اقتوبەدە ءاندى ىممەن ايتۋدان رەسپۋبليكالىق كونكۋرس باستالدى
شارانى قالالىق اكىمدىكتىڭ قولداۋىمەن اقتوبە قالاسىنىڭ مادەنيەت جانە تىلدەردى دامىتۋ ءبولىمى مەن قازاق ساڭىراۋلار قوعامىنىڭ جانىنان قۇرىلعان قالالىق مادەنيەت ءۇيى ۇيىمداستىردى.
- بۇل - شىعارماشلىقتىڭ ەرەكشە ءبىر ءتۇرى. وندا ساڭىراۋلار مەن قۇلاعىندا مۇكىسى بار ارتىستەر ىممەن، بەتتىڭ ميميكاسى جانە دەنەنىڭ پلاستيكاسىمەن ءاننىڭ مازمۇنى مەن ماعىناسىن جەتكىزەدى. وسىلايشا، ونى كورەتىن باسقا ساڭىراۋ كورەرمەندەر ءاننىڭ مۋزىكاسى مەن ءسوزىن ەستىمەي ونەردەن اسەر الادى، - دەيدى اقتوبە ساڭىراۋلار قوعامىنىڭ ءتورايىمى زينايدا تەلەۋشيەۆا.
بۇل جانر بويىنشا بايقاۋ ءۇش جىلدا ءبىر وتكىزىلەدى. بيىل وعان 66 ادام قاتىساۋدا، ولاردىڭ ءبارى ەستۋ بويىنشا مۇگەدەكتەر. ءاربىر ۇمىتكەر وندا «سولو» اتالىمىندا ءبىر شىعارمادان ورىندايدى. قاتىسۋشىلاردىڭ اراسىندا وسى جانردىڭ ارداگەرلەرى، «قازاق ساڭىراۋلار قوعامىنىڭ ەڭبەك سىڭىرگەن ءارتىسى» اتاعى بار الەكسەي نيكۋلين، الەكساندر لاپين، جاننا كيم بار.
ەرتەڭ بايقاۋدىڭ قورىتىندىسى شىعارىلادى. جەڭىمپازدار اقتوبە قالاسى اكىمىنىڭ جانە «قازاق ساڭىراۋلار قوعامى» ق ۇ ورتالىق باسقارماسىنىڭ ديپلومدارىمەن جانە اقشالاي سىياقىلارىمەن ماراپاتتالادى.