بەيجىڭدە تۇڭعىش جەكە دومبىرا كۋرسى اشىلدى - كەسكىن
ناعىز قازاق قازاق ەمەس، ناعىز قازاق - دومبىرا. دومبىرا بۇگىندە كۇللى الەمگە تانىمال.
ەكى ىشەكتىڭ كومەگىمەن-اق بار قازاقتىڭ مادەنيەتىن، تۇرمىس-تىرشىلىگىن جاھانعا جىرلادى. قازاقتىڭ قارا دومبىراسى الەمنىڭ ەڭ ۇلكەن، بەدەلدى، سىيلى ساحنالارىنان كورىندى.
اسىل اسپابىمىز بۇگىندە قازاقتىڭ ەڭ ۇلكەن ماقتانىشى بولىپ تابىلادى.
وزگە ەلدە دومبىرانى دارىپتەپ جۇرگەن قانداستارىمىزدىڭ ايتۋىنشا، شەتەلدىكتەر اراسىندا دومبىراعا قىزىعۋشىلار سانى جىلدان-جىلعا ارتىپ كەلەدى. اسىرەسە كورشىلەس قىتايلىقتار ۇلتتىق اسپابىمىزدى ۇيرەنۋگە ەرەكشە قۇشتارلىق تانىتۋدا دەيدى.
بەيجىڭدە جۋىردا تۇڭعىش جەكە دومبىرا كۋرسى اشىلدى. مۇندا مۇرال ەسىمدى قانداسىمىز ءدارىس وتكىزەدى. مۇرال بىلتىر ورتالىق ۇلتتار ۋنيۆەرسيتەتىن مۋزىكا ماماندىعى بويىنشا ءتامامداعان. قازىر دومبىرا ۇيرەتىپ، ءناپاقاسىن تاۋىپ ءجۇر.
مۇنداعى باس ماقسات - پايدا تابۋ ەمەس، ۇلتتىق ونەردى دارىپتەۋ. قازاقتىڭ قارا دومبىراسىن قالىڭ جۇرتقا مويىنداتسام دەگەن ارمانى بار. ول ءۇشىن دومبىرا ەرەكشە ورىندا.
مۇرالدىڭ ءدارىسى اپتاسىنا 2 ساعاتتان 3 رەت وتەدى. ءۇش توبى بار. بىرەۋىندە - تەك قازاق بالالارى، بىرەۋى - ارالاس، ەندى بىرەۋىندە - تەك قىتايلار. جالپى العاندا 40-50 شاكىرتى بار. شاكىرتەرىنىڭ ىشىندە اسىل اسپابىمىزعا ەرەكشە قىزىعۋشىلىقپەن قاراپ، بار ىنتاسىن سالىپ ۇيرەنەتىندەر قىتايلار ەكەن. ولار وزدەرىنە تاڭسىق اسپاپقا ءارى تاڭ قالادى ءارى تامسانادى.
«دومبىرانى العاش ۋنيۆەرسيتەتكە، مۋزىكا ماماندىعىنا سىناق تاپسىرعالى كەلگەندە كوردىم. مەنىمەن بىرگە سىناققا كەلگەن قازاق ستۋدەنتتەرى دىڭعىرلاتىپ وتىر ەكەن. ولاردان ءبىر مەلوديا ويناپ بەرۋىن ءوتىندىم. ۇيىپ تىڭدادىم. نەبارى ەكى ىشەكتەن سونشا اۋەن قالاي شىعادى ەكەن دەپ تاڭ قالعانمىن. سول ساتتەن باستاپ، بۇل عاجاپ اسپاپقا قىزىعۋشىلىعىم تۋدى»، - دەيدى جەرگىلىكتى تۇرعىن ۆان جوۋلي.
«بۇلاردىڭ مادەنيەتىمەن ءبىزدىڭ مادەنيەت ۇقسامايدى. سوندىقتان ولار كوشپەندى حالىق مادەنيەتىنە قىزىعادى. قىتايدى ءبىزدىڭ جايلاۋعا اپارساڭ، اتقا مىنگىسى كەلەدى عوي. سول سەكىلدى دومبىراعا دا قاتتى قىزىعادى»، - دەيدى مۇرال ءبيمۇرات ۇلى.
مۇرال كاسىبىنىڭ پايداسى ۇشان-تەڭىز ەمەس، ءبىراق نان تابۋعا جەتەتىنىن ايتادى. جىراقتا جۇرگەن قانداسقا دومبىرا ءتان ازىعىنان كورى، جان ازىعىن مولىنان بەرەدى. قاسيەتتى اسپابىمىز الەمگە تانىلىپ، قازاقتىڭ ابىرويى اسقاقتاسا بولدى، ەركەكتىڭ قولىنا ءبىر كۇرەك قاشان دا تابىلادى دەيدى قانداسىمىز.