شۇعىل: گەنەرال باعدات مايكەيەۆكە قاتىستى سوت ۇكىمى شىقتى

الماتى. قازاقپارات - اسا ءىرى كولەمدە پارا العانى ءۇشىن ايىپتى دەپ تانىلعان قورعانىس ءمينيسترىنىڭ بۇرىنعى ورىنباسارى باعدات مايكەيەۆ التى جىلعا سوتتالدى. ۇكىمدى الماتىداعى قىلمىستىق ىستەر جونىندەگى مامانداندىرىلعان اۋدان ارالىق اسكەري سوت سۋدياسى اسقار قايىروۆ شىعاردى.

بۇل تۋرالى ق ر اسكەري سوتىنىڭ باسپا ءسوز قىزمەتى حابارلادى.

«سۋديا سوتتالۋشى باعدات مايكەيەۆتى قىلمىستىق كودەكستىڭ 251 - بابى 1- تارماعى، 311 - بابى 5 تارماعى بويىنشا كىنالى دەپ تاۋىپ، التى جىلعا باس بوستاندىعىنان ايىرۋ تۋرالى ۇكىم شىعاردى. سوتتالۋشىعا جازاسىن قاتاڭ رەجيمدەگى تۇزەۋ كولونياسىندا وتەۋ جازاسى كەسىلدى. سونداي-اق، وعان ءۇش جىلعا دەيىن مەملەكەتتىك قىزمەتكە ارالاسۋىنا تىيىم سالىندى»، - دەدى باسپا ءسوز قىزمەتى.

ال ەكس- شەنەۋنىككە اسا ءىرى كولەمدە پارا ۇسىندى دەپ ايىپتالعان ءۇش سوتتالۋشى پاۆەل تيتورەنكو، ولەگ سپيتسىن مەن التىنبەك قايىربايەۆ ق ر ق ك 312 - بابىنىڭ 5 تارماعى: «مەملەكەتتىك فۋنكتسيالاردى اتقارۋعا ۋاكىلەتتى ادامعا نە وعان تەڭەستىرىلگەن ادامعا تىكەلەي نەمەسە دەلدال ارقىلى پارا بەرۋ، لاۋازىمدى ادامعا پارا بەرۋ، سول سياقتى كورىنەۋ زاڭسىز ءىس-ارەكەت (ارەكەتسىزدىك) جاساعانى ءۇشىن پارا بەرۋ، جاۋاپتى مەملەكەتتىك لاۋازىم اتقاراتىن ادامعا پارا بەرۋ» بويىنشا ايىپتى دەپ تابىلىپ، ون جىلعا باس بوستاندىعىنان ايرىلدى.

سوت ۇكىمى زاڭدى كۇشىنە ەنگەن جوق. باسپا ءسوز قىزمەتىنىڭ ايتۋىنشا، مايكەيەۆتىڭ قورعاۋشىلارى اپەللياتسيالىق شاعىم ءتۇسىرۋدى كوزدەپ وتىر.

اۆتور: گۇلميرا عوسمانالي