كوكشەتاۋ مينەرالدى تابيعي سۋى شەتەل نارىعىن جاۋلاپ الدى
تاۋەلسىزدىكپەن قۇرداس كاسىپورىن 23 جىلدان بەرى باسەكەلەستىكتىڭ بەل ورتاسىندا كەلەدى. سان مەن ساپانى قاتار ۇيلەستىرگەن مينەرالدى سۋ زاۋىتى رەسەيدىڭ 5 وبلىسىنا وتاندىق ءونىم شىعارادى.
ەندى ەۋرازيالىق ەكونوميكالىق وداق كەڭىستىگىن وتاندىق ونىممەن قامتۋعا قۇلشىنىس تانىتىپ وتىر. وتاندىق ءونىمنىڭ كوش باسىنان كوكشەتاۋدىڭ تابيعي سۋى تۇسكەن ەمەس. وسىدان 3 جىل بۇرىن ومبى قالاسىندا العاشقى وكىلدىگى قۇرىلعان. ال قازىر نيجنيي نوۆگورود، سانكت- پەتەربور، نيجنيەۆارتوۆسك قالالارىندا قازاقستاندىق سۋسىندار سامساپ تۇر. بىرتە- بىرتە تاۋار تۇرلەرى كوبەيىپ، سۋمەن قاتار ءتاتتى سۋسىندار، گازدالعان الكوگولسىز ىشىمدىكتەر، سالقىن شاي رەسەي نارىعىن جاۋلاپ الدى.
«كەدەندىك وداق مەملەكەتتەرى اراسىندا قازاقستاندىق ءونىمنىڭ باسەكەلەستىگىن ارتتىرۋ ءۇشىن الدىمەن تۇتىنۋشىلاردىڭ جۇرەگىن جاۋلاي ءبىلۋ كەرەك. ءونىمنىڭ ساپالىلىعى مەن ارتۇرلىلىگى ەكسپورتتىڭ سۇرانىسىن ارتتىرادى. بيىل كوكشەتاۋ مينەرالدى سۋ زاۋىتىنا 23 جىل تولدى. ۇنەمى جاڭعىرۋ، جاڭالانۋ ۇستىندە. تازا تابيعي سۋدىڭ ساپاسىن جوعالتپاۋ ءۇشىن جەر قويناۋى دا ءجىتى زەرتتەلىپ، جاڭا شيكىزات قورلارى اشىلۋدا. بولاشاقتا كوكشەتاۋدىڭ سۋىن كوسموس ستانتسيالارىندا قولدانۋ جوسپارى بار» ، - دەيدى كاسىپورىن پرەزيدەنتى الەكساندر سامويلوۆ.
كاسىپورىننىڭ عىلىم جونىندەگى ۆيتسە- پرەزيدەنتى ەۆگەني پياتوۆتىڭ ايتۋىنا قاراعاندا، كاسىپورىن 1991 - جىلدان باستاپ كوپتەگەن زەرتتەۋ ينستيتۋتتارىمەن بىرلەسىپ جۇمىس ىستەيدى. تابيعي سۋدىڭ ساپاسىن ۇستاپ تۇرۋ ءۇشىن گەرمانيانىڭ فرەزەنيۋسا، ۋكراينانىڭ ودەسسا جانە رەسەيدىڭ كۋرورتولوگتارىمەن عىلىمي زەرتتەۋ باعىتاندا اقىلداسىپ وتىراتىن كورىنەدى.
«مەن جۇمىس ىستەگەن 4 جىلدىڭ ىشىندە زاۋىت بىرنەشە رەت جاڭعىرتۋدان ءوتتى. سوعان ساي مۇنداعى مامانداردى دا الماتىعا ارنايى جىبەرىپ، جاڭا تەحنولوگيالاردى ۇيرەتتى. سونداي- اق بىزدە بىلىكتىلىكتى ارتتىرۋ ءۇشىن ارنايى ەمتيحان قابىلدانادى. جۇمىس قابىلەتىنە قاراي جالاقى دا ءوسىپ وتىرادى. مىڭنان اسا ادامدى جۇمىسپەن قامتىپ وتىرعان كاسىپورىن بيىل تاعى ءبىر جاڭا جەلىنى ىسكە قوستى. بۇل جەردە تەك ەكسپورتقا شىعاتىن الكوگولسىز سۋىسىندار دايارلانادى» ، - دەيدى زاۋىت وپەراتورى ارداق عازيزوۆ.