باتىستىڭ كەيبىر ساياساتكەرلەرى قازاقستاننىڭ دۇنيەجۇزىلىك ساۋدا ۇيىمىنا كىرۋىنە كەدەرگى كەلتىرۋدە

استانا. قازاقپارات - باتىستىڭ كەيبىر ساياساتكەرلەرى ەۋرازيالىق ەكونوميكالىق وداققا مۇشە بولعانى ءۇشىن قازاقستاننىڭ دۇنيەجۇزىلىك ساۋدا ۇيىمىنا كىرۋىنە كەدەرگى كەلتىرۋدە.

بۇل تۋرالى بۇگىن بەرلين ەۋرازيالىق كلۋبىنىڭ 10- وتىرىسىندا «Eurasian Trasition Group» اتقارۋشى ديرەكتورى، ساياساتكەر ميحاەل لاۋبيتس ءمالىم ەتتى.

«ءبىز سوڭعى جىلدارداعى، ءتىپتى سوڭعى ايداعى كەلىس ءسوزدەر ۇدەرىسىندەگى جەتىستىكتەر جايىندا ايتقاندا، مەنىڭشە، قازىرگى ۋاقىتتا باتىستىڭ كەيبىر ساياساتكەرلەرى دۇنيەجۇزىلىك ساۋدا ۇيىمى مەن ەۋرازيالىق ەكونوميكالىق وداقتى ءبىر-بىرىنە كەرەعار باعىت رەتىندە قارايتىن سياقتى. سوندىقتان دا قازاقستاننىڭ د س ۇ- عا كىرۋىنە قاساقانا نەمەسە تۇسىنبەستەن كەدەرگى كەلتىرۋدە نە بولماسا كەدەرگى كەلتىردى. مەن مۇنى بۇل ماسەلەنى شەشۋدىڭ كونسترۋكتيۆتى ءادىسى دەپ سانامايمىن. ولار مۇندا ورىن الىپ وتىرعان ەكونوميكالىق ءارى ساياسي شىنايىلىقتى كورىپ وتىرعان جوق»، - دەدى ول.

م. لاۋبيتستىڭ پايىمىنشا، قازاقستان د س ۇ مەن ە ا ە و- نىڭ مۇشەسى رەتىندە ينۆەستيتسيا، حالىقارالىق ىنتىماقتاستىق جانە وڭىرلىك تۇراقتىلىقتى كۇشەيتۋ ءۇشىن زور الەۋەتكە يە بولادى.

اۆتور: مارلان جيەمباي