ارمان جۇماگەلديەۆتىڭ سىبايلاسى بىرىككەن اراب امىرلىكتەرىنەن ەكستراديتسيالاندى

استانا. KAZINFORM - باس پروكۋراتۋرا مەن ىشكى ىستەر مينيسترلىگىنىڭ قىزمەتكەرلەرى قازاقستاننىڭ بىرىككەن اراب امىرلىكتەرىندەگى ەلشىلىگىنىڭ قولداۋىمەن دۋباي قالاسىنان ارمان جۇماگەلديەۆتىڭ قىلمىستىق توبىنىڭ سىبايلاسى ەكستراديتسيالاندى.

ول 2022 -جىلعى 5-7-قاڭتار ارالىعىندا الماتى قالاسىندا جۇماگەلديەۆتىڭ باندالىق قۇرامىندا جاپپاي تارتىپسىزدىكتەرگە بەلسەنە قاتىسقان دەگەن كۇدىككە ءىلىندى.

قىلمىستار جاسالعاننان كەيىن كۇدىكتى جاسىرىنعان جانە شامامەن ءۇش جىل بويى حالىقارالىق ىزدەۋدە بولعان، كەيىننەن بىرىككەن اراب امىرلىكتەرى اۋماعىندا ۇستالعان.

قازىرگى ۋاقىتتا كۇدىكتى استانا قالاسىنداعى تەرگەۋ يزولياتورىنا قامالدى.

وعان تاعىلعان قىلمىستار بويىنشا ون جىلدان ون بەس جىلعا دەيىن باس بوستاندىعىنان ايىرۋ جانە مۇلكىن تاركىلەۋ جازاسى كوزدەلگەن.

ايتا كەتەلىك شىمكەنتتە «ديكي ارماننىڭ» اينالاسىنداعى ادامدار سوتتالعان ەدى.

ەسكە سالساق قىلمىس الەمىنىڭ سەركەسى «ديكي ارمان» 20 -جىلعا سوتتالعان ەدى.