىلدا بارلىعى 30 وقۋشى فيزيكادان بۇل باسەكەگە ءتۇستى. سونىڭ 29 ى ەلىمىزگە مەدالمەن ورالدى»، - دەپ توقتالدى ول.
«جالپى وليمپيادا جوعارى دەڭگەيدە ءوتتى دەپ نىق سەنىممەن ايتۋعا بولادى. بارلىق جەتەكشىلەر ريزا بولدى. ءبىز IРhO- نى ەستە قالارلىقتاي ەتىپ ۇيىمداستىرۋعا تىرىستىق. ۇيىمداستىرۋ كەزىندە كوپتەگەن تىڭ شارالاردى ەنگىزدىك»، - دەدى ە. رىسماعامبەتوۆ.
بۇدان بۇرىن حابارلانعانداي، حالىقارالىق وليمپيادادا قازاقستان مىقتى ەلدەردىڭ وندىعىنا ەنىپ، رەسمي ەمەس كوماندالىق ەسەپتە 8-ورىندا تۇعىرلاندى. وسى ءبىلىم باسەكەسىندە ەلىمىزدىڭ الدىنا قىتاي، تايۆان، كورەيا، ۆەتنام، ءۇندىستان، رەسەي ەلدەرى تۇر.
ايتا كەتەيىك، 13 - شىلدەدە باستالعان بۇل ءبىلىم سايىسى ەلورداداعى نازاربايەۆ ۋنيۆەرسيتەتى بازاسىندا ءوتتى. اتاپ ايتقاندا، فيزيكادان استانادا ۇيىمداستىرىلعان وسى ءبىلىم دوداسىنا قازاقستانعا الەمنىڭ 85 ەلىنەن 400 گە جۋىق وقۋشى كەلدى.
اۆتور: رۋسلان عابباسوۆ