ۇلتتىق عارىش ورتالىعى العاشقى عيماراتىنىڭ قۇرىلىسى كەلەسى ايدا اياقتالادى
بۇل تۋرالى بۇگىن ماجىلىستە قازاقستاندا عارىش سالاسىن قالىپتاستىرۋ تاقىرىبىنداعى ۇكىمەت ساعاتىندا ق ر ۇلتتىق عارىش اگەنتتىگىنىڭ ءتوراعاسى تالعات مۇسابايەۆ مالىمدەدى.
«ورتالىقتا جەردى قاشىقتىقتان زوندتاۋ عارىشتىق جۇيەسىنىڭ جەرۇستى سەگمەنتى ورنالاسادى. بۇل ارقىلى جەردى قاشىقتىقتان زوندتاۋ سپۋتنيكتەرى باسقارىلادى جانە وسى سپۋتنيكتەردەن الىنعان مالىمەتتەر وڭدەلەدى» ، - دەدى ت. مۇسابايەۆ.
ونىڭ سوزىنە قاراعاندا، قازاقستان مەن فرانتسيا اراسىنداعى كەلىسىمشارتتار اياسىندا جەردى زوندتاۋ عارىشتىق جۇيەسىن قۇرۋ بويىنشا 45 قازاقستاندىق ينجەنەر- مامان فرانسيا مەن يتاليادان تولىق كۋرستىق تاعىلىمدامادان وتكەن. ولار عارىش اپپاراتتارىن باسقارۋمەن، جوبالاۋمەن، مالىمەتتەردى الۋدى قامتاماسىز ەتۋمەن جانە الىنعان مالىمەتتەردى وڭدەۋمەن اينالىسادى.
«وسىلايشا، ءوزىمىزدىڭ عارىش اپپاراتتارىنىڭ بولۋى، سونىمەن قاتار، ولاردان الىنعان مالىمەتتەردى وزدەرىمىزدىڭ بىلىكتى مامانداردىڭ وڭدەپ، كادەگە جاراتۋى الەمدىك نارىقتاعى وسىنداي ونىمدەر ءۇشىن جۇمسالاتىن قاراجاتتى ەكى ەسەگە تومەندەتۋگە مۇمكىندىك بەرەدى. ال جەردى قاشىقتىقتان زوندتاۋ عارىشتىق جۇيەسى قازاقستاننىڭ ەكسپورتتىق الەۋەتىن جىلىنا 6,5 ميلليارد تەڭگەگە ارتتىرادى. ءبىزدىڭ الداعى مىندەتىمىز وسى جۇيەنىڭ تيىمدىلىگىن ارتتىرۋ» ، - دەدى اگەنتتىك باسشىسى.
«ءسوزسىز، عارىش قىزمەتىن دامىتۋ - ءبىر كۇننىڭ جۇمىسى ەمەس. الايدا، قازاقستان تاريحىندا العاش رەت ءۇش عارىش اپپاراتىنىڭ بىرىنەن سوڭ ءبىرى ۇشىرىلعانىن ەسكەرسەك، وندا ءبىز وتاندىق عارىش سالاسىنىڭ نەگىزىن قالاي الدىق دەپ سەنىممەن ايتۋعا بولادى. سونىڭ ىشىندە بۇل جەتىستىكتەردىڭ بارلىعى اينالدىرعان 7 جىلدىڭ ىشىندە ورىن الىپ وتىر. دەگەنمەن، قازاقستاننىڭ عارىش سالاسى ودان ءارى دامي بەرەدى، الدىنا ءورشىل مىندەتتەر قويىپ، ونى جۇزەگە اسىرۋ ارقىلى ءبىز عارىش قىزمەتى مەن ونىمدەرىن ۇسىناتىن الەمدىك كوشباسشىلار قاتارىنا ەنگىمىز كەلەدى» ، - دەدى ت. مۇسابايەۆ.
ونىڭ ايتۋىنشا، عارىش سالاسى قىزمەتىنىڭ كوپقىرلىلىعى مەن كۇردەلىلىگىن ەسەپكە الساق، بۇل سالانى دامىتۋدا عارىشتىق تەحنيكا مەن تەحنولوگيانى قۇرۋ سالاسىنداعى الەمنىڭ كوشباسشىلارىمەن ىنتىماقتاستىق ورناتۋ اسا ماڭىزدى. بۇل باعىتتا دا قازاقستاندىق عارىش سالاسى از جۇمىس اتقارماعان.
«ماسەلەن، ۇلتتىق عارىش اگەنتتىگى رەسەي فەدەراتسياسى، ۋكراينا، يزرايل، فرانسيا، قىتاي حالىق رەسپۋبليكاسى، ءۇندىستان، جاپونيا، گەرمانيا، كورەيا رەسپۋبليكاسى، بىرىككەن اراب امىرلىكتەرى، تايلاند كورولدىگى، ۇلى بريتانيا، شۆەتسيا، نيدەرلاندى كورولدىگى سەكىلدى ەلدەرمەن بايلانىستى جاڭعىرتىپ كەلەدى. وسى ەلدەرمەن ىنتىماقتاستىقتى نىعايتا ءتۇسۋ، حالىقارالىق ىنتىماقتاستىق اۋقىمىن كەڭەيتۋ ماقساتىندا جۇمىس جالعاسا تۇسپەك» ، - دەدى اگەنتتىك باسشىسى.
اۆتور: قانات مامەتقازى ۇلى