ارعى جاعى ەرتىستىڭ بەرگى جاعى
استانا.قازاقپارات - توبەدەگى تاقىرىپ -تالاپبەك تىنىسبەك ۇلىنىڭ 2017-جىلى «ءۇش قيان» باسپاسىنان جارىق كورگەن جىر كىتابىنىڭ اتاۋى.
بۇل كىتاپ جايلى ءسوز ءسال كەيىنىرەك. اۋەلى، اڭگىمە ءالحامىن بىرەر ەستەلىك لەبىزدەن باستاسام دەيمىن.
ساپار
تالاپبەكتىڭ ەسىم-سويىنا كوپتەن بەرى قانىقپىن. ول الماتىدا، مەن استانا شارىندە عۇمىر ارباسىنىڭ دارتەسىنە جەگىلىپ، نەسىبەمىزدى تەرىپ كۇن كورىپ جاتقانىمىزبەن، تەرەڭ ىشتەسىپ، سىردەستە بولىپ سويلەسۋدىڭ ءساتى تۇسپەگەن ەكەن. تەك اماندىق-ساۋلىقتان اسپاعان قارىم-قاتىناسىمىزدىڭ ەتەنە تەرەڭدەپ عازيز دوستىققا ۇلاسۋى 2022-جىلدىڭ جارقىراعان جازىندا بولدى. ونىڭ ءوزى دە اياق استىنان بولعان جاعداي ەدى. سول ءۇشىن دە ءسال شەگىنىس جاسايىن. جۋرناليستيكانىڭ سايىپقىران جامپوزى، قاشان كورسەڭ ادامعا قايتىپ جاقسىلىق جاساسام ەكەن دەپ كوبەلەكتەي ۇشىپ قونىپ جۇرەتىن اقكويلەك اعام ولجاس كەرەيحان ءار كەزدەسكەن سايىن وسكەمەنگە ءبىر كەلىپ كەتۋىمدى كوپتەن بەرى قولقالاپ جۇرەتىن. سويتسەم، ولجاس اعام تەك مەنى عانا ەمەس، قازاقتىڭ ءسوز ۇستارتقان تالاي جاقسىلارىن شاڭىراعىنا شاقىرىپ جۇرەدى ەكەن. ء سويتىپ، سول مەزەتتىڭ ءساتى ءتۇسىپ قازاقتىڭ قوس عاجايىپ اقىنى سۇراعان راحمەت ۇلى اعاتايىم باستاعان، باۋىرجان قاراعىز ۇلى قوستاعان مەنىمەن ءۇش ادام بۋىنىپ-ءتۇيىنىپ ساپارعا شىقتىق.
وتاربامىز ەندى ەكىباستۇزدان اسىپ كەرەكۋگە قاراي بەت تۇزەگەن مەزەتتە باۋكەڭنىڭ (باۋىرجان قاراعىز ۇلىنىڭ) اياق-استىنان شۇعىل ءبىر شارۋاسى شىعىپ جولدان ءتۇسىپ قالۋعا ءماجبۇر بولدى. ء بىز باۋكەڭنىڭ كەتكەنىنە شىنىمەن-اق قوڭىلتاقسىپ قالدىق. ەندى نە ىستەسەك ەكەن دەپ ۋايىمداپ وتىرعاندا پويىزدىڭ ىشىنەن وسى تالاپبەك زامانداسىم كەزدەيسوق ۇشىراسا كەتتى. مىنەكەي، كوكتەن ىزدەگەنىمىز جەردەن تابىلا كەتىپ كادىمگىدەي ارقا-جارقا بولدىق تا قالدىق.
تاكەڭ قارا شاڭىراعىن قارت التايعا كوشىرىپ العانىن، ءارى اكەسى تالاپبەك اقساقالدىڭ دۇنيەدەن وزىپ، اتامەكەن توپىراعىندا ماڭگىلىككە دامىلداعانىنان دا ەپتەپ حابارىمىز بار ەدى. تالاپبەكتىڭ بۇل ساپارى قارا شاڭىراعىنا بارا جاتقان بەتالىسى ەكەن. سودان اڭگىمەنىڭ تيەگى اعىتىلدى-اي كەلىپ. بەس كۇن بىرىمىزدەن ءبىرىمىز ەش اجىراماي قاتار جۇردىك. اۋەلى، ش ق و بالالار جانە جاسوسپىرىمدەر كىتاپحاناسىنداعى كەزدەسۋىمىز ارى قاراي كاتونقاراعاي ساپارىنا ۇلاستى. ء وز باسىم ءۇشىن ورالحان مەن قاليحان تۋعان كورىكتى مەكەندى كوزبەن كورۋدىڭ ءوزى نەگە تۇرادى دەسەڭىزشى. الىپ تاۋ ونىڭ بەتىن جاپقان تۇمسا قاراعاي، ساي-سالانى شيمايلاي اققان اقجال وزەندەر بەينە ءبىر سۋرەتشى سالعان ۇلى تۋىندىداي دەسەم، اسىرە ايتقاندىعىم ەمەس. ءسوز جوق، سۇلۋ تابيعات جۇرەگىڭدى قوزعايدى. سودان شىعار، ايگىلى «جاس قالام» ءانىنىڭ اۆتورى، اقىن تولەۋبەك جاقىپباي ۇلىنىڭ مىنا ءبىر شۋماق ولەڭى قاپەرىمە ءتۇستى.
و، مايلى قاراعايىڭ شىمىلدىقتاي،
اق بۇلتىڭ اسپان كەزگەن تۋىرلىقتاي.
كەرەگەنى بويلاعان كوك شالعىنىڭ،
كەسە وتكەن قويماۋشى ەدى قۇلىن جىقپاي...
وسى عاجايىپ ساپار جايىندا سۇراعان اعا استاناعا ورالا سالىسىمەن «ارقادان ارشاتىعا» دەگەن كولەمدى ساپارناما جازدى. بۇل دا ءبىر ەستەلىك قوي، اقىننىڭ سول جازباسىنان ءبىر شىمشىم ءۇزىندى كەلتىرە كەتەيىن. «وسكەن ەل» دەگەن ءبىر اۋەننىڭ سارىنى الىستان قۇلاققا ەستىلەردەي. «وسكەن ەل، سەن امان بول سايرانداعان...»، «.. .وسكەن ەلىم، وسكەن جەرىم، قوڭىر اڭ-قويداي ورگەن قوڭىر بەلىم...». شىڭگىلدىڭ اتاقتى جەتى ءانىنىڭ ءبىرى. اقى يەسى - قوجىكەن شوتاي ۇلى دەگەن جايساڭ قازاق. سوعان ۇقساس سارىن ساعىنىشپەن وسكەمەنگە كەلدىك. ءتور التايدىڭ وڭىرىندەگى ءوز ەلىڭە! وسكەمەن تۋرالى وسىنداي ءبىر ءان بار ما ەكەن دەگەن وي كەلەدى. مۇمكىن بار شىعار... ء يا، پاڭ شىعىستا ءبارى بار. وسى رەتكى ساياحاتتىڭ اقىلشىسى - وت ءتىلدى وراتور باۋىرىم ولجاس كەرەيحان.
كەشتەگى كەزدەسۋ ءساتتى ءوتتى. تەبىندى توپتان تەرەڭنەن تەرگەن مەرۋەرت جىرلار توگىلسىن كەلىپ! تالاپبەكتىڭ جاڭا ولەڭدەرى دە جاندى سۇگىرەتتەردەي....
سونىمەن وسكەمەننەن ەرتەمەن شىعىپ تاۋ جولىمەن سىپىرتىپ كەلەمىز. شامامەن التاي قالاعا شەيىن 185 شاقىرىم جول. ورماندى تاۋدىڭ يرەلەڭ اسفالتىمەن ورلەگەن سايىن بۇرىلىس، قيىلىسى كوپ كۇدىر. ەسكىلەۋ سۇرلەۋدىڭ جاعاسى قىساڭ بولسا دا جاماۋى جوق جيناقى. التايعا شەيىنگى قارا جولدىڭ ەكى قاناتى، قوس قاپتالى تۇگەلدەي بيداي مەن كۇنباعىس ەگىن القاپتارى. تاۋ باسىنا بۇل ۇيىرىلسە نوسەر توپەپ وتەتىن قاسيەتتى كەنەۋلى قويناۋ. قولاتتى قولتىقشالاردا بۇرىنعى سابەتتىك اۋىلداردىڭ (دەريەۆنيا) بىرنەشەۋى كەزدەسەدى. الدىمىزدا اققايىڭ اۋىلى. كۇدىرەيىپ تۇرعان جالدىڭ جاعالاۋ ۋىسىنا قونعان اۋىل قۇددى ىقتىرماداعى ءبىر قاۋىم ەلدىڭ جارىمى، بۇقتىرماعا سۇعىنعان تىرەمە ساي، اۋىلدى قيىپ وتەتىن كۇرە جولدىڭ ۇستىندەگى اققايىڭ تالاپبەكتىڭ اتبايلارى، اتاقونىسى. ارى قاراي تىنىسبەكتىڭ داراسى، سۇلۋ قاپتال، تۇگەل تۇڭكەلى مەكەن. تالاپبەكتىڭ كوزىنە كىرەۋكە تۇنىدى، كوكىرەگىمەن كۇللى التايدى قۇشىپ تۇرىپ اكەسىنە ارناۋىن وقىدى...»، - دەيدى.
ء بارى دە راس. كۇرە جول بويىنداعى اققايىڭ اۋىلىنا قونىستانعان تاكەڭنىڭ شاڭىراعىنا ارنايى باس سۇقپاستان بۇرىن ەڭ اۋەلى اتا جولىمەن اقساقالدىڭ باسىنا بارىپ قۇران وقىدىق. ءبىر قاراسام تالاپبەكتىڭ كوزتوستاعى كىرەۋكە جاسقا شوپىلدەپ كەتىپتى. كولدەنەڭ جاتقان كورىكتى تاۋدى نۇسقاپ: «مىنا تاۋدى وسى اۋىلدىڭ ادامدارى تىنىسبەكتىڭ داراسى دەپ اتايدى. جارىقتىق، الىپ اكەم ءوزى دە تاۋ سەكىلدى ادام ەدى عوي. ەندى مىنە، ناعىز تاۋدىڭ وزىنە اينالدى» دەپ تەبىرەندى تاكەڭ قوس كوزىنىڭ جاسىن ىركىپ. كەيىن اقىن شاڭىراعىنا باس سۇعىپ اناسىنىڭ قولىنان ارنايى ءدام تاتتىق. كەمەڭگەر اباي «بۇل بەس كۇندىك ءبىر مايدان ەر سىنارلىق» دەيتىن ەدى عوي. شىنىمەن دە سول بەس كۇندىك ساپار ازاماتتىڭ نارقىن سىناعان دۇنيە بولدى. مەنى ەرەكشە تاڭقالدىرعانى تاكەڭنىڭ تاريحي كەسەك جادىسى ەدى. اناۋ ارعى بەتتەگى تاريحي وقيعالار مەن كولەمدى ايتىستاردى ءۇستى-ۇستىنە توپەلەپ جاتقا سوعاتىن ەپيكالىق جادىسىنا اۋزىمدى اشىپ اڭتارىلدىم دا قالدىم. ال سۇڭقارشا شاشىپ جەيتىن ساحي قول جومارتتىعى مەن مارتتىگى ءوز الدىنا جەكە تاقىرىپقا جۇك. قاي ءسوزدىڭ بولسىن شىرايىن كىرگىزەتىن سىرباز اڭگىمەشىلدىگىن ايتساڭشى.. . اسىرەسە، كەز كەلگەن سيتۋاتسيادان ءسوز تاۋىپ كەتەتىن ادەمى ءازىلى ەكى ەزۋىڭدى ەش جيعىزبايدى. قاسىندا ءجۇرىپ كادىمگىدەي دەمالاسىڭ. وسىلايشا جان دۇنيەم دە ءبىر جىلى اعىس ورناعانداي بولدى. سول ساپاردا مەن تالاپبەكتى ەتەنە تانىدىم دەسەم، ەش وتىرىك ايتقاندىعىم ەمەس.
ايتپاقشى، جۋىردا تاكەڭ ەكى كىتابىن اكەلىپ قولىما تابىستاپ كەتتى. سول جيناققا ەنگەن «ابىلايدى اقتاۋ» دەگەن ولەڭىن وقىپ وتىرعاندا مىنا ءبىر جايدىڭ ەرىكسىز ەسىمە ءتۇسىپ كەتكەنى... ارينە، ولەڭدە ىلكىدە جانىبەك باتىردىڭ جاۋ شەبىندە قالعان حان ابىلايعا استىنا مىنگەن كوكدونەن اتىن كولدەنەڭ تارتاتىنى ءسوز بولادى. تاكەڭ سول تاريحي مىسالدى ولەڭ ولشەمىنە اينالدىرىپ باققان ەكەن. وسى تاقىلەتتەس «تۇلپار عۇمىر» دەگەن عازالىندا دا بىلاي دەيدى.
…مەن جانىبەك جاۋ قۋعان كوك دونەن،
ابىلاي استىندا تەرلەگەن.
دۇبىرى دۇنيە تەربەگەن،
تۇياعى تاس ءىلىپ كورمەگەن.
سەرىگىن سويقانعا بەرمەگەن… مۇنى ارنايى ايتىپ وتىرعانىم ىلگەرىدە قوس بۇيرەكتەن قاتار سىرقاتتانىپ اياق استىنان اۋرۋحاناعا ءتۇستىم. «اش ادام ۇرىسقاق، اۋرۋ ادام تىرىسقاق» دەيتىن ەدى عوي. اۋىرعان ادامعا كەز كەلگەن جاننىڭ جىلى ءسوزى تاسقا بادىزدەلگەن جازۋداي ءبارى دە قاپەرىڭدە قالادى ەكەن. سونداعى تاكەڭنىڭ وزىنشە مەنى سەرگىتپەك بولىپ كوڭىل دەمدەگەن ءازىل سوزدەرى ءالى كۇنگە دەيىن ەسىمدە. جوعارىداعى ولەڭدى مىسالعا كەلتىرگەندە مەن ابىلايمىن، ال تالاپبەك جانىبەك دەپ وتىرعان جوقپىن. ءبىراق مەن سول اتانىڭ سويىنان جاراتىلعان ءبىر تامشى قان ەكەندىگىمدى سوسىن...
قازاقتىڭ ارۋاق پەن تەك تانىمىن كولدەنەڭ تارتىپ قانا بۇل جايدى بايان ەتىپ وتىرمىن. سوندىقتان شىعار تاكەڭنىڭ «سەرىگىن سويقانعا بەرمەگەن…» ءسوزى تاريحي تەك، دالىرەك ايتساق ءتۇپساناما ەرەكشە جاقىن. اۋرۋدىڭ دا جاۋ شەڭگەلىنەن ءبىر مىسقال كەمدىگى جوق قوي. مۇندايدا جانىڭا اراشا بولار «كوك دونەن» كوڭىل قاجەت ەكەن. تەلەفونمەن ۇزاق تىلدەسىپ بولعاننان كەيىن «قۇدايىم-اۋ، مىناۋ كوپ عاسىردان كەيىن كوزىمە كورىنگەن جانىبەكتىڭ كوك دونەنى بولماسا جارار ەدى دەدىم ىشتەي ريزا بولىپ...
«ەركىن ەلدىڭ اۋاسى قانداي عاجاپ»
تالاپبەك - اتاجۇرتقا ورالعان ارعى بەتتىڭ قازاعى. سوندىقتان ول وسى جازمىشىن اق قاعاز بەتىنە بىلايشا دەستەلەيدى.
ارعى جاعى ەرتىستىڭ بەرگى جاعى،
ەرتەگىدەي ەلىگىم ەندى ءبارى.
جاعالاۋدى كەزەدى جان قۇمارى،
سەن كىنالى ەمەسسىڭ، مەن كىنالى.
ارعى جاعى ەرتىستىڭ اتام قالعان،
اھ ۇرعىزا بەرەدى احاۋ جالعان.
بەرگى جاعى ەرتىستىڭ وتان قورعان،
بوزداتادى بەيمەزگىل بوتاڭدى ارمان.
اقىن شىن مانىندە كەشەگى الاساپىران جىلداردان تۋعان ەشكىم دە «كىنالى ەمەس» پەندەنىڭ ءپارۋانا تاعدىرىن ەرتىستىڭ ەكى جاعىنا تەڭەيدى. ءسوز جوق، ەن داريانىڭ ەكىنشى بەتى - اتامەكەن توپىراعى. ەندى ول جاققا قالاي وتۋگە بولادى؟ جاس بالانى بوتاداي بوزداتقان ماسەلە دە وسى. بۇل جەردە تاۋەلسىزدىك قوس جاعالاۋدى قوساتىن «وتكەل» ەسەبىندە. وسى «وتكەل» ومىرگە كەلمەيىنشە ادامنىڭ ەكىنشى تاراپقا ءوتۋى ەش مۇمكىن ەمەس. ال اققان سۋ مەن ۇشقان قۇسقا مۇنىڭ ءبىرى دە قاجەتى جوق. اقىن پايىمىندا اتامەكەن ارۋانا بەينەسىندە بولسا، ال ءوزى وعان زارىعىپ جەتە الماي جۇرەگى شولدەگەن بوتا ەسەبىندە. بەرگى بەتتىڭ جۇگىرگەن اڭىن ايتپاعاندا، قىل اياعى قوپارىلا قارعاسى دا قازاقستانعا قاراي ۇشىپ كەتكەن.
قىسقاسى، اقىن سوقا باسى سوپيىپ جۇرتتا قالعانداي ەرەكشە كۇي كەشەدى. بۇل بەينەبىر «اۋ، قارعالار، قارعالار قاناتىمەن جورعالار» دەپ ەلىنە سالەم ايتىپ ەڭىرەيتىن ىلكىدەگى «التىنساقا» ەرتەگىسىندەگى جاس بالانىڭ تىلەگىنە ۇقسايدى. وسى جان دۇنيەسىندەگى جەتىمەك جايدى اقىن بىلايشا باياندايدى.
قازاقستانىم، جۇماق مەكەنىم،
كۇرسىنسەم كوزدى بۇلاقتى ەتەمىن..
.. قابانىڭ قارا قارعالارى دا،
قازاقستانعا قاراي ۇشاتىن.
تۇراعىم ەرتىس باسى بولاتىن،
ارناڭنان الاش اسىن الاتىن.
جەرۇيىق مەكەن جەتۋگە ساعان،
جەتى قابام دا اسىعا اعاتىن.
جەرىڭنىڭ ءيسىن جەل جەتكىزەتىن،
ساعىنىش دەرتى مەڭدەتكىزەتىن.
كۇڭىرەنەمىن، كۇيىك ەمەمىن،
كۇن بولار ما ەكەن سەندە وتكىزەتىن؟ !
قۇدايشىلىعىن ايتىڭىزشى، ادامنىڭ اتاجۇرتىنا دەگەن اسقاق ىنتىزارلىعىن بۇدان ارتىق قالاي جەرىنە جەتكىزە جىرلاۋعا بولادى. اسىرەسە، «جەرىڭنىڭ ءيسىن جەل جەتكىزەتىن...»، «جەرۇيىق مەكەن جەتۋگە ساعان، جەتى قابام دا اسىعا اعاتىن...» جولدارىن وقىعاندا جون ارقاڭ شىمىرلاپ كەتەدى.
تالاپبەكتىڭ اتالعان وسى «ارعى جاعى ەرتىستىڭ بەرگى جاعى» كىتابىندا ايرىقشا توقتالا كەتەتىن تاعى ءبىر دۇنيە بار. ول الىپتار گالەرياسىن سومداعان اۆتوپورترەتتىك ولەڭدەرى دەر ەدىك. مىسالى، ماعجان جۇمابايەۆقا ارنالعان «قايران ماعجان»، وسپان باتىرعا ارنالعان «ەسكەرتكىش»، «قوڭىر ولەڭ، قوڭىر ءۇن» (جۇمەكەنگە)، «تارپاڭ مىنەز» (تۇرسىنبەك كاكىش ۇلىنا)، «اعا» (مۇحتار ماعاۋينگە)، «قاپاستاعى قىران» (قاجىقۇمار شابدان ۇلىنا)، «اقتالۋ» (سەيىت قاسقاباسوۆقا)، «تەكتى دە كەكتى ۇل» (جاقسىلىق ءساميت ۇلىنا)، «سەنىڭ جىرىڭ» (مۇحتار شاحانوۆقا) «اقىن انا» (فاريزا وڭعارسىنوۆاعا)، «ەمەسسىڭ جالعىز ەندى اعا» (جاركەن بودەش ۇلىنا) ارنالعان ولەڭدەرى. ءيسى قازاققا ەسىمدەرى ءمالىم ايتۋلى تۇلعالاردىڭ بىزگە بەيمالىم ىشكى سىرىن، سونداي-اق تۇلعالىق تانىمىن سومداپ كورسەتۋدە وسى سيكلدى ولەڭدەردىڭ ەستەتيكالىق مازمۇنى جوعارى. قوش، سونىمەن 1991 -جىلى اتىڭنان اينالايىن ازاتتىقتىڭ ارقاسىندا ارعى بەتتە قالعان قوڭىر قازاقتىڭ ۇلى كوشكەرۋەنى باستالدى.
اۋلىم كوشىپ كەلەدى التاي اسىپ،
قايعىمدا ءوسىپ كەلەدى تاي تالاسىپ.
تەربەتكەنمەن قوينىنا قانشا باسىپ،
مەن كوكتەمنەن قالدىم با قايتا اداسىپ؟.
اۋلىم كوشىپ كەلەدى ەستى كەشتەن،
جەتىم تايلاق بوزدايدى كوشكە ىلەسكەن.
كوز الدىما كەلەدى ەسكى مەكەن،
بابام جاۋمەن باس بەرىپ كەسكىلەسكەن.
اۋلىم كوشىپ بارادى اسىپ بەلدەن،
قۇت مەكەنىن قالدىرىپ ءناسىپ كورگەن.
انام جىلاپ قارادى جاسىپ شەردەن،
قارا ارعىماق بارادى باسىپ كەردەڭ.
اۋلىم كوشىپ كەلەدى ەل قايدالاپ،
التاي انا قۇشباسسىڭ ەندى ايمالاپ.
دەرتى دە ەردىڭ جازىلار قون قاۋمالاپ،
ەركىن ەلدىڭ اۋاسى قانداي عاجاپ؟ !
مىنە، قانشا جىل زارىعىپ، ىنتىزار بولىپ دەرتتەنگەن ەلىڭە دە ەسەن-ساۋ جەتتىڭ، تالاپبەك. ازامات رەتىندە ارمانىڭ جوق! راس، باسقا بىلمەسە دە تاۋەلسىزدىكتىڭ قادىرىن سەنىڭ ءبىر كىسىدەي بىلەتىنىڭە زارەدەي دە ءشۇبا ەتپەيمىن. مانا ءسوز باسىندا اتامەكەن ارۋانا ەسەبىندە بولسا، ءبىز ونىڭ قۇلدىراڭداعان ءتولى ەسەبىندەمىز دەدىك. مۇنى اتام قازاق «ەنەسى تەپكەن قۇلىننىڭ ەتى اۋىرمايدى» دەپ تاپسىرلەيتىن ەدى عوي. ەندەشە، ەگەمەندىك ءۇشىن كورگەن قۇقايىمىز دا، جەگەن تاياعىمىز دا ءتاتتى. سەنىڭ دە ەسىڭ شىعا ماساتتانىپ «ەركىن ەلدىڭ اۋاسى قانداي عاجاپ» دەپ وتىرعانىڭ دا وسى ەمەس پە!؟ قايىرا ايتايىن، اڭساعان اتامەكەنىڭە جەتتىڭ. ەندى ەگەمەن ەلدىڭ باسىنا بۇعاۋ تۇسىرمەگەن اپاي ءتوس اقىنىسىڭ! سوندىقتان دا تومەندەگىدەي تولايىم ءسوز تولعايتىنىڭا قاقىڭ بار دەپ ەسەپتەيمىن.
توم، توم تارتۋ بەرمەسەم دە مەن ەلگە،
ەس بىلگەلى ەگىز ەكەم ولەڭگە.
شۋماقتارى شۇباتىلىپ توبەمدە،
تارماقتارى تارقاتىلىپ تومەندە.
سەكىلدەنىپ سەتەرلەنگەن ۇياڭ قىز،
جازدىم ولەڭ، اندىز-اندىز، تىم اندىز.
تىرلىك جولى تارام-تارام تۇماندى ءىز،
ولەڭ ءۇشىن وكىنبەيمىز بۇعان ءبىز.
ات جەتەلەپ، اتان قومداپ ءبوزدى العان،
اتامىزدان ايتا جۇرەر ءسوز قالعان.
دۇعامدا وسى، دۋامدا وسى بار بولعان،
ءار ولەڭىم ءار قازاققا كوز مارجان.
اقىننىڭ جاقسى جىر جازعانى دا ەلىنىڭ ەرتەڭىنە تىلەگەن دۇعاسى مەن ءمىناجاتى ەمەس پە!؟. ءوزىڭنىڭ دۋاڭ مەن دۇعاڭداي بولعان وسى ءبىر تاڭعى شىقتاي تاپ-تازا «كوز مارجان» عازالدارىڭنىڭ عۇمىرى قاشاندا ۇزاعىنان بولسىن!
ءبىزدىڭ ۆاتساپ كانالىمىزعا جازىلىڭىز.
ىقىلاس وجاي ۇلى