ارمەنيانىڭ بۇرىنعى پرەزيدەنتىنە ايىپ تاعىلدى
ەرەۆان. KAZINFORM - ارمەنيانىڭ ەكس-پرەزيدەنتى سەرج سارگسيانعا اسا ءىرى كولەمدە پارا الۋ جانە زاڭسىز كاسىپكەرلىك قىزمەتكە قاتىسۋ بويىنشا ايىپ تاعىلدى. قىلمىستىق ءىس سوتقا جولداندى، دەپ حابارلايدى Kazinform اگەنتتىگىنىڭ مەنشىكتى ءتىلشىسى.
ارمەنيا رەسپۋبليكاسىنىڭ سىبايلاس جەمقورلىققا قارسى كوميتەتىنىڭ مالىمەتىنشە، سەرج سارگسيان 2000-2018-جىلدار ارالىعىندا قورعانىس ءمينيسترى، پرەمەر-مينيستر جانە ەل پرەزيدەنتى قىزمەتتەرىن اتقارا وتىرىپ، قىزمەتتىك وكىلەتتىگىن پايدالانىپ، سەنىمدى تۇلعالار ارقىلى كاسىپكەرلىكپەن اينالىساتىن ءبىرقاتار كوممەرتسيالىق ۇيىم قۇرعان.
الدىن الا تەرگەۋ بارىسىندا وعان اسا ءىرى كولەمدە پارا الۋ جانە زاڭمەن تىيىم سالىنعان زاڭسىز كاسىپكەرلىك قىزمەتكە قاتىسۋ بويىنشا رەسمي ايىپ تاعىلدى.
قىلمىستىق ءىس بويىنشا تەرگەۋ اياقتالىپ، ايىپتاۋ قورىتىندىسىمەن بىرگە ءىس ماتەريالدارى ارمەنيانىڭ سىبايلاس جەمقورلىققا قارسى سوتىنا جولداندى.
بۇعان دەيىن ارمەنيا پرەمەر- ءمينيسترى نيكول پاشينيان ارمەنيانىڭ تەرگەۋ كوميتەتى «قاسيەتتى كۇرەس» قوزعالىسىنىڭ قاتىسۋشىلارى مەن كوشباسشىلارى تەرروريستىك ارەكەتتەر مەن بيلىكتى باسىپ الۋدى جوسپارلاعانى تۋرالى مالىمدەمەسىنە پىكىر بىلدىرگەن بولاتىن.