تۇركى تىلدەس مەملەكەتتەردىڭ ىنتماقتاستىق ۇدەرىسى ەۋرازيالىق ەكونوميكالىق وداق مۇددەسىنە قايشى كەلمەيدى - ن. نازاربايەۆ

بودرۋم. قازاقپارات - تۇركى تىلدەس مەملەكەتتەردىڭ ينتەگراتسيالىق ۇدەرىسى كەدەن وداعى مەن ەۋرازيالىق ەكونوميكالىق وداق مۇددەسىنە قايشى كەلمەيدى.

بۇل تۋرالى كەشە تۇركى تىلدەس مەملەكەتتەر ىنتىماقتاستىعى 4- سامميتىنىڭ قورىتىندىسى بويىنشا جۋرناليستەرگە سۇحبات بەرگەن ق ر پرەزيدەنتى نۇرسۇلتان نازاربايەۆ ءمالىم ەتتى، دەپ حابارلادى قازاقپارات ءتىلشىسى سەرىك سابەكوۆ.

«مەن، بىزدەرگە تۇركى تىلدەس مەملەكەتتەردىڭ ينتەگراتسيالىق ۇدەرىستەرىن دامىتۋ قاجەت دەپ سانايمىن. بۇل قالاي بولعاندا دا كەدەن وداعى مەن ەۋرازيالىق ەكونوميكالىق وداق مۇددەسىنە ەش قايشى كەلمەيدى. ويتكەنى، بۇل دا ەشقانداي ساياسي رەڭكى جوق ەكونوميكالىق ءوزارا بايلانىس» ، - دەدى ن. نازاربايەۆ.

سونىمەن قاتار مەملەكەت باسشىسى قازاقستان مەن تۇركيا تاۋار اينالىمىنىڭ كولەمى 4 ميلليارد  ا ق ش دوللارىنا جەتكەنىن، بۇل ساندى ارتتىرا تۇسۋگە ءالى دە الەۋەت بار ەكەندىگىن باسا ايتتى.

 قازاقستان پرەزيدەنتى كەلەسى جىلى قازاقستاننىڭ گرۋزيا ارقىلى تۇركياعا شىعۋىنا مۇمكىندىك بەرەتىن تەمىر جول قۇرىلىسىنىڭ اياقتالاتىندىعىن ەسكەرتىپ ءوتتى. ەلباسى ۇلى جىبەك جولىنىڭ قايتا جاڭعىرۋى جانە كولىك ينفراقۇرىلىمىنىڭ قۇرىلۋى ارقاسىندا تۇركيانىڭ قازاقستان ارقىلى قىتايعا شىعۋ مۇمكىندىگىنە يە بولعاندىعىن ايتتى.

ن. نازاربايەۆ سونىمەن بىرگە تۇركى تىلدەس مەملەكەتتەردىڭ ءوزارا مادەني- گۋمانيتارلىق قارىم- قاتىناستارىن ودان ارى دامىتۋ قاجەتتىگىنە دە توقتالدى. «مۇنىڭ بارلىعى ءبىزدىڭ ەلدەرىمىزدىڭ يگىلىگىنە قىزمەت ەتەدى» ، - دەدى قازاقستان كوشباسشىسى.

ق ر پرەزيدەنتى تۇركى الەمىن ۇلى جىبەك جولىن ءتيىمدى پايدالانۋعا شاقىرادى.

«جاڭا عاسىردا ۇلى جىبەك جولىن جاڭعىرتۋ مۇمكىندىگى تۋىپ وتىر. تۇركى الەمى وسىناۋ گەوساياسي مۇمكىندىكتى پايدالانىپ قالماسا ۇلكەن قاتەلىك بولادى» ، - دەدى ن. نازاربايەۆ.

 مەملەكەت باسشىسى قازاقستان «باتىس ەۋروپا- باتىس قىتاي» كولىك ءدالىزىنىڭ قۇرىلىسىن اياقتاعالى جاتقانىن تىلگە تيەك ەتتى. تۇركىمەنستان مەن يران اۋماعىمەن وتەتىن تەمىر جول ەنگىزىلەدى. ول پارسى شىعاناعىنا شىعۋعا جول اشادى. «سونىمەن قاتار، اقتاۋ تەڭىز پورتىنىڭ وتكىزۋ قۋاتىن ارتتىرۋدى جوسپارلاپ وتىرمىز. وسىعان وراي، اقتاۋ، باكۋ جانە سامسۋن پورتتارىنىڭ ىقپالداستىعىن نىعايتۋ ماڭىزدى» ، - دەدى ن. نازاربايەۆ.

ق ر پرەزيدەنتى قازاقستان اۋماعىنان كاسپي تەڭىزىنە دەيىن وتەتىن، ۇزاقتىعى 1500 شاقىرىم بولاتىن تەمىر جول قۇرىلىسى كەلەسى جىلى اياقتالاتىنىنا توقتالىپ ءوتتى.

 سونداي- اق مەملەكەت باسشىسى وتكەن اپتادا استانادا ەۋرازيالىق ەكونوميكالىق وداق قۇرۋ تۋرالى شارتقا قول قويىلعانى تۋرالى حابارلادى.

«قازاقستاندا بىرلەسكەن كاسىپورىندار قۇرۋ ارقىلى تۇركى مەملەكەتتەرىنىڭ ىسكەرلىك وكىلدەرى جالپى سانى 170 ميلليونعا جەتىپ وتىرعان حالىقپەن نارىققا شىعا الادى» ، - دەدى ن. نازاربايەۆ.

پرەزيدەنت، سونداي- اق قازاقستان «ەكسپو-2017» كورمەسىن وتكىزۋدى جوسپارلاپ وتىرعانىن ەسكە سالىپ ءوتتى جانە تۇركى مەملەكەتتەرى ءۇشىن «جاسىل ەكونوميكا» جانە «بولاشاق ەنەرگياسى» كورمەلەرىنىڭ تاقىرىبى ماڭىزدى ەكەنىن ايتتى.

اۆتور: مارلان جيەمباي