دۇنيەءجۇزى قازاقتارىنىڭ قاۋىمداستىعى ورالماندار ازاماتتىعىنا قاتىستى زاڭدى تەزدەتۋدى سۇرايدى
بۇل تۋرالى بۇگىن پارلامەنت ءماجىلىسى الەۋمەتتىك-مادەني دامۋ كوميتەتىنىڭ وتىرىسىندا دۇنيەءجۇزى قازاقتارىنىڭ قاۋىمداستىعى ءتوراعاسىنىڭ ورىنباسارى تالعات ماماشەۆ ءمالىم ەتتى.
وتىرىستا ەلىمىزدەگى ىشكى جانە سىرتقى كوشى-قون پروبلەمالارى تالقىلانعان بولاتىن.
«وتكەن جولى رەسەي قىرىمداعى جاعداي اياسىندا ازاماتتىق الۋعا قاتىستى زاڭدى ءبىر كۇننىڭ ىشىندە قابىلدادى. ول بويىنشا ءوتىنىش بەرگەن ادام ءبىر كۇننىڭ ىشىندە رەسەي ازاماتتىعىن الا الادى. بۇل ءبىز ءۇشىن دە اسا قاجەت تاجىريبە. ويتكەنى، قازاقستاننىڭ كوشى-قون تۋرالى زاڭناماسىن وزگەرتۋ ۇزاققا سوزىلىپ كەتۋى مۇمكىن» ، - دەدى ت. ماماشەۆ.
بۇل رەتتە قاۋىمداستىق وكىلى ورالماندار ماسەلەسىنە ارنالعان زاڭ جوباسىنىڭ ءسوزبۇيداعا سالىنىپ، ۇزاققا سوزىلىپ كەتپەۋىنە قاتىستى دەپۋتاتتارعا تىلەگىن ءبىلدىردى.
«ءماجىلىس دەپۋتاتتارىنان سۇرارىم، وسى زاڭ جوباسىن تەزدەتەيىك. كەزىندە ورالماندار ازاماتتىعىنا كەدەرگى جاسايتىن وسى زاڭدى دا ۋ- شۋسىز ءبىر كۇننىڭ ىشىندە قابىلدادىڭىزدار عوي، ەندەشە سونداعى ولقىلىقتى تۇزەتۋدى دە ءبىر ايدان اسىرماساق ەكەن»، - دەدى قاۋىمداستىق ءتوراعاسىنىڭ ورىنباسارى.
بۇدان بولەك، ت. ماماشەۆ ورالمانداردىڭ كوشى- قونىنا قاتىستى ماسەلە كوتەرىپ، اسىرەسە كوشى- قون پوليتسياسى تاراپىنان كەدەرگىلەر شاش ەتەكتەن ەكەنىن العا تارتتى.
«قازىر كەلىپ جاتقان ورالمانداردى قيناپ جۇرگەن كوشى-قون پوليتسياسى. شەتتەن كەلەتىندەر ءۇشىن كەدەرگىلەر بولعانىنا قاراماستان اتاجۇرتىنا اسىعاتىندار بارشىلىق. ال سولاردىڭ وزىنە ءتۇرلى انىقتامالاردى ءۇيىپ- توگىپ ساندالتۋدىڭ قاجەتى قانشا؟ «قىتايدان سوتتالماعانىڭ تۋرالى انىقتاما اكەل، تۇرعىلىقتى ورىننان ەسەپتەن شىققانىڭ تۋرالى انىقتاما كەرەك» دەگەن سەكىلدى اقىماق تالاپتاردى قويىپ، قانداستاردى جىلاتىپ جاتىر. ال ونداي تالاپ ەشبىر زاڭدا كورسەتىلمەگەن. مۇنى توقتاتۋىمىز كەرەك»، - دەدى ت. ماماشەۆ.
اۆتور: قانات مامەتقازى ۇلى