دىڭ شياوپين - قاجىماس رۋح پەن قايرات يەسى

نۇر-سۇلتان. قازاقپارات - دىڭ قاريا تۋرالى كەرەمەت كىتاپ وقىدىم.

نەگىزى ازان شاقىرىپ قويعان اتى - دىڭ شيانشىڭ ەكەن. "شيانشىڭ" - دەگەن قىتاي تىلىنەن اۋدارسا "ۇستاز، قاريا" دەگەندى بىلدىرەتىن كورىنەدى.

دىڭ 1920 -جىلدارى سۋن ياتسەننىڭ "بولاشاق باعدارلاماسىمەن" فرانسياعا وقۋعا، تاجىريبە جيناۋعا بارادى. تابيعاتىنان توپ-تومپاق، بويى الاسا جاس دىڭدى ەشكىمنىڭ "ۇستاز" دەۋگە ءداتى بارمايدى.

سوندىقتان دوس-جاراندارى وعان "شياوپين" دەگەن پارتيالىق لاقاپ تاعادى.

شياوپين - قىتاي اراعىن قۇيىپ، جولعا الىپ جۇرۋگە ارنالعان كىشكەنتاي عانا تومپايعان، سىنبايتىن، قۇلامايتىن قۇتى ەكەن. ونىڭ ءبىر ەرەكشەلىگى - قانشا قيسايتساڭ دا، اياعىنان تىك تۇرىپ، ىشىندەگىسىن توكپەي ساقتايدى ەكەن.

دوستارى ازىلدەپ قويعان لاقاپ ات دىڭنىڭ ءومىرىن جاقسى بەينەلەيدى. قانشا رەت قۋعىندالىپ، ءومىرىن جاڭادان باستاۋعا ءماجبۇر بولسا دا دىڭ ەش مويىعان ەمەس. 1933، 1966 جانە 1976 -جىلدارى كەرەمەت قۋعىن-سۇرگىندى باسىنان وتكەردى.

تەك 1970 - جىلداردىڭ سوڭىندا بيلىككە جەتىپ، تىڭ ساياسات جۇرگىزە الدى. وسىنىڭ ارقاسىندا شىن مانىندەگى "ۇلت ۇستازىنا" اينالدى.

دىڭ شياوپين: مىسىقتىڭ تۇسىندە نە بار، تىشقان اۋلاسا بولدى ەمەس پە؟

دىڭ شياوپين ابدەن تيتىقتاعان قىتاي ەكونوميكاسىنا رەفورمانى باستايدى. بىردە پەكيندە وتكەن باسپا ءسوز ءماسليحاتىندا سوۆەتتىك تاسس اگەنتتىگىنىڭ ورىس ءتىلشىسى وعان قيتۇرقى سۇراق قويادى. وعان ساسقان دىڭ جوق، اۋزىن جاۋىپ كەتكەنى بار:

- دىڭ جولداس، ءسىز كومپارتيانى باسقارىپ وتىرعان ەجەلگى كوممۋنيست ادامسىز. ءبىراق، كاپيتاليزمنىڭ نارىقتىق ەكونوميكاسىن ەلگە ەنگىزىپ وتىرسىز. بۇل ءبىرى بىرىنە قايشى انتوگونيست دۇنيەلەر عوي؟!

- جولداس، سوۆەت جۋرناليسى! ءسىز قالاي ويلايسىز، مىسىقتىڭ ءتۇسى اق بولسا تىشقاندى جاقسى ۇستاي ما، قارا بولسا، مىقتىراق اۋلاي ما؟

نە دەرىن بىلمەگەن ورىس جۋرناليسى ءۇنسىز قالادى، جينالعاندار قىران توپان كۇلكىگە قارىق. سوڭىندا دىڭ بىلاي دەيدى:

- ونىڭ ءتۇر تۇسىندە، اق-قاراسىندا تۇرعان نە بار ەكەن؟ تىشقان اۋلاسا بولدى ەمەس پە.

كەيىنگى ۋاقىتتا، دىڭ شياوپيننىڭ بۇل ءسوزى - الەم ساياساتكەرلەرىنە ەرەكشە اسەر ەتكەن بولاتىن.

ازىرلەگەن بەيسەن سۇلتان ۇلى