«بۇگىن تاڭەرتەڭ فيزيكا ءپانى بويىنشا حالىقارالىق وليمپيادانىڭ ءبىرىنشى تەوريالىق كەزەڭى باستالدى. ول ءۇش تاپسىرمادان تۇرادى. قاتىسۋشىلار سىن باستالعانعا 15 مينۋت قالعاندا 3 كونۆەرتكە سالىنعان تاپسىرمالارىن الدى. وقۋشىلاردىڭ قاي ەلدەن كەلگەنى ەسكەرىلىپ تاپسىرمالار تۇندە سول تىلدەرگە اۋدارىلدى»، - دەدى فۋات گادجيەۆ، Nazarbayev University Research and Innovation System باس ديرەكتورىنىڭ كەڭەسشىسى، وليمپيادانىڭ ۇيىمداستىرۋشىلار كوميتەتىنىڭ مۇشەسى.
وقۋشىلار تاپسىرمانى 5 ساعات ىشىندە ورىنداۋى ءتيىس. ناتيجەسى ەرتەڭ بەلگىلى بولادى. حالىقارالىق ساراپشىلاردان تۇراتىن قازىلار القاسى ءتۇنى بويى ورىندالعان تاپسىرمالاردى تەكسەرەدى. «العاشقى كەزەڭنىڭ ناتيجەسى ەرتەڭ بەلگىلى بولادى، اپەللياتسيالىق تۇرعىدا وعان شاعىمدانۋعا بولادى. ەرتەڭ قاتىسۋشىلار دەمالادى. ودان كەيىنگى كۇنى پراكتيكالىق كەزەڭى بولادى. ەكى كەزەڭنىڭ ناتيجەسى بويىنشا سىننىڭ قورىتىندىسى شىعادى»، - دەدى ف. گادجيەۆ.
ەسكە سالا كەتەيىك، كەشە استانادا فيزيكا بويىنشا حالىقارالىق وليمپيادانىڭ اشىلۋ سالتاناتى بولدى. قازاقستان نامىسىن بۇل وليمپيادادا 5 جاس دارىندى قورعايدى. ونىڭ تورتەۋى 11-سىنىپتا وقىسا، بىرەۋى 10-سىنىپتا. ولار - ءامىر برالين، دانات يسا، نۇربەك دىنمۇحاممەد، نۇريسلام تۇرسىنبەك، داۋلەت قۇرمانتايەۆ.
وليمپيادانىڭ جابىلۋ سالتاناتى مەن جەڭىمپازداردى ماراپاتتاۋ 20- شىلدەدە بەيبىتشىلىك جانە كەلىسىم سارايىندا وتەدى.