ارگەنتينادا گيتلەردىڭ قولى قويىلعان قۇجاتتار تابىلدى

استانا. KAZINFORM — ارگەنتينا جوعارعى سوتى ورنالاسقان بۋەنوس- ايرەستەگى بۇرىنعى ادىلەت مينيسترلىگىنىڭ جەرتولەسىنەن گەرمانياداعى ناتسيستىك رەجيمنىڭ 1930-1940 -جىلدارداعى قىزمەتىنە قاتىستى جۇزدەگەن قۇجاتتارى بار جاشىكتەر تابىلدى، دەپ حابارلايدى Clarin.

قۇجاتتار جوعارعى سوت مۇراجايى ءۇشىن جەرتولەنى جوندەۋ جانە دايىنداۋ كەزىندە كەزدەيسوق تابىلعان. ولار تەكسەرىلگەننەن كەيىن بۋەنوس- ايرەستەگى حولوكوست مۇراجايىنا جىبەرىلەدى.

مالىمەتتەرگە سايكەس، قاعازدار ادىلەت مينيسترلىگىنىڭ جەرتولەسىندەگى 12 اعاش شامپان جاشىگىندە ساقتالعان. قۇجاتتاردىڭ ىشىندە ءتولقۇجات، پارتيا بيلەتتەرى، ۇگىت- ناسيحات ماتەريالدارى، اق-قارا فوتوسۋرەتتەر، پاراقشالار، داپتەرلەر بار. كەيبىر قۇجاتتاردا ادولف گيتلەردىڭ قولى دا كەزدەسەدى.

بۇل ولجا 1941 -جىلى ماۋسىمدا Nan-a-Maru كەمەسىمەن توكيوداعى گەرمانيا ەلشىلىگىنەن ارگەنتيناعا جەتكىزىلگەن 83 جاشىك قۇجاتتاردىڭ ءبىر بولىگى بولۋى مۇمكىن ەكەنى اتاپ ءوتىلدى. قازىرگى ۋاقىتتا مۇراعاتتى حولوكوست مۇراجايىنىڭ ماماندارى مەن تەرگەۋشىلەرى زەرتتەپ جاتىر.

ولاردىڭ مىندەتى - قۇجاتتاردىڭ تاريحي ماڭىزدىلىعىن باعالاۋ جانە ولاردا بۇكىل الەم بويىنشا ناتسيستىك «اقشا ءىزىنىڭ» بۇرىن بەلگىسىز اسپەكتىلەرىنە جارىق تۇسىرۋگە كومەكتەسەتىن ماڭىزدى اقپارات بار- جوعىن انىقتاۋ.

ەسكە سالا كەتەيىك، ارگەنتينا پارلامەنتى پرەزيدەنتكە قاتىستى جانجالدى تەرگەۋ ءۇشىن كوميسسيا قۇراتىنى جايلى جازعان ەدىك.