كەلىسىمگە قول قويۋ ءراسىمى باحرەيننىڭ ريففا قالاسىندا ءوتتى. وعان باحرەيننىڭ تاق مۇراگەرى ءارى پرەمەر-ءمينيسترى سالمان بين حاماد ءال حاليفا، پارسى شىعاناعىنداعى اراب مەملەكەتتەرى ىنتىماقتاستىعى كەڭەسىنىڭ باس حاتشىسى دجاسەم مۇحاممەد ءال بۋدايۆي جانە ۇيىمعا مۇشە التى ەلدىڭ كولىك جانە كوممۋنيكاتسيا مينيسترلەرى قاتىستى.
جوبا اياسىندا، ساۋد ارابياسى، ب ا ءا، باحرەين، كۋۆەيت، قاتار جانە وماندى ءبىرىڭعاي ايماقتىق تەمىرجول جەلىسى بايلانىستىرادى.
ۇيىمنىڭ باس حاتشىسى دجاسەم مۇحاممەد ءال بۋدايۆي بۇل قۇجاتتىڭ قابىلدانۋى پارسى شىعاناعى ەلدەرىنىڭ كولىك بايلانىسىن دامىتۋعا سەرپىن بەرەتىنىن ايتتى.
ونىڭ ايتۋىنشا، بۇل قۇجات مەملەكەتتەر اراسىنداعى تەمىرجول تاسىمالىن رەتتەپ، ءبىرىڭعاي كولىك جۇيەسىنىڭ قالىپتاسۋىنا جاعداي جاسايدى.
جوبا جۇزەگە اسسا، جولاۋشىلار مەن جۇك تاسىمالى جەڭىلدەپ، ەلدەر اراسىنداعى كولىك بايلانىسى نىعايادى جانە ءوڭىر ەكونوميكاسىنىڭ دامۋىنا جول اشىلادى.
بۇعان دەيىن بىرىككەن اراب امىرلىكتەرىنىڭ العاشقى ۇلتتىق جولاۋشىلار تەمىرجول جەلىسى ىسكە قوسىلىپ، فۋدجەيرادان ابۋ-دابيگە العاشقى پويىز جولعا شىققانى حابارلانعان بولاتىن.