دۇكەنباي دوسجان
العاشقى اڭگىمەسى ونبەس جاسىندا جارىق كورگەن قالامگەردىڭ بۇل كۇندە كىتاپتارى الەمنىڭ 20 تىلىنە اۋدارىلىپ، جالپى كولەمى 3،7 ميلليون تارالىممەن باسىلىپ شىققان. كىتاپ پالاتاسىنىڭ قازاقستانداعى «وقىرمانى قيساپسىز جازۋشى» كۋالىگىن العان. ونىڭ قالامىنان 11 رومان، 23 حيكايات، 100 دىڭ ۇستىندە اڭگىمە تۋدى
د. دوسجان 1959-1964 - جىلدارى قازمۋ-دە وقىعان. 1963-2002 - جىلدارى الماتى وبلىستىق «جەتىسۋ» گازەتىنىڭ ادەبي قىزمەتكەرى، «جازۋشى» باسپاسىندا، ق ر باسپا كوميتەتىندە ءبولىم مەڭگەرۋشىسى، قازاقستان جازۋشىلار وداعىنىڭ ادەبي كەڭەسشىسى، 1992-1994 «جالىن» جۋرنالىندا پروزا رەداكتورى، ق ر اۆتورلىق جانە ارالاس قۇقىقتار جونىندەگى اگەنتتىكتىڭ ءبولىم باستىعى، ق ر ۇلتتىق بانك مۇراجايىنىڭ ديرەكتورى بولىپ ىستەدى. 2002 -جىلدان «مادەني مۇرا» جۇرنالىنىڭ باس رەداكتورى.
د. دوسجان «وتىرار»، «فارابي»، «جىبەك جولى» (1965-66) شىعارمالارى ارقىلى «تاريحي تاقىرىپتىڭ پيونەرى» اتالدى. ۇلتتىق قاۋىپسىزدىك كوميتەتىنىڭ الپىس جىلداي جابۋلى مۇراعاتىنا العاش ەنگەن ول سوت قۇجاتتارى جەلىسىمەن «اباقتى» (1992) دەرەكناما كىتابىن جانە 1986- جىلعى جەلتوقسان قىرعىنىنىڭ ىزىمەن كوركەمدەلگەن «الاڭ» (1993) رومانىن جازدى.
زەرتتەۋشىلەر د. دوسجان شىعارماشىلىعىن ءۇش سالاعا ءبولىپ جازىپ ءجۇر. ءبىرىنشى: كونە عاسىر قويناۋىنان ەر تۇرىك رۋحىن تىرىلتكەن 60- جىلدار باسىنداعى تاريحي تاقىرىپتاعى - «جىبەك جولى»، «وتىرار»، «فارابي» شىعارمالارى جاتادى. ەكىنشى: بوداندىق بۇعاۋ مەن شەنەۋنىكتەر تەپكىسى زاردابىنان مىنەز ەكولوگياسىنا ۇشىراعان ءومىرزايا ۇرپاقتار وبرازدارىنىڭ گالەرەياسى - «زاۋال»، «داريا»، «تابالدىرىعىڭا تابىن»، «جولبارىستىڭ سۇرلەۋى»، «كىسى اقىسى» كىتابىنان تابىلادى. ءۇشىنشى: عاجايىپ ادامدار عۇمىرىن كوركەم تىلمەن سويلەتكەن سەريالار توبىنا «مۇحتار جولى» (1988)، «ابايدىڭ رۋحى» (1994، 2008)، «الىپتىڭ ازابى» (1997) دەگەن كىتاپتارى ەنەدى.
تاۋەلسىزدىگىمىزدىڭ تاريحىن كوركەم كەستەلەگەن «اق وردا» («ەلوردا» باسپاسى، 2005 -جىل) رومانىن وقىرماندار جىلى قابىلدادى. 2002 -جىلى جازۋشىنىڭ 13 تومدىق تاڭدامالى شىعارمالارى جارىق كوردى.
سوڭعى جىلدارى جازۋشىنىڭ «ءۇش تاعدىر» (2005)؛ «بالالىقپەن تىلدەسۋ» (2005)؛ «جان ءتاتتى» (2006، حيكاياتتار)؛ «جازمىشتىڭ فورمۋلاسى» (2008، جەتى حيكايات)؛ «ابايدىڭ رۋحى» (2008، عۇمىرنامالىق-وي تولعاۋ) كىتاپتارى جارىق كوردى. «وقىرمانى قيساپسىز جازۋشى» ايدارىمەن «تەرەزەنىڭ جارىعى» (2009) كىتابى كوپ تارالىممەن وقىرماندار قولىنا ءتيدى. جازۋشى قالامىنان سوڭعى كەزدەرى تۋعان سۋ جاڭا ءبىر توپ اڭگىمەلەرىن وقىرماندارىمىزعا ۇسىنىپ وتىرمىز.