ءبىلىم ءمينيسترىنىڭ ءوزى دە بىلمەيتىن سۇراق

استانا. قازاقپارات - تۇلەكتەرگە تەستتە قويىلعان «الماتىداعى سىرا زاۋىتى قاشان اشىلدى؟» دەگەن ساۋالدىڭ جاۋابىن ءبىلىم ءمينيسترىنىڭ ءوزى بىلمەيتىن بولىپ شىقتى.

اسلان ءسارىنجىپوۆ بۇگىن «قىزىق سۇراققا» جاۋاپ تابا الماي قينالدى.

كۇنى كەشە ۇلتتىق ءبىرىڭعاي تەستىلەۋگە قاتىسقان وقۋشىلاردىڭ اتا-انالارى، مازمۇنسىز ساۋالدار سالدارىنان بالالارىمىزدىڭ باعى بايلاندى دەپ شۋ شىعارعان ەدى.

ال، ءبىلىم ءمينيسترى بولسا، تۇسىنىكسىز ساۋالدار بويىنشا «اپپەلياتسيالىق كوميسسياعا شاعىمدانسىن» دەپ قۇتىلدى.

ۇلتتىق ءبىرىڭعاي تەستىلەۋدىڭ العاشقى 2 كۇنىندە 10 مىڭنان استام تۇلەك سىناقتان وتە الماي ءسۇرىندى. ولار ەڭ تومەنگى شەكتى بالدى جيناي الماعان. اتا-انالار بالالارىنىڭ بارىنە ءبىلىم مينيسترلىگىن ايىپتاپ وتىر. تەست تاپسىرمالارىنداعى قيسىنىز سۇراقتاردىڭ سالدارىنان بالالاردىڭ ميى اشىپ، بىلگەنىن دالەلدەي المادى دەپ اشىندى...

مارات جۇنىسقاليەۆ، اتا-انا:

- وقىپ وتىرعاندا قارايمىن عوي. «الماتىنىڭ سىرا زاۋىتى قاشان اشىلدى؟» دەيدى. ەكىنشى ماحامبەتتىڭ رۋى كىم؟ ول بالالارعا رۋشىلدىققا سالىنبايمىز دەگەنىمىز قايدا؟ جۇزگە بولىنبەيمىز دەگەنىمىز قايدا؟

بۇل كەشە اتىراۋدا بولعان جاعداي. اتا-انالار الماتىداعى سىرا زاۋىتىنىڭ قاشان سالىنعانىن وقۋشىلاردىڭ ءبىلۋى قانشالىقتى ماڭىزدى دەپ اشۋلى. تالاپكەرلەردىڭ ءبىلۋى مىندەتتى بولعان ساۋالدىڭ جاۋابىن بۇگىن ءبىلىم ءمينيسترى اسلان ءسارىنجىپوۆتىڭ وزىنەن سۇراپ كوردىك.

مينيسترگە سۇراق:

- ءسىز ءوزىڭىز بىلەسىز بە الماتىداعى سىرا زاۋىتىنىڭ قاشان اشىلعانىن؟

- ءبىر كۇننىڭ ىشىندە نەمەسە ەكى كۇننىڭ ىشىندە اپپەلياتسياعا كەلىپ، سول سۇراققا.

- نەت ۆى نە وتۆەچاەتە نا ۆوپروس...

ۇلتتىق ءبىرىڭعاي تەستىلەۋدە تالاپكەرلەرگە بەرىلگەن سۇراقتاردىڭ سوراقىلىعى جالعىز بۇل ەمەس. 2004 - جىلى ەڭ العاشقى سىناقتا وقۋشىلار ابىلاي حاننىڭ شاپانىندا نەشە تۇيمە بار ەكەنىن بىلمەي دال بولعان ەدى. سول شۋدان كەيىن تەست سۇراقتارىنان 300 دەن استام تاپسىرمانى قيسىنسىز دەپ مينيسترلىكتىڭ ءوزى الىپ تاستادى. الايدا، مۇنداي بىلىقتار ۇلتتىق ءبىرىڭعاي تەستىلەۋ باستالعان 10  جىل ىشىندە بىرنەشە رەت قايتالاندى.

اسلان ءسارىنجىپوۆ، ق ر ءبىلىم جانە عىلىم ءمينيسترى:

بيىل 50 مىڭنان استام سۇراق بار. ول سۇراقتاردى ارنايى كوميسسيا، ارنايى جۇمىس توپتارى، ساراپشىلار دايىندايدى. سۇراقتار تۋرالى سۇراقتار بولسا اپپەلياتسيالىق كوميسسياعا كەلىپ، وقۋشىلار ءوز پىكىرىن ايتا الادى.

مۇنىڭ سىرتىندا الەۋمەتتىك جەلىلەردە وقۋشىلار سىناقتى ۇيالى تەلەفونداعى ۆاتساپ ارقىلى تاپسىرىپ شىقتى دەگەن مالىمەت قاپتاپ كەتتى. جوعارى كورسەتكىشكە جەتۋ ءۇشىن جانتالاسقان مۇعالىمدەر تەست جاۋاپتارىن تىكەلەي تالاپكەرلەرگە لاقتىرىپ وتىرعان. ءتىپتى، وقۋشىلاردىڭ وزدەرى سىناقتاعى ساۋالداردىڭ دۇرىس جاۋاپتارىمەن قوسىپ عالامتورعا جاريالاپ جاتىر.

الايدا، مينيستر بۇل وقيعالاردى جايباراقات قابىلداپ، سىرعىتپا جاۋاپپەن قۇتىلدى...

مينيسترلىكتىڭ مالىمەتىنە سۇيەنسەك، مەملەكەتتىك سىناقتىڭ 2 كۇنىندە تۇلەكتەردەن 8 مىڭنان استام ۇيالى تەلەفون مەن 5 مىڭداي شپارگالكا الىنىپتى. ال، تەلەفوندارىن بەلدىگىنە قىستىرىپ، تەكسەرۋدەن ءوتىپ كەتكەندەر تۋرالى ارينە، مالىمەت جوق. دەگەنمەن، دارمەنسىزدىگىن مويىنداعان مينيستر اسلان ءسارىنجىپوۆ قالعان ۋاقىتتا وقۋشىلاردان تىيىم سالعان قۇرىلعىلاردى پايدالانباڭدار دەپ ءوتىنىپ سۇراۋدان اسا المادى.

باقىتنۇر ءالىباي، نۇركەن توقمۋرزين.

 

31.kz