جۇسىپبەك ايماۋىتوۆتىڭ جەرلەنگەن جەرى تابىلدى
«فەدەرالدىق قاۋىپسىزدىك قىزمەتىنەن جاۋاپ كەلدى. ءبىزدىڭ جۇسىپبەك اتامىز اتىلعاننان كەيىن ۆاگانكوۆسكوە زيراتىندا جەرلەنىپتى. بۇيىرتسا، بيىل سول جەرگە بارىپ تاقتاشا ورناتىپ، ءارۋاعىنا قۇران باعىشتاپ قايتساق دەگەن جوسپارىمىز بار» ، - دەپ جازدى ا. جالدينوۆ.
جان- جاقتى ونەر يەسى، سەگىز قىرلى ءبىر سىرلى دارىن، رومانشى، دراماتۋرگ، اقىن، اۋدارماشى، زەرتتەۋشى جۇسىپبەك ايماۋىتوۆ 1889 - جىلى (كەي دەرەكتەردە 1890 - جىلى) قازىرگى پاۆلودار وبلىسى باياناۋىل اۋدانى قىزىلتاۋ اتىرابىندا تۋعان. جاس كۇنىنەن جۇسىپبەك بىرگە تۋعان باۋىرلارى احمەت، جاقىپبەك سەكىلدى ارابشا حات تانۋ، وقۋ ۇستىنە، اعاش شەبەرلىگى، تەمىر ۇستالىعى ونەرىن قاتار ۇيرەنەدى.
ون بەس- ون التى جاسىندا ءوزى ۇمتىلىپ، ءۇي ءىشىنىڭ رۇقساتىنسىز پاۆلودارعا قاشىپ بارىپ، ورىسشا- قازاقشا ەكى سىنىپتى مەكتەپكە تۇسەدى. ءبىر جاعىنان بالا وقىتىپ، قاراجات تابا ءجۇرىپ، وقۋىن 1914 - جىلى بىتىرەدى دە، سەمەيدەگى وقىتۋشىلار سەمينارياسىنا تۇسەدى. ونى 1918 - جىلى اياقتايدى. قازاقستان كەڭەستەرىنىڭ قۇرىلتايىنا دەلەگات، وقۋ كومميسارياتىنىڭ كوللەگيا مۇشەسى بولۋ، «قازاق ءتىلى» گازەتىن وڭدەۋ، «اق جول» گازەتىندە ىستەۋ، شىمكەنتتەگى پەداگوگيكالىق تەحنيكۋمىنىڭ ديرەكتورلىعى - مىنە، مۇنىڭ ءبارى جۇسىپبەك ايماۋىتوۆتىڭ جاڭا ءومىردى ورنىقتىرۋ جولىنداعى كۇرەس جولىن، ءومىر بەلەستەرىن كورسەتەدى. 1929 - جىلى باستالعان زوبالاڭ كەزىندە قارماققا ىلىنگەن جۇسىپبەك ايماۋىتوۆ 1931 - جىلى اتىلعان.
استان- كەستەڭ اۋىر، ءبىراق ەرەكشە قۋاتتى دا قىزىق، الەۋمەتتىك توڭكەرىستەر، ۇلى وزگەرىستەر زامانىندا ءومىر سۇرگەن جۇسىپبەك ايماۋىتوۆ ءوزىنىڭ وسى قىسقا عۇمىرىندا ارتىنا اسا باي، باعالى ادەبي، عىلىمي مۇرا قالدىرىپ ۇلگىردى. ول، ۆ. شەكسپير، ۆ. گيۋگو، گ. موپاسسان، ا. س. پۋشكين، ن. ۆ. گوگول، ل. ن. تولستوي شىعارمالارىن، ءبىرقاتار عىلىمي ەڭبەكتەردى اۋداردى، پەداگوگيكا، پسيحولوگيا، مەتوديكا، تاربيە تۋرالى زەرتتەۋلەر تۋدىردى؛ ادەبي، ەستەتيكا، سىن سالاسىنا ارالاستى: سان قيلى پروبلەمالىق ماقالالار جازدى. سول سياقتى «كۇنىكەيدىڭ جازىعى» ، «اقبىلەك» روماندارى، سان الۋان پەسالارى - كۇردەلى تالانتتىڭ قازاق ادەبيەتى تاريحىنداعى ولمەيتىن ورنى بار شىعارمالار.
اۆتور: مارلان جيەمباي