گارۆاردتا قانشا قازاقستاندىق ءبىلىم الىپ ءجۇر

استانا. KAZINFORM - قازاقستاننىڭ عىلىم جانە جوعارى ءبىلىم مينيسترلىگى گارۆاردتى شەتەلدىك ستۋدەنتتەردى وقىتۋ قۇقىعىنان ايىرۋ تۋرالى شەشىمگە پىكىر ءبىلدىردى.

- گارۆارد ۋنيۆەرسيتەتىنە قاتىستى بىزگە ساۋالدار ءتۇسىپ جاتىر. ءبىز تەك مىنا اقپاراتپەن بولىسە الامىز: بۇگىنگى تاڭدا «بولاشاق» باعدارلاماسى بويىنشا گارۆاردتا 7 ادام ءبىلىم الۋدا. باسقا باعدارلامالار نەمەسە ءوز قاراجاتىنا وقىپ جاتقان ستۋدەنتتەر تۋرالى مالىمەت بىزدە جوق. مۇنداي جاعدايلار بويىنشا ءتيىستى سۇراۋلار جولدانادى، - دەپ جازدى مينيسترلىكتىڭ رەسمي وكىلى ولجاس بەركىنبايەۆ Facebook جەلىسىندە.

ەسكە سالا كەتسەك، ترامپ اكىمشىلىگى گارۆاردتى شەتەلدىك ستۋدەنتتەردى وقىتۋ قۇقىعىنان ايىردى. ۋنيۆەرسيتەت ەندى ستۋدەنتتىك ۆيزا الۋعا قاجەتتى قۇجاتتاردى بەرە المايدى. قازىردىڭ وزىندە وقىپ جاتقان شەتەلدىكتەر باسقا ۋنيۆەرسيتەتتەرگە اۋىسۋعا ءماجبۇر بولادى، ايتپەسە ولار دەپورتاتسياعا ۇشىرايدى.

گارۆارد بۇل شەشىمدى زاڭسىز دەپ اتاپ، حالىقارالىق ستۋدەنتتەر ۋنيۆەرسيتەت پەن ەلدى بايىتادى دەپ مالىمدەدى. قازىرگى ۋاقىتتا ۋنيۆەرسيتەتتە 7 مىڭعا جۋىق شەتەل ازاماتى ءبىلىم الىر جاتىر - بۇل ستۋدەنتتەردىڭ جالپى سانىنىڭ تورتتەن ءبىرىن قۇرايدى.

ا ق ش گارۆارد- قا بولىنەتىن 2,2 ميلليارد دوللار مەملەكەتتىك قارجىلاندىرۋدى توقتاتتى. بۇل ءۇشىن گارۆارد ۋنيۆەرسيتەتى ترامپ اكىمشىلىگىن سوتقا بەردى.

بۇعان دەيىن گارۆارد كىتاپحاناسى مەن ءارحيۆى قازاق عالىمدارىنا قولجەتىمدى بولعانىن، گارۆارد ماماندارى قازاقستاننىڭ سيرەك قولجازبالارىن سيفرلاندىراتىنىن جازعان ەدىك.