ءماجىلىس سپيكەرى: ۇكىمەتتەن كەلىپ تۇسەتىن زاڭ جوبالارىنىڭ ساپاسى سىن كوتەرمەيدى

 استانا. قازاقپارات - ۇكىمەتتەن كەلىپ تۇسەتىن زاڭ جوبالارىنىڭ ساپاسى سىن كوتەرمەيدى. بۇگىن پارلامەنت پالاتالارىنىڭ بىرلەسكەن وتىرىسىندا، سەسسيانى قورىتىندىلاپ بايانداما جاساعان ءماجىلىس ءتوراعاسى قابيبوللا جاقىپوۆ وسىلاي مالىمدەدى.

 «زاڭ شىعارۋ قىزمەتى سالاسىندا بۇگىنگە دەيىن ءبىرقاتار قوردالانعان پروبلەمالار ءالى دە بارشىلىق. بىرىنشىدەن، بۇل جىل سايىن بايقالىپ وتىرعان ۇكىمەتتەن كەلىپ تۇسەتىن زاڭ جوبالارىنىڭ ءتيىستى دەڭگەيدەگى ساپاسىنىڭ بولماۋى. وتكەن كەزەڭدەرمەن سالىستىرعاندا ساپا ءبىرشاما جاقسارعان، الايدا جەتىلدىرۋ كوكجيەگىن ءالى دە بايقاي الماي وتىرمىز»، - دەدى سەسسيانى قورىتىندىلاپ نەگىزگى بايانداما جاساعان ءماجىلىس سپيكەرى قابيبوللا جاقىپوۆ.

ونىڭ ايتۋىنشا، پارلامەنتتىڭ بەسىنشى شاقىرىلىمىنىڭ جۇمىسى بارىسىندا ۇكىمەتتەن ماجىلىسكە 267 زاڭ جوبالارى ەنگىزىلگەن. ولاردىڭ 43 ءى زاڭ جوبالارىنا قاتىستى تالاپتاردىڭ ورىندالماۋىنا وراي، كەرى قايتارىلدى. ءۇشىنشى سەسسيا بارىسىندا ۇكىمەت ەنگىزگەن 114 زاڭ جوبالارىنىڭ 38 پايىزى عانا تالاپتارعا تولىعىمەن ساي كەلگەن.

«مۇنداعى ايقىن پروبلەمالاردىڭ ءبىرى ۆەدومستۆوارالىق كەلىسىمنىڭ بولماۋىندا. ءپروفيلدى مەملەكەتتىك ورگاندارمەن ازىرلەنگەن زاڭ جوبالارى باسقا ۆەدومستۆولارمەن نەمقۇرايدى، ات ءۇستى كەلىسىلە سالادى. ماجىلىستەگى جۇمىس توپتارىنىڭ اياسىندا عانا ناقتى جاعدايعا تياناقتى ساراپتار جاسالىپ، قانداي دا ءبىر نورمانى قابىلداۋدىڭ سالدارىنا باعا بەرىلۋدە. سونىڭ ناتيجەسىندە قۇجات 70-80 پايىزعا دەيىن، جەكەلەگەن جاعدايلاردا تۇتاستاي قايتا جازىلىپ ءجۇر. مىسالى، «دەربەس دەرەكتەر تۋرالى»، «ىشكى ىستەر ورگاندارى تۋرالى»، «قارجى پيراميدالار قىزمەتىنە قارسى ءىس-ارەكەتتەر تۋرالى» زاڭ جوبالارى تۋرا سولاي جاسالعان. ال «ازاماتتىق قورعانىس تۋرالى» زاڭ جوباسىن دەپۋتاتتار تۇتاستاي قايتا جازىپ شىقتى. بۇل رەتتە دەپۋتاتتار قۇجاتتىڭ ىلەسپە زاڭ جوباسىنا سۋ بوگەتتەرىنىڭ قاۋىپسىزدىگىن قامتاماسىز ەتۋدى رەتتەيتىن باپتى تۇتاس ەنگىزدى»، - دەيدى سپيكەر ق. جاقىپوۆ.

  سونىمەن قاتار، ءماجىلىس ءتوراعاسى ۇكىمەت تاراپىنان ازىرلەۋشىلەر ءوزىمىزدىڭ ۇلتتىق زاڭنامانى ەسكەرمەي، شەتەلدىك زاڭ نورمالارىن تولىق كوشىرە سالاتىنىن دا سىنعا الدى. ونىڭ سوزىنە قاراعاندا، «دەربەس دەرەكتەر تۋرالى» زاڭ جوباسىنىڭ كوپتەگەن نورمالارى ت م د- داعى ءبىر ەلدىڭ زاڭ نورمالارىن تۇتاستاي قايتالاپ شىققان.

«ال وسىنىڭ ءوزى ءبىزدىڭ ۇلتتىق زاڭنامامىزعا، ونىڭ ىشىندە قازاقستاننىڭ 7 كودەكسى مەن 27 زاڭىنا قايشى كەلگەن. ناتيجەسىندە دەپۋتاتتارعا زاڭ جوباسىن تولىعىمەن قايتا دايىنداۋعا تۋرا كەلدى»، - دەدى سپيكەر.

اۆتور: قانات مامەتقازى ۇلى