پاراسپورتشى نۇرداۋلەت جۇماعالي قازاقستانعا بەسىنشى التىندى اكەلدى

ن. جۇماعالي SB13 ساناتى بويىنشا 100 مەترگە براسس ادىسىمەن جۇزۋدە 1:05.92 ناتيجەمەن مارە سىزىعىن ءبىرىنشى بولىپ قيدى.

وزبەكستاندىق فيرداۆسبەك مۇسابەكوۆ ەكىنشى، تاعى ءبىر قازاقستاندىق نۇرالي سوۆەتقانوۆ ءۇشىنشى ورىنعا كوتەرىلدى.

وسىلايشا، قازاقستاندىقتار التىن مەدال سانىن 5 كە جەتكىزدى.

سونىمەن قاتار باتىسقازاقستاندىق پاراتاەكۆوندوشى ماريام سالىمگەرەيەۆا 65 كەلىگە دەيىنگى سالماقتا قولا جۇلدەنى جەڭىپ الدى.

ب ق و دەنە شىنىقتىرۋ جانە سپورت باسقارماسىنان تۇسكەن مالىمەتكە قاراعاندا، ماريام ماگومەدسايد قىزى 1998-جىلدىڭ 13- ناۋرىزىندا رەسەي فەدەراتسياسى داعىستان رەسپۋبليكاسى كاسپيسك قالاسىندا دۇنيەگە كەلگەن.

2015-2019-جىلدارى ماحاچكالا قالاسىنداعى داعىستان مەملەكەتتىك پەداگوگيكالىق ۋنيۆەرسيتەتىنىڭ دەنە شىنىقتىرۋ جانە تىرشىلىك قاۋىپسىزدىك نەگىزدەرى فاكۋلتەتىن ءبىتىرىپ، جوعارى ءبىلىم العان.

ۋنيۆەرسيتەت قابىرعاسىندا وقىپ ءجۇرىپ، پاراتاەكۆوندو سپورتىمەن شۇعىلدانا باستاعان.

2021-جىلى وتباسى جاعدايىمەن باتىس قازاقستان وبلىسى ءبورلى اۋدانى ورتالىعى اقساي قالاسىنا قونىس اۋدارعان.

باپكەرى - قازاقستاننىڭ ەڭبەك سىڭىرگەن جاتتىقتىرۋشىسى - ەربول مەرعاليەۆ.

ەسكە سالا كەتەيىك، بۇدان بۇرىن ازيا پارا ويىندارىندا قازاقستان قورجىنىنا تاعى ءۇش مەدال تۇسكەنىن جازعان بولاتىنبىز.

سونداي-اق پارادزيۋدوشى ولجاس ورازالى ۇلى قازاقستان قورجىنىنا ءتورتىنشى التىندى سالدى.