پارلامەنت ءۇشىنشى سەسسيانى جاۋىپ، دەپۋتاتتىق كورپۋس كانيكۋلعا كەتتى

استانا. قازاقپارات - بۇگىن پارلامەنت پالاتالارىنىڭ بىرلەسكەن وتىرىسىندا بەسىنشى سايلانعان پارلامەنتتىڭ ءۇشىنشى سەسسياسى رەسمي تۇردە جابىلدى.

سوعان وراي، دەپۋتاتتار اعىمداعى جىلدىڭ 1 -قىركۇيەگىنە دەيىن پارلامەنتتىك كانيكۋل دەپ جاريالاناتىنى تۋرالى ارنايى قاۋلى قابىلدادى.

توقتالا كەتەيىك، ءۇشىنشى سەسسيا بارىسىندا پارلامەنتپەن 104 زاڭ قابىلدانىپ، اتالعان قۇجاتتاردىڭ سەكسەنگە جۋىعىنا مەملەكەت باسشىسىنىڭ قولى قويىلىپ، كۇشىنە ەنگەن. پارلامەنت قابىلداعان زاڭنامالاردىڭ نەگىزگى بولىگى ەلباسىنىڭ قازاقستان حالقىنا جولداۋلارىندا جۇكتەلگەن مىندەتتەردى زاڭنامالىق قولداۋعا باعىتتالدى. ەكونوميكالىق ينتەگراتسيانى قارقىندى ەتۋگە، مەملەكەتتەرمەن ءوزارا بايلانىستى نىعايتۋعا، حالىقارالىق قۇقىقتىق كەڭىستىككە كىرىگۋگە باعىتتالعان ءبىرقاتار حالىقارالىق كەلىسىمدەر دە راتيفيكاتسيادان ءوتتى. بۇلاردىڭ بارلىعى تۇتاستاي مەملەكەتتىڭ بەدەلىن ارتتىرۋعا، حالقىمىزدىڭ ءومىر ءسۇرۋ ساپاسىن كوتەرۋگە، ەل ەكونوميكاسىنىڭ دامۋ الەۋەتىن ۇدەتۋگە باعىتتالدى.

سەسسيانى قورىتىندىلاپ بىرلەسكەن وتىرىستا بايانداما جاساعان ءماجىلىس ءتوراعاسى قابيبوللا جاقىپوۆ بەسىنشى سايلانعان پارلامەنتتىڭ ءۇشىنشى سەسسياسىن تابىستى ءوتتى دەپ مالىمدەپ، زاڭ شىعارماشىلىعىنىڭ جۇمىسىنا اتسالىسقاندارعا العىسىن جەتكىزدى. «الداعى ۋاقىتتا دا دەپۋتاتتىق كورپۋس ءوز كۇشىن ءادىل زاڭدار قابىلداۋعا جۇمىلدىرادى دەپ سەنەمىن»، دەدى ول.

اۆتور: قانات مامەتقازى ۇلى