ءۇندىستان، يران ەلدەرىنىڭ مۇراعاتتارىنان قازاق حاندارىنىڭ حاتتارى تابىلدى

استانا. قازاقپارات - «قازاق حاندارى مەن شىعىس بيلەۋشىلەرىنىڭ اراسىندا پارسى تىلىندە حات الماسۋلار بولعان.

ونى ءۇندىستان مەن يران مۇراعاتتارىنان تابىلعان سيرەك قولجازبالار راستايدى»، دەپ جازادى e-islam.kz.

ناقتىسىن ايتقاندا، «تاۋكە حان، قاسىمحان حان، جالاڭتوس باحادۇر جايلى بۇرىن-سوڭدى عىلىمي اينالىمعا تۇسپەگەن، ايتىلماعان دەرەك- قۇجاتتاردىڭ كوشىرمەلەرى قازاق جەرىندە ءبىر كەزدە ديپلوماتيالىق بايلانىستاردىڭ جوعارى دەڭگەيدە دامىعانىن دالەلدەيدى»،- دەيدى الماتىداعى شىعىس تانۋ ينستيتۋتىنىڭ قىزمەتكەرى عاليا قامباربەكوۆا.

«مۇنشا اتتىڭ ىشىنەن تاۆاكۋل حان دەگەندى كەزدەستىرىپ قالدىم. تاريحتىڭ ءتۇپ تامىرىنا ءۇڭىلۋ ءۇشىن جان-جاقتى زەرتتەي باستادىم. ناتيجەسىندە، تاۆاكۋل حان «قازاق» دەگەندى بىلدىرەتىنىنە كوزىم جەتتى»، - دەيدى ول.

وسى جايلى حابار تاراتقان «الماتى» تەلەارناسى اتالعان قۇجاتتاردىڭ ءۇندىستان، يران ەلدەرىنىڭ مۇراعاتتارىندا ساقتالعانىن العا تارتادى.

ەندى زەرتتەۋشىلەر كونە جازۋلاردى ارنايى ماماننىڭ كومەگىنە جۇگىنە وتىرىپ اۋدارۋدى كوزدەپ وتىر.