ارنايى ۆيزامەن عانا رۇقسات - بيىل زاڭسىز قاجىلىق جاساعاندار جازالانادى

استانا. KAZINFORM - ساۋد ارابياسى بيىل زاڭسىز قاجىلىق جاساعان ادامدار مەن زاڭسىز قاجىلىقتى ۇيىمداستىرعاندارعا قوماقتى ايىپپۇل سالادى. بۇل تۋرالى Kazinform اگەنتتىگى قازاقستان مۇسىلماندارى ءدىني باسقارماسىنا سىلتەمەمەن حابارلادى.

- ساۋد ارابياسى كورولدىگىنىڭ قاجىلىق جانە ۇمرا مينيسترلىگى 2025 -جىلعى 29 -ءساۋىر مەن 10- ماۋسىم ارالىعىندا قاجىلىق جاساۋ ەرەجەلەرىن بۇزعان نەمەسە زاڭسىز قاجىلىق جاساۋدا ازاماتتارعا كومەكتەسكەن وكىلدەرگە بەلگىلەنگەن جازالاۋ شارالارىن جاريالادى، - دەپ حابارلايدى ق م د ب باسپا ءسوز قىزمەتى.

مالىمەتكە ساي، جازالاۋ شاراسى مىنانداي جاعدايلاردا قولدانادى:

1. ليتسەنزياسىز قاجىلىق جاساپ جۇرگەن نەمەسە جاساۋعا ارەكەت ەتكەن ازاماتتار كورسەتىلگەن ۋاقىت ارالىعىندا قاسيەتتى ورىنداردا قالسا نەمەسە زيارات جاساسا، 20 مىڭ ساۋد ارابياسى ريالى نەمەسە 5300 ا ق ش دوللارى كولەمىندە ايىپپۇل سالىنادى.

2. قاجىلىقتى ورىنداۋعا ارەكەت ەتىپ مەككە جانە قاسيەتتى ورىندارعا كىرگەن، ءبىراق «قاجىلىق ۆيزاسى» جوق شەتەل ازاماتتارىنا، شەتەلدىكتەردىڭ قاجىلىق ساپارىن باسقا ۆيزالار ارقىلى ۇيىمداستىرعان جاۋاپتى وكىلدەرگە 100 مىڭ ساۋد ارابياسى ريالى - شامامەن 26 مىڭ 600 ا ق ش دوللارى كولەمىندە ايىپپۇل قاراستىرىلعان. بۇل ايىپپۇل سومماسى ءاربىر جالعان ۆيزا ءۇشىن جەكە-جەكە ەسەپتەلەدى.

سونىمەن قاتار زاڭسىز تۇردە مەككە اۋماعىنا كىرگەندەردى جاسىرعاندار، تاسىمالداعان كولىك جۇرگىزۋشىلەرى، ورنالاستىرعان قوناق ۇيلەر مەن جەكە ءۇي يەلەرىنە دە ءدال وسىنشا سومادا ايىپپۇل سالىنادى.

3. زاڭسىز تۇردە قاجىلىق جاساۋعا ارەكەت ەتكەن ازاماتتار، ساۋد ارابياسىندا ۋاقىتشا تۇرعان، ۆيزاسىنىڭ ۋاقىتى اياقتالعان نەمەسە زاڭسىز تۇردە مەكەندەپ وتىرعان ازاماتتار ءوز ەلىنە دەپورتاتسيالانادى جانە 10 جىلعا ساۋد ارابياسىنا كىرۋگە تىيىم سالىنادى.

4. قاجىلىق ۆيزاسى جوق شەتەلدىك ازاماتتاردى تاسىمالداعان ترانسپورتتار ولارعا كومەكتەسكەن ازاماتتارعا تيەسىلى بولسا، ول كولىكتەر سوت قاۋلىسىمەن مەملەكەت ەسەبىنە وتكىزىلەدى.

5. ۆيزا ۋاقىتى اياقتالسا دا، ەلدەن شىعىپ كەتپەگەن شەتەل ازاماتتارىنا 50 مىڭ ساۋد ارابياسى ريالى - 13 مىڭ 300 ا ق ش دوللارى كولەمىندە ايىپپۇل، 6 ايعا دەيىن قاماۋ جانە دەپورتاتسيا جازاسى بەلگىلەنگەن. سونىمەن قاتار قاجىلىق جانە ۋمرا مينيسترلىگى قاجىلىق جاساۋشىلارعا ن ۋ س ۋ ك جانە ت ا س ر ي ق پلاتفورمالارى ارقىلى رۇقسات الۋ قاجەتتىگىن ەسكەرتەدى.

ايتا كەتەيىك، 2025 -جىلى قاجىلىق وتەۋ تەك «قاجىلىق ۆيزاسى» ارقىلى جۇزەگە اسىرىلادى. باسقا كەز كەلگەن ۆيزا تۇرىمەن مەككە مەن قاسيەتتى جەرلەردىڭ اۋماعىنا كىرۋگە تىيىم سالىنادى.

بيىل قازاقستاننان رەسمي تۇردە 4500 ادام قاجىلىققا اتتانادى. ولار 24-31-مامىر ارالىعىندا ساۋدياعا بارىپ، 10-16-ماۋسىم ارالىعىندا ەلگە ورالادى.

- بارشا جاماعاتتى ساۋد ارابياسى كورولدىگى قاجىلىق جانە ۇمرا مينيسترلىگىنىڭ شەتەلدىك ازاماتتارعا قاتىستى ەرەجەلەرىن قاتاڭ ساقتاۋعا شاقىرامىز. سونىمەن قاتار بيىل قاجىلىققا نيەت ەتكەن وتانداستارىمىزعا قانداي دا ءبىر زاڭسىز ارەكەتتەرگە بارماۋدى جانە ليتسەنزياسى جوق تۋريستىك فيرمالارعا جازىلماۋ قاجەتتىگىن ەسكەرتەمىز»، - دەپ حابارلايدى ك م د ب.

2025 -جىلى ساۋد ارابياسى 1 ميلليون 800 مىڭ پارىزىن وتەۋشىنى كۇتىپ الۋدى جوسپارلاپ وتىر.

2024 -جىلى ساۋد ارابياسى زاڭسىز تۇردە قاجىلىق جاساعان 300 مىڭنان استام شەتەل ازاماتىن انىقتاعان.

ايتا كەتەيىك، ساۋد ارابياسى قاجىلىق كەزىندە مەككەگە كىرۋگە جاڭا شەكتەۋلەر ەنگىزدى.

اۆتور

ەربول جانات