مەملەكەتتىك قىزمەتشىلەرگە قازاق ءتىلىن مەڭگەرۋ مىندەتتەلەدى - مادەنيەت ءمينيسترى
بۇل تۋرالى بۇگىن ورتالىق كوممۋنيكاتسيالار قىزمەتىندە وتكەن بريفينگتە ق ر پرەمەر- ءمينيسترىنىڭ ورىنباسارى گۇلشارا ءابدىحالىقوۆا ءمالىم ەتتى.
«قازىرگى ۋاقىتتا ساراپشىلار ايتىپ وتىر، مەملەكەتتىك ءتىلدى مەڭگەرۋدە قازاقستان حالقىنىڭ 62-63 پايىزى قازاق ءتىلىن، 92 پايىزى - ورىس جانە 16,6 پايىزى اعىلشىن ءتىلىن مەڭگەرگەن. ەلباسىنىڭ قويىپ وتىرعان ساياساتى - ەلىمىزدە ءۇش تۇعىرلى ءتىلدى دامىتۋ. وسىعان بايلانىستى بۇگىن ۇكىمەت وتىرىسىندا باعدارلامانىڭ ورىندالۋ بارىسى تالقىلاندى»، - دەپ اتاپ ءوتتى ول.
بريفينگە قاتىسقان ق ر مادەنيەت ءمينيسترى ارىستانبەك مۇحامەدي ۇلى باعدارلاما اياسىندا جاسالعان جۇمىستاردىڭ ناقتى كورسەتكىشتەرىنە توقتالدى.
«ەسەپتى كەزەڭدە مەملەكەتتىك ءتىلدى دامىتۋ مەن قولدانۋعا باعىتتالعان ءبىرقاتار جۇمىس اتقارىلدى. اتاپ ايتقاندا، قازتەست جۇيەسىن جەتىلدىرۋ بويىنشا مەملەكەتتىك ءتىلدى وقىتۋعا ارنالعان 5 دەڭگەيدەن تۇراتىن وقۋ- ادىستەمەلىك كەشەن ازىرلەندى.
سونىمەن قاتار ەلىمىزدىڭ بارلىق تىلدەردى وقىتۋ ورتالىقتارىنا تاراتىلدى. ەندىگى كەزەكتە مەملەكەتتىك قىزمەتشىلەرگە قازاق ءتىلىن مەڭگەرۋدى مىندەتتەگەن دۇرىس. مۇنى 2015 - جىلدان باستاپ ورتالىق جانە جەرگىلىكتى اتقارۋشى ورگانداردىڭ ستراتەگيالىق جوسپارلارىنا ساتىلى تۇردە قازتەست جۇيەسىن ەنگىزۋ ارقىلى شەشەمىز»، - دەپ اتاپ ءوتتى مينيستر.
ونىڭ ايتۋىنشا، قازىرگى ۋاقىتتا ەلىمىزدە 351 ءتىل وقىتۋ ورتالىقتارى بار. بۇل سالاعا جەكە كاسىپكەرلەردىڭ قىزىعۋشىلىعى دا ارتقان.
اۆتور: جاسۇلان جولدىبايەۆ