قۇشاقتاسۋدىڭ قانداي پايداسى بار ەكەنىن بىلەسىز بە؟
قۇشاقتاسۋدىڭ ءسىز بەن ءبىز بىلە بەرمەيتىن پايداسى مول. زەرتتەۋلەر ناتيجەسى، قۇشاقتاسۋدىڭ تەك ادام پسيحولوگياسىنا اسەر ەتىپ قويماي، مۇنىمەن قاتار دەنساۋلىعىن قالپىنا كەلتىرەتىندىگىن انىقتاپ وتىر.
ۆيردجينيا ءساتيردىڭ ايتۋى بويىنشا، كۇندەلىكتى قالىپتى ءومىر ءسۇرۋ ءۇشىن 4 رەت، جاقسى ءومىر ءسۇرۋ ءۇشىن 8 رەت، وتە جاقسى ءومىر ءسۇرۋ ءۇشىن 12 رەت قۇشاقتاسۋىمىز كەرەك ەكەن. بۇل تەك عاشىقتاردىڭ قۇشاقتاسۋىنا قاتىستى ەمەس.
XX عاسىردىڭ 70 - جىلدارىنان باستاپ عالىمدار ادامنىڭ جۇيكە جۇيەسىندە كەزدەسەتىن ەندورفين اتتى حيميالىق زاتتى زەرتتەي باستادى. ەندورفين دەگەنىمىز - اۋىرسىنۋدى باسىپ، ەيفوريا سەزىمىن شاقىراتىن مورفين تارىزدەس زات.
جوعارىدا اتالعان زەرتتەۋلەر قۇشاقتاسۋدىڭ ناتيجەسىندە جۇيكە جۇيەسى وسى تابيعي زاتتى وتە كوپ مولشەردە بولەتىندىگىن دالەلدەپ وتىر.
جاقىندارىنىڭ جانىندا ەكەنىن سەزبەگەن كەزدە ادام شىنايى ومىرمەن بايلانىسىن ۇزەدى.
ادامنىڭ تەرىسىندە سىرتقى ورتاعا جاۋاپ بەرەتىن ميدىڭ بەلسەندى بولىگى بار. ەگەر بالانى ەركەلەتىپ، قۇشاقتاماسا، ميىنىڭ وسى بولىگى جانسىزدانىپ، يممۋندىق جۇيەسى زارداپ شەگەدى.
كىشكەنتاي كەزىمىزدە اتا-انامىزدىڭ جىلى الاقانى مەن قۇشاعى بىزدەرگە ءسۇيۋدى ۇيرەتەدى. ال 7 جاسقا دەيىن تۋعاندارىنان قامقورلىق كورمەگەن بالا ءسۇيۋدىڭ نە ەكەنىن بىلمەي قالۋى مۇمكىن. ولاردان پسيحولوگيالىق اۋىتقۋى بار، اينالاسىنداعىلاردى جەك كورەتىن، تەرروريست سىندى ادامدار قالىپتاسادى.
بۇدان وزگە ءبىر-ءبىرىن سيرەك قۇشاقتايتىن قوعام اگرەسسيۆتى بولادى ەكەن. وسىعان بايلانىستى نەيروپسيحولوگ دجەيمس ۆيليام پريسكوت اكە-شەشەسى قولىنا الىپ، ماڭدايىنان سۇيمەگەن بالالار بولاشاقتا ادام ولتىرۋگە بەيىم كەلەتىندىگىن ايتادى.
- قۇشاقتاسۋ يممۋندىق جۇيەنى قالپىنا كەلتىرەدى؛
- ورتالىق جۇيكە جۇيەسىن ىنتالاندىرادى؛
- تىنىش ۇيقىنى قامتاماسىز ەتەدى؛
- كۇش-قۋات بەرەدى؛
- جاسارتادى؛
- كۇيزەلىستەن ارىلتادى؛
- گورموننىڭ وكسيتوتسين كولەمىن ۇلعايتادى؛
- قان قىسىمىن تومەندەتەدى؛
- جۇرەك اۋرۋلارىنا شالدىعۋ قاۋپىن تومەندەتەدى؛
- گەموگلابين دەڭگەيىن كوتەرەدى؛
- يممۋنيتەتتى كۇشەيتىپ، كەز كەلگەن اۋرۋدان ساۋىقتىرادى؛
- ادامنىڭ ءوزىن دۇرىس باعالاۋىنا سەپتىگىن تيگىزەدى؛
- ىشكى قورقىنىشتان ارىلتادى؛
ەجەلگى شىعىس جازبالارىندا قۇشاقتاسۋ ادام بالاسىنا ەڭ كەرەكتى ءىس-ارەكەت رەتىندە سيپاتتالادى. ونىڭ ادامدى ەمدەپ، جاسارتاتىن ەرەكشە قاسيەتى دە بار ەكەن. اينالامىزداعى بارلىق ءتىرى جان يەسى قامقورلىققا ءزارۋ. سوندىقتان اتا-اجەمىزدى، اتا-انامىز بەن بالالارىمىزدى، سۇيىكتىمىزدى قۇشاقتاۋدى ۇمىتپايىق!
دايىنداعان: قارلىعا بۇيەنباي