روزا مۇقان

روزا مۇقان 1964- جىلى 14- قازاندا شىعىس قازاقستان وبلىسى، ءۇرجار اۋدانى، كولدەنەڭ اۋىلىندا دۇنيەگە كەلگەن. 1987- جىلى قازاق مەملەكەتتىك ۋنيۆەرسيتەتىنىڭ جۋرناليستيكا فاكۋلتەتىن تامامدادى

«جارىق دۇنيە» (1994)، «دۇنيە كەزەك» (1997) اڭگىمەلەر جيناعى، «قۇدىرەت-كيە» ( 2000) اڭگىمەلەرى مەن درامالىق حيكاياتتارى جارىق كوردى. 2001 -جىلى رابعۇزيدىڭ «قيسسا-سۇل-انبي-يا» كىتابىن العاش رەت قازاق تىلىنە تارجىمالادى.

1996- جىلى قازاقتىڭ مەملەكەتگىك م.اۋەزوۆ اتىنداعى اكادەميالىق دراما تەاترىندا «ماڭگىلىك بالا بەينە» پەساسى قويىلدى. 1997- جىلى ع.مۇسىرەپوۆ اتىنداعى مەملەكەتتىك اكادەميالىق جاستار مەن بالالار تەاترىندا م.اۋەزوۆتىڭ «قارالى سۇلۋ» اڭگىمەسىنىڭ جەلىسىندە درامالىق قويىلىمى ساحنالاندى.

2001 -جىلى ش.ايمانوۆ اتىنداعى «قازاق فيلم» كينوستۋدياسى «قىز جىلاعان» اڭگىمەسىنىڭ جەلىسىمەن كينو ءتۇسىردى.

قازاقستان جازۋشىلار وداعى سىيلىعىنىڭ، «جالىن» جۋرنالىنىڭ ت.ايبەرگەن اتىنداعى سىيلىعىنىڭ (1989)، حالىقارالىق «الاش» ادەبي سىيلىعىنىڭ لاۋرەاتى (2002، «قۇدىرەت-كيە»).