ق ح ر ورتالىق اسكەري كەڭەسى باسشىسىنىڭ بۇرىنعى ورىنباسارى قىتاي كومپارتياسى قاتارىنان شىعارىلدى

بەيجىڭ. قازاقپارات - ق ح ر ورتالىق اسكەري كەڭەسى ءتوراعاسىنىڭ بۇرىنعى ورىنباسارى شۇي سايحۋ قىتاي كومپارتياسى (ق ك پ) قاتارىنان شىعارىلدى، ونىڭ ءىسى اسكەري پروكۋراتۋراعا بەرىلدى.

 دۇيسەنبى كۇنى بەيجىڭدە ق پ ك باس حاتشىسى جانە ق ح ر ورتالىق اسكەري كەڭەسىنىڭ ءتوراعاسى شي جينپيننىڭ توراعالىعىمەن وتكەن ساياسي بيۋرو وتىرىسىندا وسىنداي شەشىم قابىلداندى.

ق ك پ ورتالىق كوميتەتىنىڭ حابارلاماسىندا شۇي سايحۋعا قاتىستى ءىستى تەرگەۋ بارىسىندا جوعارى شەندى اسكەري تۇلعانىڭ «قىزمەت بابىن اسىرا پايدالانعانى، پارا بەرۋشىلەرگە قىزمەت بابىمەن كوتەرىلۋىنە كومەك كورسەتكەنى ءۇشىن پارا العانى جانە ءۇشىنشى تۇلعالاردىڭ مۇددەسى ءۇشىن ارەكەت ەتكەنى» ايتىلعان.

شياڭگاڭ ب ا ق- تارى شۇي سايحۋدىڭ تۇسىندا قىتاي حالىق-ازاتتىق ارمياسىندا شەندى «ساتىپ الۋ» جانە پاراعا قىزمەت بابىمەن جوعارىلاۋ ورىستەگەنىن جازادى.

 شۇي سايحۋ  15- ناۋرىزدان بەرى تەرگەلۋ ۇستىندە. سونىمەن بىرگە، ونىڭ وتباسى دا پاراقورلىققا كۇدىكتەلۋدە.

شۇي سايحۋدىڭ ءىسى قىتاي حالىق-ازاتتىق ارمياسى تاريحىنداعى ەڭ شۋلى وقيعا، ەگەر ونىڭ كىناسى دالەلدەنەتىن بولسا، ول تريبۋنالعا بەرىلەتىن ەڭ جوعارى شەندى قىتايلىق اسكەري تۇلعا بولماق.

ورتالىق اسكەري كەڭەس قۇرامىنا ول 1999- جىلى كىردى، ال 2004-2012 - جىلداردىڭ اراسىندا قارۋلى كۇشتەرگە باسشىلىق جونىندەگى وسى جوعارعى ورگان ءتوراعاسىنىڭ ورىنباسارى قىزمەتىندە بولدى.