ارناۋلى الەۋمەتتىك تولەم كىمدەرگە بەرىلدى؟

استانا. KAZINFORM - قازاقستاندا 8,5 مىڭعا جۋىق ادامعا ارناۋلى الەۋمەتتىك تولەم تاعايىندالدى.

بيىل جىل باسىنان بەرى 8476 ازاماتقا زيان ەڭبەك جاعدايىندا ۇزاق ۋاقىت جۇمىس ىستەگەن ادامدارعا بەرىلەتىن ارناۋلى الەۋمەتتىك تولەم تاعايىندالدى. بۇل تولەمگە 9255 ادام ءوتىنىش بىلدىرگەن.

«ەكى كوزدەن تولەنەتىن ارناۋلى الەۋمەتتىك تولەمگە (رەسپۋبليكالىق بيۋجەت جانە ءبىرىڭعاي جيناقتاۋشى زەينەتاقى قورى) 2840 ادام جۇگىندى، ونىڭ ىشىندە 2730 ادامعا تاعايىندالدى. ءتورت قارجىلاندىرۋ كوزىنەن بەرىلەتىن ءا ا ت (رەسپۋبليكالىق بيۋجەت، ءبىرىڭعاي جيناقتاۋشى زەينەتاقى قورى، جۇمىس بەرۋشى جانە ءومىردى ساقتاندىرۋ ۇيىمى) تاعايىنداۋعا 6415 ادام ءوتىنىش ءبىلدىرىپ، ونىڭ 5746 سىنا تاعايىندالدى»، - دەپ جازىلعان حابارلامادا.

وڭىرلەر بويىنشا ارناۋلى الەۋمەتتىك تولەم الۋعا ءوتىنىش بىلدىرگەندەردىڭ ەڭ كوپ سانى قاراعاندى ​​(2 كوزدەن - 492 ادام، 4 كوزدەن - 1166 ادام)، قوستاناي (2 كوزدەن - 318 ادام، ال 4 كوزدەن - 876 ادام) جانە شىعىس قازاقستان (2 كوزدەن - 248 ادام، ال 4 كوزدەن - 882 ادام) وبلىستارىندا تىركەلگەن.

بيىل 1-قاڭتاردان باستاپ قازاقستاندا زيان ەڭبەك جاعدايىندا ۇزاق ۋاقىت جۇمىس ىستەگەن ادامدارعا ارناۋلى الەۋمەتتىك تولەم ەنگىزىلدى.

ارناۋلى الەۋمەتتىك تولەم تاعايىنداۋ ءۇشىن 55 جاسقا تولۋ جانە ءبىرىڭعاي جيناقتاۋشى زەينەتاقى قورىندا (بۇدان ءارى - ب ج ز ق) كەمىندە 7 جىل كاسىپتىك زەينەتاقى اۋدارىمى بولۋى - مىندەتتى شارت. ول زەينەت جاسىنا دەيىن تولەنەدى.