ارمەنيادا العاش رەت باتىس ءنىل ۆيرۋسىن جۇقتىرعاندار تىركەلدى

استانا. KAZINFORM - ارمەنيانىڭ اۋرۋلاردى باقىلاۋ جانە الدىن الۋدىڭ ۇلتتىق ورتالىعى ماسادان ادامعا جۇعاتىن باتىس ءنىل ۆيرۋسىنىڭ ەلدە العاش رەت تارالۋىن تىركەدى.

20 عا جۋىق ادام اۋرۋحاناعا جاتقىزىلىپ، ءبىر ناۋقاس كوز جۇمعان، دەپ حابارلايدى Kazinform ءتىلشىسى «ازاتۋتيۋن» راديوسىنا سىلتەمە جاساپ.

ناۋقاستاردىڭ جاعدايى ورتاشا جانە اۋىر دەپ باعالانىپ وتىر. ولاردىڭ ىشىندەگى ەڭ جاسى 25 تە، ەڭ ەگدەسى 65 تە.

بارلىق ناۋقاستىڭ سوزىلمالى جانە اۋىر سىرقاتتارى بار. قازا بولعان 60 تان اسقان ادامنىڭ دا سوزىلمالى اۋرۋى بولعان.

ارمەنيا دەنساۋلىق ساقتاۋ مينيسترلىگىنىڭ اۋرۋلاردى باقىلاۋ جانە الدىن الۋدىڭ ۇلتتىق ورتالىعىنىڭ ديرەكتورى ستەپان اتوياننىڭ ايتۋىنشا، بۇل اۋرۋدىڭ ناقتى ەمى جوق، تاعايىندالعان ەم سيمپتوماتيكالىق جانە بۇل ۆيرۋسقا قارسى ۆاكتسينا ءالى ازىرلەنبەگەن. باتىس ءنىل ۆيرۋسىن كۋلەكس (Culex pipiens) ماسالار تاراتادى.

ارمەنيادا باتىس ءنىل ۆيرۋسىن جۇقتىرۋ جاعدايلارى نەگىزىنەن ەلدىڭ ىستىق ايماقتارىندا - ارارات، ارماۆير جانە اراگاتسوتتا تىركەلگەن.