ءاسانالى ءاشىموۆ، ك س ر و حالىق ءارتىسى: قازاق ءومىر باقي داعدارىستا كەلەدى
ونەردىڭ ابىز اقساقالى دەيتىن بەلەسكە كوتەرىلگەن اڭىز اكتەردىڭ قازاق كينوسىنىڭ جاي-كۇيى حاقىندا ايتارى دا از ەمەس. الىسقا كوز تىگىپ، ۇزاق ويلانا ءتىل قاتقان ونەر مايتالمانى وتكەن كۇندەردىڭ ۇمىتىلماس ساتتەرىن كوز الدىنان تىزبەكتەي وتكىزە وتىرىپ، بۇگىنگى كينونىڭ احۋالىنا ساراپتاي باعاسىن بەردى.
جاس قازاق: «ارزان كۇلكىگە قۇمار حالىقتىڭ مادەنيەتى وسكەن كەزدە عانا، كينودا دامۋ بولادى» دەپ قالدىڭىز وتكەندە. قازىرگى ەكراندا قاپتاپ كەتكەن ۇزىن ىرعا كومەديالىق سەريالدار حالىقتىڭ دەڭگەيىن ايعاقتاي ما؟
ءاسانالى ءاشىموۆ: تالعام وتە تومەن. كورەرمەننىڭ دەڭگەيى ساۋساقپەن كورسەتسەم كۇلەدى، «تاماشانىڭ» دەڭگەيىندە. «شانشار»، «الداراسپاننان» ءارى اسا الماي وتىر. كلاسسيكالىق مۋزىكا، كلاسسيكالىق فيلم، سپەكتاكلدەرگە حالىق بارمايدى. وپەراعا ۇركە قارايدى. سەبەبى تۇسىنبەيدى. نەگىزىنەن، كلاسسيكالىق مادەنيەتتى ءبىز انگليا، فرانسيا، يتاليادان ۇيرەنۋىمىز كەرەك. ا ق ش بۇل قاتارعا كىرمەيدى. سەبەبى ا ق ش-تا مادەنيەت شاشىراڭقى، ءتول قۇندىلىقتاردان الشاق. وسىعان قاراماستان، وكىنىشكە قاراي، ءبىزدىڭ كينو ماماندارى ا ق ش-تى ءپىر تۇتىپ، سوعان ەلىكتەيدى.
ولاردا كينو ارتىستەرى جوق. ۆان دامم، شۆارتسەنەگگەر سىندى تانىمال اكتەرلەرىنىڭ دەنى سپورتشى بولسا، ايەلدەرى - مودەل. ا ق ش باستى ەكپىندى سىرتقى سۇلۋلىققا سالادى دا، ادام تاعدىرى دەگەن دۇنيە سىرت قالادى كوپ جاعدايدا. ال ەۋروپا ەلدەرىندە ونەرگە دەگەن تۇسىنىك باسقا. اكتەرلىك مىقتى مەكتەپ قالىپتاسقان. جان گابەن، جان مارە، لوۋرەنس وليۆە، سوفي لورەن سەكىلدى كينو مايتالماندارىنىڭ ونەرىن تەبىرەنبەي وتىرىپ تاماشالاۋ مۇمكىن ەمەس. سەبەبى ولار فيلمدى اكتەرگە، ادام تاعدىرىنا قۇرادى. ال ا ق ش-تا ونداي ءبىر دە ءبىر فيلم جوق. امەريكانىڭ اتاعىن اسپانعا شىعارعان ەڭ اتاقتى كينو - «تيتانيك». ونىڭ وزىندە «تيتانيك» ۇلكەن تەحنيكانىڭ كۇشىمەن جاسالعان دۇنيە. ال جوعارىدا اتالعان ءۇش ەلدە ونداي تەحنيكا جوق، ءبىراق كينوسىنىڭ ءون بويىندا ءومىر بار.
قازىر كومپيۋتەرلىك گرافيكا دەگەن جاڭالىق شىقتى عوي، ءبارىن تەحنيكانىڭ قۇزىرىنا قالدىرادى جانە سونى ونەر دەپ داندايسىتادى. ماسەلەن، اتاعى اسپانعا جەتكەن لەوناردو دي كاپريونى مەن ۇلى اكتەر دەمەس ەدىم. شىعارماشىلىعىنا ءۇڭىلىپ كورسەڭىز، شەديەۆر ءرول تابا الاسىز با؟ سىرت كەلبەتى كەلىسكەن، سونىسىمەن سۇيكىمدى. ايتپەسە، تەحنيكانىڭ ءدال ا ق ش-تاعىداي ۇلگىسى بولسا، ول ءرولدى ءبىزدىڭ كەز كەلگەن اكتەر ويناپ شىعا الاتىنىنا مەن سەنەمىن. وسى جاعىنان كەلگەندە ءبىزدىڭ اكتەرلەردىڭ دەڭگەيى كوش ىلگەرى.
جاس قازاق: ءسوزىڭىز اۋزىڭىزدا، قازاق فيلمنىڭ بۇگىنگى دامۋ تەندەنتسياسىنا قانداي باعا بەرەسىز؟
ءاسانالى ءاشىموۆ: ءسال-ءپال كىبىرتىكتەگەنىمەن، سوڭعى ون جىلدا قازاق كينوسىندا سان جاعىنان دا، ساپا جاعىنان دا ءوسۋ بار. جىل سايىن بىرنەشە فيلم تۇسىرىلەدى. ءبىر كورىپ شىعۋعا جاقسى. ارى قارايعى تاعدىرى بۇلىڭعىرلاۋ. التىن قورعا ەنەتىن، ۇرپاق ىزدەپ كورەتىن فيلم از. ءار حالىقتىڭ كينوسىنىڭ، ونەرىنىڭ وزىندىك بەتى بولۋ كەرەك. كورە سالعاندا: «مىناۋ قازاق فيلم!» دەپ بىردەن تاني قوياتىن. سونى ۇلتتىق برەندكە اينالدىرۋ قاجەت. ءجۇرىس-تۇرىس، قيمىلدىڭ بارىندە ۇلتتىڭ ءيىسى اڭقىپ تۇرسا، مىنە، ناعىز ونەر سول!
بىزدەگى ءبىر كەمشىلىك - زاماناۋي فيلم دەيمىز دە، ءار ەلدىڭ قاڭسىعىن تاڭسىق كورىپ، ورىندى-ورىنسىز پايدالانامىز. سوڭىندا نە ول ا ق ش-تىكى ەمەس، نە اعىلشىن، ءۇندى، فرانسۋزدىكى ەمەس، ءدۇبارا، قازاققا جات بىلامىق دۇنيە تۋادى. ونەردىڭ وسىنداي تۇرىنە مەن ءتۇپ-تامىرىمەن قارسىمىن. ەلىكتەپ ەرەكشەلىك تاپپايمىز. ارينە، انا جەردەن، مىنا جەردەن كورگەنمەن دە كينو جاساۋعا بولادى، ءبىراق ول ونەر ەمەس. ونەر بولمايتىنى - ۇلتتىق ەمەس. فيلم ەڭ الدىمەن ۇلتتىق قۇنارعا باي بولۋ كەرەك، سوندا حالىقارالىق بولادى. ونەر ۇلتتىق بولعاندا عانا الەم مويىندايدى.
بۇگىنگى رەجيسسەرلەردىڭ كوپ جاعدايدا ۇتىلاتىنى - تاريحي تاقىرىپتارعا بارا بەرمەيدى. تۇسىنبەيتىن بولۋ كەرەك. تاريحقا ءتىسى باتپاعان سوڭ، تۇسىنبەگەن سوڭ، بۇل تاقىرىپ قىزىقسىز بولاتىن بولۋى كەرەك. ال ىرگەتاسسىز عيمارات تۇرمايدى عوي. كينو دا ءدال سولاي. ءتىنى ءالسىز، رۋحى شاتقاياقتاپ تۇرعان سەناريدەن جاقسى كينو شىعادى دەگەنگە ءوز باسىم سەنبەيمىن. ەگەر فيلم ومىردەن، ادامنىڭ مۇڭ-قۋانىش، تاعدىر تالايىنان الشاق بولسا، ونەر ءبىر-اق ساتتە قۇنىن جويادى. ماعان ەڭ ءبىرىنشى ادامنىڭ تاعدىرى، اكتەرلىك تاعدىر، ەكرانداعى ويىن ماڭىزدى. وسى جاعىنا ەكپىن ءتۇسىرۋ قاشان دا ۇتىمدى، كورەرمەنگە قىزىقتى.
ءبىز كورەرمەندى سوعان تاربيەلەۋىمىز كەرەك. مىسالى، «جاۋجۇرەك مىڭ بالا» . ماتەريالى جاقسى، ءبىراق مەن فيلمدى تولىق ماقساتىنا جەتپەگەن دەپ ويلايمىن. ءبىر-ەكى كورۋگە جارار، ودان كەيىن ول دا قالادى. ورتاشا. كوپشىلىك تاراپىنان جىلى پىكىرلەر ايتىلدى. زاماننىڭ بەينەسىن، تاعدىرىن كورسەتكىسى كەلگەن. الايدا ءبارىبىر ماعان سول فيلمنىڭ ءبىر قايناۋى ىشىندە سەكىلدى، ءالى دە بولسىن تۇزى تاتىمايتىنداي كورىنەدى دە تۇرادى. قابىسۋى ازداۋ.
جاس قازاق: «قۇنانباي» فيلمىنىڭ ءتۇسىرىلىمى باستالدى. مۇنى «ونەردەگى جاڭالىق بولادى» دەپ بولجاۋشىلاردىڭ پىكىرى قانشالىقتى قيسىندى؟
ءاسانالى ءاشىموۆ: ءيا، دوسحان جولجاقسىنوۆ ءتۇسىرىپ جاتىر عوي. تاقىرىپ اۋقىمدى. ەندى سونى ۇقساتا السا، ۇلكەن ابىروي بولار ەدى. ءبىراق «ءبىرجان سالدى» كورگەننەن كەيىن، الدىن الا ايتايىن، بۇل فيلمنىڭ دە تاعدىرىنا كۇمانمەن قاراي باستادىم... «ءبىرجان سالدا» كاسىبيلىك ازداۋ، مونتاجداۋىنداعى ولقىلىقتار دا بىردەن كوزگە ۇرادى. باسقانى ەسكەرمەگەندە، فيلمنەن ەڭ ءبىرىنشى ءبىرجان سالدى كوردىڭىز بە؟ ءاننىڭ شىعۋ پروتسەسىن ويناۋعا بولادى، ءبىراق دايىن ءاندى ايتۋعا بولمايدى ءبىرجاننىڭ فيلمىندە.
ماسەلەن، «تەمىرتاستىڭ» تۋۋ پروتسەسى... اۆتور قالاي قينالدى؟ جۇرەكتى جارىپ شىققان زارلى ءاننىڭ شىعۋىنا نە سەبەپ بولدى؟ وسى جاعىنا ۇڭىلسە، وندا ول كينو بولار ەدى. ال ەندى دايىن ءاندى شەتىنەن الىپ ورىنداي بەرسە، ونىڭ تابيعاتى فيلم تالاپتارىمەن قابىسا قويار ما ەكەن؟ كونسەرت، كليپ بولۋى مۇمكىن، ءبىراق كينو ەمەس. كينودا ءبىراق لەيتموتيۆ بولۋى كەرەك. ول - ءبىرجاننىڭ تاعدىرى. سول تاعدىردى جالعىز عانا «تەمىرتاستان» شىعارسا، فيلم باسقاشا وڭگە يە بولار ما ەدى...
ال مۇندا ءبىرجاننىڭ بارلىق ولەڭى ايتىلادى. ءبىر كينوعا ءبارىن سىيعىزۋ مۇمكىن ەمەس دۇنيە. سوندىقتان شاشىراڭقىلىققا، تۇسىنىكسىزدىككە ۇرىنادى. ماحابباتى دا ادامدى سەندىرمەيدى. لايلىممەن دالادا كەزدەسەتىن جەرىندە: «جوق، سەنىڭ كۇيەۋىڭ بار ەكەن» دەپ ءبىرجان كەتىپ قالادى. ءبىرجان سونداي ادام با؟ ول ءسۇيدى مە، سوڭىنا دەيىن سۇيەدى! قىزدىڭ باسىن اۋرەگە سالىپ قويىپ، ءوزى ماحاببات ءۇشىن كۇرەستەن قاشپايدى. ول سال ءبىرجاننىڭ، سەرى ءبىرجاننىڭ تابيعاتىمەن قابىسپايدى مەنىڭ قيالىمدا.
كەيىپكەردى سول تەمپەرامەنتكە ساي ويناۋ قاجەت. ودان كەيىن اتقا ءمىنىپ الىپ دەدەكتەپ شاۋىپ جۇرگەن ءبىرجاننىڭ ارەكەتىن تۇسىنبەدىم. ول قايدا كەتىپ بارادى؟ قايدان كەلە جاتىر؟ موينىندا اپپاق شارف... وسىنداي تۇسىنىكسىز ەپيزودتار وتە كوپ. ال ونى «قىز جىبەكتەن» كەيىنگى ەكىنشى فيلم دەپ جەر-كوككە سىيعىزباي ماقتايدى.
ءبىراق ءوز باسىم فيلمنەن ءبىرجان سالدى كورگەن جوقپىن. سوندىقتان «ءبىرجان سالداي»، «قۇنانبايداي» اۋقىمدى فيلمدەردە قاراپايىم كيىمنەن باستاپ، سىرت ءپىشىن، ىشكى ويىنعا دەيىنگى شىعارماشىلىق ىزدەنىس ءجىتى زەردەلەنۋگە ءتيىس دەپ ويلايمىن.
جاس قازاق: قازىرگى فيلمدەردەن قاي تۋىندىنى ونەر دەڭگەيىنەن كورەسىز؟
ءاسانالى ءاشىموۆ: سوڭعى كەزدە تۇسىرىلگەن فيلمدەردىڭ ىشىنەن مەن ەرمەك تۇرسىنوۆتىڭ «شال» مەن «كەلىنىنىن» ءبولىپ الار ەدىم. مۇندا ونەر بار. مۇندا ءومىر بار. ال ءومىردىڭ ءبارى ونەر ەمەس. ونەردىڭ بارلىعى ءومىر بولا المايدى. رەجيسسەرلەرىمىز سول جاعىن ويلانۋى كەرەك.
جاس قازاق: دەمەك، بار گاپ سەناريدە بولدى عوي...
ءاسانالى ءاشىموۆ: قازىر ونەردى ساپالى كادر ەمەس، اقشا شەشەتىن بولىپ ءجۇر. اقشاسى بارلار ۇلكەن-ۇلكەن تاقىرىپتى الىپ الادى دا، ۇقساتپاي، سوڭىنا جەتكىزبەي لاقتىرىپ تاستاي بەرەدى. ويتكەنى، شاماسى جەتپەيدى. جالپى، قازاقتا كينوعا نەگىز، ارقاۋ بولارلىق ماتەريال كوپ. ارىگە بارماعاننىڭ وزىندە، بەرتىندەگى جازۋشىلاردىڭ شىعارمالارى شىمشىتىرىق وقيعالى كينوعا سۇرانىپ-اق تۇر. ماسەلەن، ورالحان بوكەيدىڭ ءار پوۆەسى - كينوعا داپ-دايىن تاقىرىپ. «ورالحاننىڭ اڭگىمەلەرىنەن كينو تۇسىرسە، قانداي كەرەمەت بولار ەدى» دەپ ۇنەمى ويلايمىن.
قاي شىعارماسىنىڭ دا سيۋجەتى قىزىق، كينو تىلىندە سويلەيدى. سوناۋ ءبىر جىلدارى تالپىنىستار بولدى. ءبىراق سوڭىنا دەيىن جەتكىزە المادى. «قار قىزىنىڭ» دا جولى بولماي ءجۇر. مەنىڭشە، كىنا - رەجيسسەردەن. كوپ رەجيسسەر ورالحاندى تۇسىنبەيدى. ونىڭ جازۋداعى قولتاڭباسى ەرەكشە: كوبىنەسە فانتاستيكالىق، اڭىزدىڭ ستيلىندە جازادى. سيمۆولدىق استارعا كوپ ءمان بەرەدى. وسى جاعىنان كەلگەندە، جاپوندىق جازۋشىلارمەن ۇندەس دەر ەدىم. سماعۇل ەلۋبايەۆتىڭ «اقبوز ءۇيى»، سايىن مۇراتبەكوۆتىڭ اڭگىمەلەرى قانداي! ءابىش كەكىلباي مەن مۇحتار ماعاۋيننىڭ الەمى دە ەرەكشە، تەرەڭ، تۇڭعيىق. وكىنىشكە قاراي، سول تەرەڭدىككە ءبىزدىڭ رەجيسسەرلەر بويلاي المايدى. تۇرتىنەكتەپ باستاعان بولادى، ءبىراق ناتيجەسىز، دىتتەگەنىنە جەتە الماي تىنادى. رۋح ءالسىز. ىزدەنىس ازداۋ.
جاس قازاق: جاقىندا م. اۋەزوۆ اتىنداعى اكادەميالىق دراما تەاترىنا كوركەمدىك جەتەكشى بولىپ تاعايىندالدىڭىز. ىرگەلى قاراشاڭىراقتا بۇگىنگى كۇننىڭ تاقىرىبىنا دەم بەرۋدە قانداي تالپىنىستار جاسالىپ جاتىر؟
ءاسانالى ءاشىموۆ: بۇگىنگى كۇن دەگەن ءوزىمىز عوي. ءبىراق بىزدە سونى جازاتىن جاقسى قالامگەرلەر، جالپى، دراماتۋرگيا جوق. مۇمكىن ءوز ىشىندە جازىپ تا جۇرگەن شىعار، ءبىراق كورىنبەيدى. دراماتۋرگيا دەسەك، اينالىپ كەلىپ دۋلاتتى (يسابەكوۆ - اۆت.) ىزدەيمىز. سوندىقتان بىزگە كوپ جاعدايدا كلاسسيكالىق تۋىندىلاردى تالعاجاۋ ەتۋگە تۋرا كەلەدى. كلاسسيكاعا بارۋدان ونەر ۇتىلمايدى. كەرىسىنشە، تەاتردىڭ دا، اكتەردىڭ دە تالعامىنىڭ قالىپتاسۋىنا، دەڭگەيىنىڭ وسۋىنە، شىڭدالۋىنا ۇلكەن مۇمكىندىك بەرەدى. تەك سونى بۇگىنگى كۇننىڭ كوزقاراسىندا زاماناۋيلاندىرىپ، رەجيسسەرلىق جاڭاشا كوزقاراسپەن بۇگىندەندىرىپ بەرسە، ونەر ولجالى بولار ەدى. پروبلەما بارلىق ۋاقىتتا بولعان، بولادى. سول ۇقساستىق، سول ماحاببات، سول قىزعانىشتى دا پالەندەي وزگەردى دەي المايمىز. سوندىقتان بارلىعىن بۇگىنگى كۇننىڭ تاقىرىبىنا، تالابىنا، كوزقاراسىنا سايكەستەندىرىپ قايتا اكەلۋگە، قىزىقتى ەتىپ شىعارۋعا، ماتىندەگى ينتوناتسيانى بۇگىندەندىرۋگە بولادى.
ماسەلەن، استاناداعى قاليبەك قۋانىشبايەۆ اتىنداعى مۋزىكالىق دراما تەاترىندا رەجيسسەر الىمبەك ورازبەكوۆ مۇحتار اۋەزوۆتىڭ «ايمان-شولپانىن» زاماناۋيلاندىرىپ قويدى. ماعان ۇنادى. كورىپ شىعىپ، ريزا بولدىم. سوندىقتان كلاسسيكادا ەسكى، جاڭا دەگەن بولمايدى. ءوز زامانىڭا قاراي يكەمدەپ الساڭ، سويلەپ جۇرە بەرەدى. ول سونىسىمەن كلاسسيكا. ال ەندى بۇگىن دە سول ماحابباتتى جازادى، ءبىراق ويناساڭ، ەشكىم قابىلدامايدى. نانىمسىز.
جاس قازاق: بيىل قازاق كينوسىنىڭ اتاسى - شاكەن ايمانوۆتىڭ عاسىر تويى. شاكەن تانۋدىڭ جاي-كۇيى، مەرەيتويعا دايىندىق قارقىنى قالاي؟ «شاكەن جۇلدىزدارى» كينو فەستيۆالى بار، ودان وزگە قانداي جۇمىستار اتقارىلىپ جاتىر؟
ءاسانالى ءاشىموۆ: سول «شاكەن جۇلدىزدارىنىڭ» ءوزىن كوپ كورىپ جاتىر عوي قازىر. قارجىسىن قىرقىپ تاستاپ، فەستيۆالدىڭ ءوتۋى قيىنداپ بارادى. ءبىز نەگىزى ادامدى سىيلاي بىلمەيمىز. رۋ، جەرشىلدىك دەگەن پالە شىقتى. رۋ قۋالايدى، رۋلاسىڭنان، جەرلەسىڭنەن وزگەسى ادام بولماي قالدى. ايتپەسە، شاكەن اياداي باياناۋىلدىڭ اياسىنا سيا ما؟
تەك بايان اۋىل، قازاقستان ەمەس، شاكەننىڭ عاسىر تويى يۋنەسكو دەڭگەيىندە اتالىپ ءوتۋ كەرەك. ءجونى سول. پاۆلودارعا ءبىر كونسەرت بەرىپ، سۋرەتىن ءىلىپ قويىپ، ۇساق-تۇيەك ءىس-شارامەن تويلادىق دەۋ - قازاقتىڭ قازاقتىعىنا سىن ەمەس پە؟ ايتپەسە، شاكەننىڭ قازاق ونەرىنە سىڭىرگەن ەڭبەگى ەشقانداي توي-تومالاق، باعامەن ولشەنبەيدى. ونىڭ شاكەنگە قاجەتى دە جوق.
بارلىعى كەلەشەك ءۇشىن، ۇرپاق ءۇشىن كەرەك. سونى ويلاپ، سول جولدا ابىرويلى ەڭبەك ەتۋگە جۇمىلۋ قاجەت. ال مەنىڭ قولىمنان ەشتەڭە كەلمەيدى. ايتاسىڭ، ءبىراق ءبىزدى تىڭداپ جاتقان ادام جوق. شاكەندى الەمدىك دەڭگەيدە ۇلىقتاۋ كەرەك. شاكەن تانۋ دەگەن تۇتاس ءبىر عىلىم. شاكەن تانۋ - كينو تانۋ، ادام تانۋ. وسى تۇرعىدان تەرەڭىرەك زەردەلەنسە، قازاق كينو تانۋ سالاسى تالاي تىڭ جاڭالىقتارمەن تولىعاتىن ەدى. شاكەن مىنا جىلى تۋعان، سونشا فيلم تۇسىرگەن دەگەنمەن تۇلعا تابيعاتى تارازىلانبايدى عوي. وسى جاعىن ەسكەرەتىن، شاكەن تانۋعا بەت بۇراتىن ۋاقىت الدەقاشان تۋعان.
جاس قازاق: «حالىق بۇرىننان-اق داعدارىسقا ءتۇسىپ كەلگەن، ازىردە داعدارىستا» دەيسىز. بۇل بىتپەيتىن قانداي داعدارىس، اعا؟
ءاسانالى ءاشىموۆ: قازاق ءومىر باقي داعدارىستا كەلەدى عوي. حالىق قاي ۋاقىتتا جارىدى؟ بىزدە ءالى قارا نانمەن قارا سۋعا قاراپ وتىرعان ەل بار. ەلەكتر جارىعىن كورمەي وتىرعاندارى قانشاما. بۇل داعدارىس ەمەي نەمەنە؟ قارجىداعى داعدارىستىڭ اۋىرتپالىعى تۇسسە، ميللياردتارى بار بايلارعا تۇسەر، ءبىراق قاراپايىم حالىققا ول اسەر ەتپەيدى. حالىقتىڭ ۋايىمى باسقادا...
جاس قازاق: ال ەندى، اعا، ۇلتتىق مىنەزدەگى «كريزيسكە» نە دەر ەدىڭىز؟
ءاسانالى ءاشىموۆ: بۇل - سوناۋ عاسىردىڭ باسىنان باستالعان كريزيس. ۇلتتىڭ قايماقتارىن قىرىپ تاستاۋ بارلىق حالىقتى مايدالاۋعا ءتۇسىردى. ماعجانداي، ءاليحانداي الىپتاردى وتاعان جاۋىز جۇيە تۇتاستاي ۇلت مىنەزىنىڭ مايدالانۋىنا اكەلدى. ماسەلەن، قازىر جازۋشىلار وداعىنىڭ 1000 عا تارتا مۇشەسى بار. ءبىراق سونىڭ اراسىنان جازۋشىلار وداعىنا ءتوراعا بولۋعا لايىقتى ءبىر ادامدى تابا المايمىن. ءبىزدىڭ سالادا دا سولاي. ءبارى مايدا-ماشاق، كوزگە ءىلىپ الار، تىلگە تيەك ەتەر ادام اۋىزعا ورالا بەرمەيدى. باياعى ابىلايدىڭ ءتۇسى وڭىمىزگە اينالىپ كەلە مە دەپ قورقامىن.
ءارۋاقتى ادام عوي، كورەگەندىگىنە تاڭ قالامىن كەيدە. سول ۇلىلارىمىزدىڭ بىزگە تاستاپ كەتكەن ۇلان-عايىر دالاسىن، مىنەزدەگى ىرىلىگىن ساقتاپ قالۋدىڭ كۇننەن كۇنگە قيىن بولىپ بارا جاتقاندىعى جانىمدى جەگىدەي جەيدى. ۇستاپ قالۋ ءۇشىن زەردە، تۇلعالىق مىنەز كەرەك. وكىنىشكە قاراي، ءبىزدىڭ سول قاسيەتىمىز قولدان سۋسىپ شىعىپ بارا جاتىر. جاقىندا ەۋرازيالىق ەكونوميكالىق وداققا مۇشە بولدىق. ساياساتكەرلەردىڭ دەڭگەيىندە بۇل وداقتىڭ قانشالىقتى پايدا-زيانىنىڭ بايىبىنا بارىپ تارازىلاپ جاتپاعان بولۋىم مۇمكىن، ءبىراق تۇيسىگىم ءبىر جايسىزدىقتى سەزەدى.
اكتەرلەردە ينتۋيتسيالىق قابىلەت جاقسى جەتىلەدى عوي، تۇيسىگىمە سۇيەنىپ قانا ايتىپ وتىرعانىم. سول سەزىمىم الداسا ەكەن دەپ تىلەيمىن. ءوزىڭنىڭ ۇلتتىق بەتىڭ بولماعاننان كەيىن، ۇلت بولىپ ءومىر سۇرۋدەن دە ءمان قالمايدى. ۇلتتىق دەگەندى قۇرتتىق دەپ سوسىن شىعا كەلەسىڭدەر. كەزىندە عابيدەن مۇستافين: «بۇرىن ۇلتشىلدارمەن كۇرەسىپ ەدىك، قازىر ۇلتسىزدارمەن كۇرەسىپ جاتىرمىز» دەپ قالاي ءدال ايتقان.
جاس قازاق: قازىر شىنىمەن سوعان كەلە جاتىرمىز-اۋ، اعا...
ءاسانالى ءاشىموۆ: كەلە جاتىر ەمەس، كەلدىك قوي دەيمىن... (كۇرسىندى)
جاس قازاق: اڭگىمەڭىزگە راحمەت!
سۇحباتتاسقان نازەركە جۇماباي