لوندوندا قازاقستاننىڭ تۋريستىك الەۋەتى تانىستىرىلدى
ەلىمىزدىڭ تۋريستىك الەۋەتى تۇماندى البيوندا تانىستىرىلدى. دۇنيەجۇزىلىك تۋريزم جارمەڭكەسىنە الەمنىڭ تۇكپىر- تۇكپىرىنەن جينالعان قاۋىمعا ۇلى دالا ەلىنە ساياحاتتاۋدىڭ ارتىقشىلىقتارى تۋرالى ايتىلدى. وتاندىق تۋروپەراتورلار شەتەلدىك ارىپتەستەرىمەن ىسكەرلىك قارىم- قاتىناستار ورناتتى، دەپ حابارلايدى Kazinform.
الماتى قالاسى دۇنيەجۇزىلىك تۋريزم جارمەڭكەسىنە جىل سايىن قاتىسادى. بيىل ول بەسىنشى رەت قازاقستاندىق ءىرى مەگوپوليستىڭ تۋريستىك الەۋەتىن ىلگەرىلەتۋ ءۇشىن شەتەلدىك تۋروپەراتورلارمەن ىسكەرلىك كەزدەسۋلەر وتكىزدى. الماتى تۋريزم باسقارماسى جانە تۋريستىك وپەراتورلار 3 كۇن بويى جۇزدەن استام كەلىسىم- شارتقا قول قويىپ، ىسكەرلىك جانە ەتنوتۋريزم باعىتتارى بويىنشا ناسيحات جۇمىستارىن جۇرگىزدى.
«الماتى مادەني تۋريستىك ورتالىق بولىپ سانالادى. بىزدە ايتا كەتسەك: شىمبۇلاق، مەدەۋ، كوكتوبە سياقتى كورىكتى جەرلەرىمىز بار. ستاتيستيكاعا سۇيەنەتىن بولساق، بيىل 17 مىڭنان استام تۋريست كەلگەن. 2022- جىلمەن سالىستىرعاندا 65 پايىزعا كوپ بولىپ تۇر»، دەيدى الماتى قالاسى تۋريزم باسقارماسى باسشىسىنىڭ ورىنباسارى اقمارال ەسجانوۆا.
بۇل تەك الماتى بويىنشا عانا كورسەتكىش. ال بۇكىل ەل بويىنشا سوڭعى جارتى جىلدا 3,5 ميلليون شەتەلدىك ساياحاتشى قازاقستانعا تابان تىرەگەن. التايدان اتىراۋعا، الاتاۋدان ارقاعا دەيىن سوزىلعان كەڭ بايتاق قازاق دالاسىن كورگىسى بار تۋريستەر كوپ. اسىرەسە بريتان جۇرتشىلىعى اراسىندا. ساپارعا شىقپاس بۇرىن ولار بارلىعىن الدىن الا زەرتتەپ، ۇلكەن دايىندىقپەن كەلەدى. ساياحاتشىلارعا شاتقالدار، ساياباقتار، جىبەك جولى كەرۋەندىك جول باعىتى - ءبارى-ءبارى قىزىق. ونىڭ ۇستىنە اعىلشىنداردان 30 كۇنگە دەيىن ۆيزا تالاپ ەتىلمەيدى. كۇن سايىن ۇشاتىن تىكەلەي رەيس تاعى بار.
«وتكەن جىلى بىزگە قازاقستانعا بارۋ باقىتى بۇيىردى. اقتاۋ جانە الماتىنىڭ اسەم تابيعاتىن تاماشالادىق. ءتانتى بولعانىمىز سونشالىق الداعى ۋاقىتتا بريتان حالقىن كوپتەپ تارتقىمىز كەلىپ كەتتى. شىنى كەرەك، ەكى ەل اراسى الشاقتاۋ. ءبىراق ۇلى دالا ەلىنە جەتكەننەن كەيىن قۇشاق جايا قارسى الىپ، قوناقجايلىق تانىتقان قازاقتاردى كورگەن اعىلشىندار ريزا بولىپ جاتادى»، دەيدى بريتانيالىق تۋريستىك كومپانيا ديرەكتورى نيكولاس كورنەي.
42 جىلدىق تاريحى بار دۇنيەجۇزىلىك تۋريزم جارمەڭكەسى 184 ەلدەن كەلگەن 35 مىڭنان استام سالا مامانىنىڭ باسىن قوستى. بيىلعى شارا «قايتا قاۋىشۋ، قايتا ويلاۋ جانە قايتا قۇرۋ» تاقىرىبىندا ءوتىپ جاتىر جانە سوڭعى جىلدارى سالانىڭ دامۋىنا تۇساۋ بولعان تۇيىتكىلدەرگە نازار اۋدارىپ، بولاشاققا باعدار جاساۋعا زور مۇمكىندىك بەرۋدە.
اۆتور
عالىمجان قارامان ۇلى