مەن قازاقستان زاڭناماسىندا نەنى وزگەرتەر ەدىم؟

استانا. قازاقپارات - بۇگىن پارلامەنت ماجىلىسىندە «مەن قازاقستان زاڭناماسىندا نەنى وزگەرتەر ەدىم؟ نەگە؟ بۇل ەلىمىزگە نە بەرەدى؟» اتتى رەسپۋبليكالىق كونكۋرستىڭ جەڭىمپازدارىن سالتاناتتى ماراپاتتاۋ ءراسىمى بولىپ ءوتتى.

قازاقستان رەسپۋبليكاسى پارلامەنتى ءماجىلىسى ءتوراعاسىنىڭ ورىنباسارى داريعا نازاربايەۆا جانە قازاقستانداعى ءىرى اقپاراتتىق پورتال «Zakon.kz» باستاماشىلىعىمەن وتكەن كونكۋرستىڭ باس جۇلدەسى گۇلجازيرا اقتورە قىزى يلياسوۆاعا بۇيىرىپ، ول 1,5 ميلليون تەڭگەگە يە بولدى.

ەستەرىڭىزگە سالا كەتەيىك، كاسىبي زاڭگەرلەردىڭ ازاماتتىق زاڭ شىعارماشىلىعى باستاماشىلىعىن دامىتۋعا ارنالعان العاشقى كونكۋرس 11 - ناۋرىزدا باستالىپ، 11 - مامىردا اياقتالعان بولاتىن.

وسى ۋاقىت ارالىعىندا رەسپۋبليكا بويىنشا ءتۇرلى سالا يەلەرىنەن مىڭنان استام جۇمىس كەلىپ تۇسكەن. «ەكى اي ىشىندە ءبىز ءوزىمىز كۇتپەگەن ناتيجەنى كورىپ وتىرمىز. از عانا ۋاقىتتا ارى كەتسە 100 گە تارتا ءوتىنىش بولادى دەپ ويلاعان ەدىك، ال مىڭنان استام جۇمىس - بۇل ەكى اي ىشىندە عانا جۇزەگە اسىپ وتىر ءارى ازاماتتىق قوعامنىڭ زور ىنتاسىن كورسەتەدى. ال كونكۋرس ءبىر جىلعا جالعاسسا، وندا ءبىز يدەيا مەن ۇسىنىستاردان باس الا الماي قالاتىن ەدىك»، - دەيدى ءماجىلىستىڭ ۆيتسە-سپيكەرى داريعا نازاربايەۆا.

ونىڭ ايتۋىنشا، سايىسقا نەگىزىنەن 10 نان استام عىلىم دوكتورلارى، 30 عا جۋىق كانديداتتار قاتىسقان. ولاردىڭ باسىم كوپشىلىگى زاڭگەرلەردەن (90 پايىز)، ەكونوميستەردەن (8 پايىز)، قالعانى - ينجەنەرلەر، دارىگەرلەر، پەداگوگتارسىندى باسقا دا ماماندىق يەلەرىنەن تۇرادى.

سونىمەن ساراپشىلاردىڭ قورىتىندىسى بويىنشا «مەن قازاقستان زاڭناماسىندا نەنى وزگەرتەر ەدىم؟ نەگە؟ بۇل ەلىمىزگە نە بەرەدى؟» اتتى رەسپۋبليكالىق كونكۋرستىڭ باس جۇلدەسى «قازاقستانداعى زاڭنامانى مەملەكەتتىك تىلگە ساپالى اۋدارۋداعى وزەكتى ماسەلەلەر» اتتى جۇمىس اۆتورى گۇلجازيرا اقتورە قىزى يلياسوۆاعا بۇيىرىپ، ول 1,5 ميلليون تەڭگەگە يەلەندى. ەكىنشى ورىندى «قازاقستاندىقتاردىڭ الەۋمەتتىك-قۇقىقتىق ءومىر ساپاسىن جاقسارتۋ: جەڭىلدىكتەر مەن شارتتار» اتتى ەڭبەكتىڭ اۆتورى ابرامەنكو ولەسيا يۋريەۆنا ەنشىلەدى. وعان اقشالاي سىيلىق رەتىندە 1 ميلليون تەڭگە بۇيىردى. ال ءۇشىنشى ورىن سيزوۆ الەكساندر سەرگەيەۆيچكە «ەنەرگوتيىمدىلىكتى ارتتىرۋدىڭ قاراپايىم تاسىلدەرى» اتتى ەڭبەگى ءۇشىن بەرىلدى. ونىڭ قانجىعاسىنا بايلانعان اقشالاي سىياقى 700000 تەڭگەنى قۇرادى.

وسىنداي جۇلدەلى ءۇش ورىننان باسقا ەلىمىزدىڭ الەۋمەتتىك-مادەني دامۋىن زاڭنامالىق رەتتەۋ، ازاماتتىق قۇقىق، اقپاراتتىق قۇقىق باعىتىنداعى ۇزدىك جۇمىستار اتالىمدارى بويىنشا دا سىيلىقتار تاعايىندالىپ، ماراپاتتاۋمەن قاتار اقشالاي ىنتالاندىرۋ جۇزەگە استى.

«بۇل رەسپۋبليكالىق كونكۋرس وعان قاتىسۋشىلاردىڭ قازاقستاندىق زاڭناما ماسەلەلەرىن جەتكىلىكتى بىلەتىندىكتەرىن كورسەتتى. دەمەك، سايىسكەرلەردىڭ تىڭ يدەياسى مەن ۇسىنىستارى زاڭ شىعارۋ جۇمىسىندا ماڭىزدى رول اتقاراتىن بولادى»، - دەدى داريعا نازاربايەۆا.

سايىسقا قاتىسۋشىلار نەگىزىنەن الەۋمەتتىك-ەكونوميكالىق دامۋ، ءبىلىم، دەنساۋلىق، وتباسى ينستيتۋىن نىعايتۋ تاقىرىپتارىن قامتي وتىرىپ، جەمقورلىقپەن كۇرەس، كاسىپكەرلىكتى قولداۋ، مەملەكەتتىك قىزمەت تۋرالى زاڭنامانى جەتىلدىرۋ، كونستيتۋتسيالىق قۇقىق سەكىلدى وزەكتى ماسەلەلەردى دە نازاردان تىس قالتىرماعان. ۇيىمداستىرۋشىلار رەسپۋبليكالىق كونكۋرستى جىل سايىن ءداستۇرلى تۇردە وتكىزىپ تۇرۋ تۋرالى ماسەلەنى دە كوتەرىپ وتىر.

 

اۆتور: قانات مامەتقازى ۇلى