برازيليا پوليتسياسى پەلەنىڭ ۇلىن قۇرىقتادى

استانا. قازاقپارات - برازيليالىق اڭىز فۋتبولشى پەلەنىڭ ۇلى ەدينو برازيليا ساقشىلارىنىڭ قولىنا ءتۇستى.

ول ەلدەن قاشىپ كەتپەكشى بولعان ەكەن. بۇل تۋرالى O Globo اگەنتتىگى حابارلادى.

سەيسەنبى كۇنى سانتۋس قالاسىنىڭ پوليتسياسى ەدينونى ۇيىنەن ۇستاپ اكەتىپ، پوليتسيا بولىمشەسىنە قاماعان. ول ءوزىنىڭ پاسپورتىن تاپسىرۋى كەرەك بولعان، ءبىراق ايىپتالۋشى ءوز قۇجاتىن جوعالتىپ الدىم دەگەن سىلتاۋ ايتا باستاعاندا ونى قۇرىقتاۋعا شەشىم قابىلدانعان.

ەدينو پەلە 2005 - جىلى سوتتالعان. ول ەسىرتكى ساتۋمەن اينالىستى دەگەن ايىپپەن جازالانعان ەدى. ال سوت ءىسى بارىسىندا ول ءوزىنىڭ ەسىرتكى قولداناتىنىن مويىنداعان، ءبىراق ونى ساتۋمەن ەشقاشان اينالىسپاعانىن ايتىپتى.

ەستەرىڭىزگە سالا كەتەيىك، وسى جىلدىڭ 1- ماۋسىمىندا ەدينو ەسىرتكى ساتۋمەن اينالىسقانى ءۇشىن 33 جىلعا سوتتالعانىن bbc.co.uk جاڭالىقتار قىزمەتى حابارلاعان بولاتىن. ءبىراق سوتتىڭ بۇل شەشىمىنە اپەللياتسيا بەرگەن ول ءىستى قايتا قاراۋ پروتسەسى ارقىلى بوستاندىقتا بولىپ كەلگەن ەدى.