قۇداعيىن ولتىرگەن قاريا التى جىل «ارقالاپ» كەتتى
وبلىستىق سوتتىڭ باسپاءسوز قىزمەتىنەن تۇسكەن مالىمەتكە قاراعاندا، بۇل قاندى وقيعا بورلى اۋدانىنىڭ قاناي اۋىلىندا ورىن العان. جاسى جەتپىستىڭ بەسەۋىنەن اسقان اقساقال ءوزىنىڭ بىرگە تۇرىپ جاتقان ايەلى جانە قۇداعيىمەن اششى سۋدى ورتاعا الىپ، دۋمانداتىپ وتىرعان. اراققا ابدەن ماسايعان ايەلى ۇيىقتاۋعا ارعى بولمەگە بەت العاندا، بۇلار وتىرىستارىن جالعاستىرا بەرگەن. سول ارادا اڭگىمە بارىسىندا ەكەۋى سوزگە كەلىپ قالادى. شايتان سۋدىڭ اسەرىنەن كوزىنە جىن كورىنگەندەي، اتىپ تۇرىپ، پەشتىڭ جانىندا تۇرعان تەمىر كوسەۋدى الىپ، بايعۇس ايەلدىڭ باسىنان سەگىز رەت ۇرادى. باس سۇيەگىنەن وڭدىرماي جاراقات العان ايەل سول جەردە كوز جۇمادى.
سوتتالۋشىنىڭ ءوز كىناسىن مويىنداماۋىنا قاراماستان، ونىڭ قىلمىسى ناقتى دالەلدەرمەن، كۋاگەرلەردىڭ ايعاقتارىمەن، سوت مەديسينالىق ساراپتاما ناتيجەسىمەن تولىقتاي دالەلدەندى.
سونىمەن قاتار سوتتالۋشىعا جازا تاعايىنداۋدا سوت تاراپىنان ونىڭ جاس شاماسى مەن دەنساۋلىعى، العاش رەت قىلمىس جاساۋى، تۇرعىلىقتى جەرىنەن الىنعان قاناعاتتانارلىق مىنەزدەمەسى ەسكەرىلە كەلىپ، قازاقستان رەسپۋبليكاسى قىلمىستىق كودەكسىنىڭ 96-بابىنىڭ 1-ءبولىمى بويىنشا 6 جىل باس بوستاندىعىنان ايىرۋ جازاسىن تۇزەۋ كولونياسىنىڭ قاتاڭ رەجىمىندە وتەۋگە ۇكىم ەتىلدى.
اۆتور: ەلجان ەرالى