ارقان تارتىستىڭ وليمپيادا ويىندارىنىڭ باعدارلاماسىنا ەنگەنىن بىلەسىز بە

استانا. KAZINFORM - بۇل كۇندەرى قازاقتىڭ ۇلتتىق سپورت تۇرلەرىنىڭ ءبىرى - ارقان تارتىس ويىنى 1900 -1920-جىلدار ارالىعىندا وليمپيادا ويىندارىنىڭ باعدارلاماسىنا ەنىپ، جارىستار وتكەنىن ءبىرىمىز بىلسەك، ءبىرىمىز بىلە بەرمەيمىز.

وسىعان بايلانىستى بۇگىن ارقان تارتىس فەدەراتسياسىنىڭ رەسمي باراقشاسى ارقان تارتىس ادامزات بالاسىمەن بىرگە جاساسىپ كەلە جاتقانى تۋرالى شاعىن مالىمەتپەن ءبولىستى.

«عالىمداردىڭ تۇجىرىمىنا سۇيەنسەك ەجەلگى ادامداردىڭ قونىسىنان ارقان تارتىستىڭ بەلگىلەرى تابىلعان. ءبىراق، بۇل ناقتى فاكت ەمەس. دالەلدەنگەن ۋاقىت پەن جەر جوق. جورامال عانا. ال، ناقتى اقپاراتتار ب. ز. د 1000 -جىلدارى باستالادى. سكانديناۆيا مەن گەرمانيا جەرىندە ارقان تارتىس كۇش سايىستارىنىڭ ءبىرى بولعان. ال، ب. ز. د 500 -جىلدارى گرەكياداعى وليمپيادا ويىندارىندا ارنايى كوماندالار ارقان تارتىسىپ، كۇش سىناسقان»، - دەلىنگەن حابارلامادا.

سونداي- اق، 1900- 1920-جىلدار اراسىندا ارقان تارتىس وليمپيادا ويىندارىنىڭ باعدارلاماسىنا ەنىپ، جەڭىل اتلەتيكانىڭ ءبىر بولشەگى رەتىندە جارىستار وتكەنى ايتىلادى. ال 1912-جىلدان باستاپ جەكە سپورت تۇرىندە جارىستار ۇيىمداستىرىلعانى بەلگىلى بولدى.

«ارقان تارتىستان تۇڭعىش وليمپيادا چەمپيونى شۆەتسيا مەن دانيانىڭ ارالاس قۇراماسى. 1904-جىلى ا ق ش- تىڭ ميلۋوكي كلۋبى جەڭسە، 1908-جىلى لوندون پوليتسياسىنىڭ كومانداسى، 1912-جىلى ستوكگولم پوليتسياسىنىڭ كومانداسى چەمپيون بولادى. ال، ارقان تارتىستان سوڭعى وليمپيادا چەمپيوندارى ۇلى بريتانيانىڭ ۇلتتىق كومانداسى بولعان»، - دەپ جازدى ارقان تارتىس فەدەراتسياسى.

كەيىن 1920-جىلداردان كەيىن بەلگىسىز سەبەپتەرمەن ارقان تارتىس وليمپيادا ويىندارىنىڭ باعدارلاماسىنان الىنىپ تاستالعان.

ەستەرىڭىزگە سالا كەتەيىك، بيىل 8-14-قىركۇيەك ارالىعىندا استانا قالاسىندا V دۇنيەجۇزىلىك كوشپەندىلەر ويىنى وتەدى. ارقان تارتىس وسى الەمدىك دودانىڭ باعدارلاماسىنا ەنگەن. بۇگىنگى تاڭدا ەلىمىزدىڭ ءار وبلىسىندا ارقان تارتىستان كوشپەندىلەر ويىنىنا ىرىكتەۋ سىندارى باستالىپ كەتتى.

اۆتور

كۇنسۇلتان وتارباي