قازاقستان كەدەندىك وداقتاعى باسەكەلەستىكتە ۇتىلىپ جاتىر دەگەن مالىمدەمەلەرگە سەنۋدىڭ رەتى جوق - ب. ساعىنتايەۆ

 استانا. قازاقپارات - ق ر پرەمەر- ءمينيسترىنىڭ ءبىرىنشى ورىنباسارى، ينتەگراتسيا ماسەلەلەرى بويىنشا قازاقستاننىڭ ۇيلەستىرۋ كەڭەسىنىڭ ءتوراعاسى باقىتجان ساعىنتايەۆ قازاقستان كەدەندىك وداقتا باسەكەلەستىكتە ۇتىلىپ جاتىر دەگەن مالىمدەمەلەرگە سەنبەۋگە شاقىردى.

 «ساۋدا باسەكەلەستىگىندە ءبىز ۇتىلىپ جاتىرمىز دەگەن مالىمدەمەلەرگە سەنۋدىڭ رەتى جوق. بىزدە كونديتەرلىك ونىمدەر مەن شوكولادتىڭ ەكسپورتى ءۇش ەسەگە، ترانسفورماتورلار ەكسپورتى - 11 ەسەگە ارتتى، 17 ەسەگە رەسەي مەن بەلارۋس ەلدەرىنە شاعىن توننالىق جۇك كولىكتەرىنىڭ جەتكىزىلىمى جوعارىلادى. سونىمەن قاتار 16 پايىزعا سەمەنت ەكسپورتى ارتتى. بۇل كەيبىر مىسالدار عانا» ، - دەدى ۆيتسە- پرەمەر دەموكراتيالىق كۇشتەردىڭ «قازاقستان-2050» جالپى ۇلتتىق كواليتسياسىنىڭ وتىرىسى بارىسىندا.

 ونىڭ ايتۋىنشا، كەدەن وداعى قۇرىلعالى قازاقستاندىق تاۋارلاردىڭ ك و ەلدەرىنە ەكسپورتى 62,7 پايىزعا، ەكسپورتتىڭ جالپى كولەمىندە وڭدەۋشى تاۋارلاردىڭ ۇلەسى 44-تەن 54 پايىزعا ءوستى.

 «بۇل وتە جاقسى ءۇردىس جانە ءبىز ونى قولداپ وتىرامىز» ، - دەدى ب. ساعىنتايەۆ.

2013 - جىلى قازاقستاننىڭ رەسەيمەن جانە بەلارۋسپەن تاۋار اينالىمى 24 ميلليارد تەڭگەدەن استى. ال 2009 - جىلدان بەرى سەرىكتەس ەلدەرمەن تاۋار اينالىمى 88,3 پايىزعا ارتقان.

اۆتور: رۋسلان عابباسوۆ