ازىرەت سۇلتان مەشىتى ب ا ق وكىلدەرىنە اۋىزاشار بەردى
اۋىزاشار بارىسىندا ەڭ اۋەلى اقشام نامازىنا ازان شاقىرىلىپ، قۇران وقىلدى. سودان سوڭ «ازىرەت سۇلتان» مەشىتىنىڭ باس يمامى، نايب ءمۇفتي سەرىكباي قاجى وراز ءسوز الىپ، ورازانىڭ ماڭىزى، اۋىزاشاردىڭ ارتىقشىلىعى تۋرالى ءبىر ازىراق ۋاعىز ايتتى. سونىمەن قاتار، باس يمام ب ا ق وكىلدەرىنىڭ ءدىن ىستەرىندەگى رولىنە توقتالىپ، حاقتى تانىتۋ جولىنداعى جۋرناليستەر جۇمىسىنا جەمىس تىلەدى.
اۋىزاشار بارىسىندا ىزگى نيەتتەرىن، يگى تىلەكتەرىن بىلدىرگىسى كەلگەن جۋرناليستەر دە ءسوز الىپ، «ازىرەت سۇلتان» مەشىتىنىڭ يگى ىستەرىنە ريزاشىلىق ءبىلدىردى.
كەش بارىسىندا ءدىني اندەر شىرقالىپ، تەرمەلەر دە توگىلدى. بۇنىمەن قوسا، ازىرەت سۇلتان مەشىتىنىڭ رەسمي سايتى muslim.kz ءوزىنىڭ «ەستىمەيتىندەر دە ەستيدى» اتتى جاڭا پاراقشاسىنىڭ تۇساۋىن كەستى.
اتالعان پاراقشا مۇمكىندىگى شەكتەۋلى جانداردىڭ اراسىندا مىلقاۋلار ماسەلەسىنە دەن قويىپ، ولاردىڭ اسىل دىنىمىزگە بارىنشا جاقىنداۋىنا مۇمكىندىك تۋعىزباق. جوعارى كاسىبي سۋردواۋدارماشىلار قوعامنىڭ ءبىر بولشەگى سانالاتىن ەستۋ جانە سويلەۋ قابىلەتىنەن ايىرىلعاندار ءۇشىن ءدىني ۋاعىزداردى بارىنشا تۇسىنىكتىرەك ەتپەك.
«ءاسىلى، قۇلاقپەن عانا ەستيدى دەگەنىمىز دۇرىس ەمەس، حاق ءدىندى جۇرەكپەن ەستۋگە دە بولادى. ال ءبىز تەك وسى جاعدايدىڭ دانەكەرى بولۋعا نيەتتىمىز»، - دەيدى ينتەرنەت پاراقشانى ۇيىمداستىرۋشىلار. ولاردىڭ سوزىنە قاراعاندا، مۇمكىندىگى شەكتەۋلى وسىنداي جاندار نەگىزىنەن ءتيىمدى قۇرالدىڭ بولماۋىنان كوپتەگەن جات اعىمنىڭ جەتەگىنە كەتىپ جاتىر. اتالعان پاراقشانى اشۋداعى ماقساتتىڭ ءبىرى دە سوعان توسقاۋىل قويۋ بولىپ تابىلادى.
اۋىزاشار سوڭىندا قوناقتارعا كادەسىي ۇسىنىلىپ، جۋرناليستەر جاقسى كوڭىلمەن تارقاستى.
اۆتور: قانات مامەتقازى ۇلى