ارنايى تولەم: كىم جۇمىستان شىعىپ، زەينەتكە شىققانعا دەيىن اقشا الا الادى

استانا. قازاقپارت - 2025 -جىلعى 1-شىلدەدەگى جاعداي بويىنشا 3916 ازاماتقا زياندى ەڭبەك جاعدايلارىندا ۇزاق ۋاقىت جۇمىس ىستەگەن ادامدارعا ارنالعان ارناۋلى الەۋمەتتىك تولەم تاعايىندالدى. اتالعان تولەمدى تاعايىنداۋعا جالپى 3968 ادام ءوتىنىش بىلدىرگەن.

ەكى كوزدەن تولەنەتىن ارناۋلى الەۋمەتتىك تولەمگە (رەسپۋبليكالىق بيۋدجەت جانە ءبىرىڭعاي جيناقتاۋشى زەينەتاقى قورى) 313 ادام جۇگىندى، ونىڭ ىشىندە 309 ادامعا تاعايىندالدى.

ءتورت قارجىلاندىرۋ كوزىنەن بەرىلەتىن ا ءا ت (رەسپۋبليكالىق بيۋدجەت، ءبىرىڭعاي جيناقتاۋشى زەينەتاقى قورى، جۇمىس بەرۋشى جانە ءومىردى ساقتاندىرۋ ۇيىمى) تاعايىنداۋعا 3655 ادام ءوتىنىش ءبىلدىرىپ، ونىڭ 3607-ىنە تاعايىندالعان.

— 56 ازامات ساقتاندىرۋ كومپانياسىمەن زەينەتكەرلىك اننۋيتەت شارتىنىڭ جاسالۋىن كۇتۋدە، 34 ازامات س م س حابارلاماعا جاۋاپ بەرمەگەن. مىندەتتى شارتتاردى ورىنداماعاندىقتان، 18 ءوتىنىش بەرۋشىگە ا ءا ت تاعايىنداۋدان باس تارتىلدى.

وڭىرلەر بويىنشا ارناۋلى الەۋمەتتىك تولەمدەردى الۋعا ءوتىنىش بىلدىرگەندەردىڭ ەڭ كوپ سانى قاراعاندى ​​(2 كوزدەن — 43 ادام، 4 كوزدەن — 496 ادام)، شىعىس قازاقستان (2 كوزدەن — 32 ادام، ال 4 كوزدەن — 356 ادام) جانە قوستاناي (2 كوزدەن — 9 ادام، ال 4 كوزدەن — 297 ادام) وبلىستارىندا تىركەلگەن، — دەلىنگەن ەڭبەك مەنى حابارلاماسىندا.

بۇرىن حابارلانعانداي 2024 -جىلدىڭ 1- قاڭتارىنان باستاپ قازاقستاندا زياندى ەڭبەك جاعدايلارىندا ۇزاق ۋاقىت جۇمىس ىستەگەن ادامدارعا ارناۋلى الەۋمەتتىك تولەم ەنگىزىلدى.

— ارناۋلى الەۋمەتتىك تولەم تاعايىنداۋ ءۇشىن 55 جاسقا تولۋ جانە ءبىرىڭعاي جيناقتاۋشى زەينەتاقى قورىندا كەمىندە 7 جىل كاسىپتىك زەينەتاقى اۋدارىمدارىنىڭ بولۋى مىندەتتى شارتتار بولىپ تابىلادى. تولەم زەينەتكەرلىك جاسقا دەيىن تولەنەدى. ارناۋلى الەۋمەتتىك تولەمدەردى الۋ ءۇشىن ەڭبەك جاعدايلارى زياندى جۇمىستارمەن اينالىسپاۋعا ءتيىس. جۇمىسكەرلەر جەڭىل جۇمىسقا اۋىسا الادى، سودان كەيىن ولار جالاقى مەن تولەم الادى نەمەسە دەمالىسقا شىعىپ، زەينەتكە شىققانعا دەيىن ارناۋلى الەۋمەتتىك تولەم الادى، — دەلىنگەن مينيسترلىك حابارلاماسىندا.

الەۋمەتتىك كودەكسكە سايكەس جۇمىس بەرۋشىلەر كاسىپتەرى مەن قىزمەت تۇرلەرى ەڭبەك جاعدايلارى زياندى جۇمىستارمەن اينالىساتىن جۇمىسكەرلەردىڭ، وندىرىستەردىڭ، جۇمىستاردىڭ، كاسىپتەردىڭ تىزبەسىنە ەنگىزىلگەن جۇمىسكەرلەر ءۇشىن مىندەتتى كاسىپتىك زەينەتاقى جارنالارىن اۋدارادى، ولاردىڭ 2,3 مىڭنان استام پوزيتسياسى بار. وسىلايشا، ارناۋلى الەۋمەتتىك تولەمدى ەكونوميكانىڭ 17 سالاسىندا، ونىڭ ىشىندە تاۋ- كەن ءوندىرۋ جانە وڭدەۋ ونەركاسىبىندە جانە وزگە دە سالالاردا جۇمىس ىستەيتىن قازاقستاندىقتار الا الادى.

ايتا كەتەلىك ەندى زەينەتاقى اۆتوماتتى تۇردە تاعايىندالماق.

اۆتور

نازىم بولەسوۆا