ارقار اتقان تۇركىستان وبلىسىنىڭ تۇرعىنى مەملەكەتكە 15 ميلليون تەڭگە تولەدى

  ارقار اتقان تۇركىستان وبلىسىنىڭ تۇرعىنى مەملەكەتكە 15 ميلليون تەڭگە تولەدى، دەپ حابارلايدى Kazinform.

زاڭسىز اڭ اتۋ فاكتىسى بيىلعى جىلدىڭ ماۋسىم ايىندا تىركەلدى. سوزاق اۋدانى قوزمولداق اۋىلىنىڭ تۇرعىنى 8-ماۋسىم كۇنى ۇيىندە زاڭسىز ساقتالعان اتىس قارۋىن الىپ، اۋىلىنان 15 شاقىرىم جەردە ورنالاسقان «باسقى ايرىق» تاۋلى سايىنا ارقار اۋلاۋعا بارعان. سودان ساعات 14:00 شاماسىندا سيرەك كەزدەسەتىن جانە قۇرىپ كەتۋى قاۋپى تونگەن ارقار جانۋارىن اتىپ العان.

ينسپەكتورلار زاڭسىز اڭ اۋلاۋشىنى وقيعا ورىن العان ايماقتان ۇستادى. قاراتاۋ مەملەكەتتىك تابيعي قورىعى قىزمەتكەرلەرى اكت ءتۇزىپ، كۇدىكتىدەن اتىس قارۋى مەن 18 دانا وق جانە اڭشى پىشاعىن، ارقاردىڭ باسى مەن سيراعىن جانە ەتىن تاركىلەدى. اتالعان جاعداي بويىنشا ق ك- ءتىڭ 287-بابىنىڭ 3-بولىگى جانە 337 - بابى 4 - بولىگىنىڭ 2,4) تارماقتارى بويىنشا قىلمىستىق ءىس قوزعالىپ، تەرگەۋ جۇرگىزىلدى. ناتيجەسى بويىنشا ءىس سوتقا ءوتتى.

«بايدىبەك اۋداندىق سوتىنىڭ ۇكىمىمەن سوتتالۋشى ق ك-ءتىڭ 287-بابىنىڭ 3-بولىگىندە جانە 337 -بابى 4-بولىگىنىڭ 2,4) تارماقتارىندا كوزدەلگەن قىلمىستاردى جاساعانى ءۇشىن كىنالى دەپ تانىلدى. سونداي- اق، ق ك-ءنىڭ 58-بابىنىڭ 3 -بولىگى نەگىزىندە ونشا قاتاڭ ەمەس جازانى نەعۇرلىم قاتاڭ جازاعا ءسىڭىرۋ بويىنشا تۇپكىلىكتى 7 جىلعا اڭشىلىق كاسىپشىلىكپەن اينالىسۋ قۇقىعىنان ايىرا وتىرىپ، 3 جىلعا باس بوستاندىعىنان شەكتەۋ جازاسى تاعايىندالدى. سوتتالۋشى مەملەكەتكە زالال كەلتىرگەن 15525000 تەڭگەنى تولىعىمەن تولەدى»، - دەدى قاراتاۋ مەملەكەتتىك تابيعي قورىعىنىڭ زاڭگەرى قارلىعاش جارمەنوۆا.