ارگەنتينا 10 جىلداعى ەڭ ۇلكەن داعدارىسقا تاپ بولدى

استانا. قازاقپارات - الەمدىك ەكونوميكا شاتقاياقتاپ تۇر. لاتىن امەريكاسىنان وڭتۇستىك ازياعا دەيىنگى ەلدەردىڭ ۇكىمەتى دەس بەرمەي بارا جاتقان ينفلياتسيامەن كۇرەسىپ الەك. ال ارگەنتينا مەن مىسىر تەرەڭ داعدارىسقا تاپ بولدى.

ارگەنتينا كەيىنگى 10 جىلداعى ەڭ ۇلكەن ەكونوميكالىق داعدارىستى باستان كەشىرىپ جاتىر. جىلدىق ينفلياتسيا - 70 پايىز. 47 ميلليون حالىقتىڭ 60 پايىزعا جۋىعى كەدەيلىك قامىتىن كيىپ ءجۇر. تۇرعىنداردىڭ ساتىپ الۋ قابىلەتى تومەندەگەن. كەرىسىنشە ساتۋشىلاردان قاجەت ەمەس تاۋاردى تەگىن بەرۋدى سۇرايدى. ساراپشىلار بۇعان پرەزيدەنت حاۆەر ميلەيدىڭ اقشا-نەسيە ساياساتىن قاتاڭ جۇرگىزۋى سەبەپ دەيدى. ول جاردەماقىلار جانە ەنەرگيا كوزدەرى مەن كولىكتە جۇرۋگە ارنالعان كومەك قارجىنى قىسقارتتى.

ارگەنتينا ۇكىمەتى شەتەلدىك ۇيىمداردان 32 ميلليارد دوللار قارىز العان. بەرەشەكتىڭ كوبى حالىقارالىق ۆاليۋتا قورىنا تيەسىلى. وسى قارجىنىڭ كومەگىمەن بيلىك ورتالىق بانكتى قايتا قۇرىلىمداپ، ينفلياتسيا دەڭگەيىن تەجەۋدى جانە ۆاليۋتا باقىلاۋىن الىپ تاستاۋدى جوسپارلاپ وتىر.

مىسىردا ۆاليۋتا داعدارىسى تەرەڭدەپ بارادى

مىسىر 2016 -جىلدان بەرى تەرەڭ ۆاليۋتا داعدارىسىنان شىعا الماي كەلەدى. جەرگىلىكتى فۋنت كەيىنگى 2 جىلدا 3 ەسە قۇنسىزداندى. باستى سەبەپ - سىرتقى قارىزدىڭ ءوسۋى جانە يمپورتقا، ونىڭ ىشىندە شەتەلدىك ازىق- تۇلىككە تاۋەلدىلىك. جىلدىق ينفلياتسيا 14 پايىزعا جەتىپ قالدى. بۇل كورسەتكىش وتكەن ايدا عانا 5 پايىز بولاتىن. ەكونوميكانىڭ تۇرالاۋىنا قىزىل تەڭىزدەگى كەمەلەرگە يەمەندىك حۋسيتتەردىڭ شابۋىلداۋى سوققى بولىپ ءتيدى. وسىنىڭ سالدارىنان مىسىر سىرتقى كىرىستىڭ 70 پايىزىن جوعالتقان. داعدارىسقا توتەپ بەرۋ ءۇشىن اراب ەلىنىڭ بيلىگى حالىقارالىق ۆاليۋتا قورىنان 8 ميلليارد دوللار نەسيە الۋ شارتىنا قول قويدى. بۇل مىسىرداعى تاۋارلار مەن قىزمەت كورسەتۋ قۇنىن ارتتىرىپ وتىر.

گەرمانيا ەكونوميكاسىنىڭ ءوسىمى تومەندەدى

گەرمانيا ەكونوميكاسىنىڭ ءوسىمى تومەندەدى. بۇعان ا ق ش پرەزيدەنتى سالعان سالىق سەبەپ. ەۋروپالىق ەكونوميكالىق زەرتتەۋلەر يندەكسىنىڭ نەمىس ەكونوميكاسىنا قاتىستى كورسەتكىشى 65,6 تارماققا قۇلدىرادى. ساراپشىلار گ ف ر امەريكالىق تاريفتەر سالدارىنان الداعى 4 جىلدا 200 ميلليارد ەۋرو كىرىسىنەن ايىرىلۋ قاۋپى بار دەپ بولجايدى. ياعني گەرمانيانىڭ كولىك ءوندىرىسى، مەتاللۋرگيا، حيميا جانە ءدارى-دارمەك ونەركاسىبى زارداپ شەكپەك. ا ق ش سالعان سالىق سالدارىنان ەكسپورت كولەمى قىسقارىپ، كومپانيالاردىڭ تابىسى تومەندەپ، مۇنىڭ سوڭى ونداعان مىڭ جۇمىس ورنىن قىسقارتۋعا اكەلەدى دەگەن جورامال بار. وسىلايشا نەمىس ەلىنىڭ بيىلعى جالپى ىشكى ءونىمى 0,3 پايىزعا تومەندەۋى مۇمكىن.