تاۋەلسىزدىك جىلدارىنىڭ ىشىندە ۇكىمەت ءبىر دە ءبىر زاڭ جوباسىن مەملەكەتتىك تىلدە ازىرلەمەگەن - ءماجىلىس سپيكەرى

استانا. قازاقپارات - تاۋەلسىزدىك جىلدارىنىڭ ىشىندە ۇكىمەت ءبىر دە ءبىر زاڭ جوباسىن مەملەكەتتىك تىلدە ازىرلەمەگەن.

بۇگىن پارلامەنت پالاتالارىنىڭ بىرلەسكەن وتىرىسىندا، سەسسيانى قورىتىندىلاپ بايانداما جاساعان ءماجىلىس ءتوراعاسى قابيبوللا جاقىپوۆ وسىلاي مالىمدەدى.

 ءماجىلىس سپيكەرىنىڭ ايتۋىنشا، زاڭ جوبالارىنىڭ مەملەكەتتىك جانە ورىس تىلدەرىندەگى ءتۇپ نۇسقالىعىنىڭ ساقتالماۋى ءالى كۇنگە دەيىن ۇلكەن پروبلەما بولىپ وتىر. بۇل رەتتە ءتوراعا ۇكىمەتكە پىسىقتاي ءتۇسۋ ءۇشىن كەرى قايتارىلعان 13 زاڭ جوباسىنىڭ 10ى وسى سەبەپتەن ورىن العانىن اتاپ ءوتتى.

«تاۋەلسىزدىك جىلدارىندا 2,5 مىڭعا جۋىق زاڭ قابىلداندى. ءبىراق وسى 23 جىلدىڭ ىشىندە ۇكىمەت ءبىر دە ءبىر زاڭ جوباسىنىڭ باستاپقى ءماتىنىن مەملەكەتتىك تىلدە ازىرلەمەگەن. ال دەپۋتاتتار مەملەكەتتىك تىلدە ازىرلەنگەن تەك 2 زاڭ جوباسىنا باستاماشىلىق جاساعان. ەلباسى ايتقانىنداي، بۇل ماسەلەنى شۋلاماي، ساياسي ديسكۋسسياعا اينالدىرماي ءار ازامات ۇيدە دە، جۇمىسىندا دا، قوعامدىق ورىنداردا دا قازاق تىلىندە سويلەۋدى پارىز رەتىندە ساناپ، ءتىلىمىزدىڭ كۇندەلىكتى قولدانۋىنا ۇلەسىن قوسا وتىرىپ جۇزەگە اسىرعان ورىندى»، - دەدى ءماجىلىس سپيكەرى قابيبوللا جاقىپوۆ.

بۇل رەتتە پالاتا ءتوراعاسى پارلامەنتتە زاڭ جوبالارى مەملەكەتتىك تىلدە ازىرلەنىپ، قابىلدانسا، بۇل حالىقتىڭ مۇددەسىنەن شىعۋعا قوسقان زور ۇلەسى بولاتىنىن العا تارتتى. ونىڭ پايىمىنشا، قازىرگە دەيىن زاڭداردىڭ باستاپقى ءماتىنى ورىس تىلىندە جازىلىپ، سوڭىنان قازاق تىلىنە ساپاسىز اۋدارىلىپ كەلەدى. ال بۇعان قاتىستى مەملەكەتتىك ءتىلدى جەتىك مەڭگەرگەن زاڭگەرلەردىڭ، ءتۇرلى سالا ماماندار تاپشىلىعىنىڭ ازدىعى ايتىلادى.

«دەگەنمەن، ءبىرقاتار مالىمەتتەردى ايتايىن: ءبىلىم جانە عىلىم مينيسترلىگىنىڭ دەرەكتەرىنە قاراعاندا، 2013 - جىلى جوعارى وقۋ ورىندارىن قازاق تىلىندە بىتىرگەن تۇلەكتەر سانى بارلىق ماماندىقتار بويىنشا 85 مىڭنان استامدى قۇراعان. ال 2014 - جىلى بۇلاردىڭ سانى 89 مىڭنان اسىپ ءتۇستى. سونىمەن قوسا، سوڭعى 2 جىلدا قازاق تىلىندە 4 مىڭنان استام زاڭگەر جوعارۋ وقۋ ورىندارىن بىتىرگەن. ولاردىڭ بارلىعى قايدا سوندا؟ مەملەكەتتىك ورگاندار ءبىزدىڭ وسىنداي رەسۋرستارىمىزدى نەگە پايدالانبايدى؟ بۇل رەتتە دەپۋتاتتىق كورپۋس تىكەلەي ۇلگى كورسەتە وتىرىپ، مەملەكەتتىك تىلدە زاڭ جوبالارىن ازىرلەۋگە كىرىسەدى دەپ سەنەمىن. بۇل قازاق ءتىلىنىڭ دامۋىنا قوسىلعان زور ۇلەس بولار ەدى»، - دەدى سپيكەر ق. جاقىپوۆ.

اۆتور: قانات مامەتقازى ۇلى