قىتاي ازاماتتارىنا زاڭسىز ۆيزا ۇلەستىرگەندەر ۇزاق مەرزىمگە سوتتالدى

استانا. قازاقپارات  - قىتايلارعا زاڭسىز ۆيزا راسىمدەپ، ەش كەدەرگىسىز ەلگە كىرگىزگەن سىرتقى ىستەر مينيسترلىگىنىڭ لاۋازىمدى شەنەۋنىكتەرى ۇزاق مەرزىمگە سوتتالدى.

ۇيىمداسقان قىلمىستىق توپقا الماتىداعى كونسۋلدىق قىزمەت دەپارتامەنتى ديرەكتورىنىڭ ورىنباسارى جەتەكشىلىك ەتكەن.

ونىڭ بۇل ىستەگى وڭ قولى ەكس-دەپۋتاتتىڭ كاسىپكەر قىزى بولىپ شىقتى.

قۇلقىنى كەڭ ديپلوماتتار وسى ارالىقتا قازاقستانعا 13 مىڭ شەتەلدىكتى كىرگىزگەن. ءتولقۇجاتىنا زاڭسىز ۆيزا سوعىلىپ ەلىمىزگە ەنتەلەگەندەردىڭ كوبى قىتاي ازاماتتارى.

قىتايلىقتاردى لەگ-لەگىمەن جەتكىزۋمەن ايگۇل قوڭىربايەۆا ەسىمدى كاسىپكەر اينالىسىپتى. ءسويتىپ ۇيىمداسقان قىلمىستىق توپ 3  جىلدىڭ ىشىندە 240 ميلليون تەڭگە پارانى قالتاعا باسقان.

ءتىپتى بۇل بيزنەستەرىنە قىرعىزستان، گرۋزيا مەن موڭعولياداعى كونسۋلدىق قىزمەتكەرلەرىن قوسىپ، اۋىزباستىرىقتى ءوزارا بولىسكە سالعان. ءىستىڭ باسى-قاسىندا جۇرگەن الماتىداعى كونسۋلدىق قىزمەت دەپارتامەنتى ديرەكتورىنىڭ ورىنباسارى 39 جاستاعى قايسار ارقابايەۆتىڭ دۇنيە مۇلكى تاركىلەنىپ، 12 جىلعا اباقتىعا جابىلدى.

قالعان سىبايلاسارى دا الداعى 10 جىلدا بوستاندىق كورمەيدى. جەڭىل جازا الىپ، 5  جىلعا سوتتالعان كاسىپكەر ءارى ەكس-دپۋتاتتىڭ قىزى بالالارى كامەلەت جاسىنا جەتكەن سوڭ عانا جازاسىن وتەيتىن بولدى.

KTK