لارس لەككە راسمۋسسەن 2009 -جىلدان بەرى قازاقستانعا كەلىپ تۇرعان دانياداعى ءبىرىنشى مينيستر ەكەن. سوزىنشە، ونىڭ قازاقستانعا ساپارى دانيانىڭ ەكىجاقتى قارىم-قاتىناستى دامىتۋعا دەگەن نيەتىن كورسەتەدى.
ول Carlsberg كومپانياسىنىڭ الماتى وبلىسىنداعى جاڭا ءوندىرىس ورنىنىڭ اشىلۋىمەن قۇتتىقتادى. ايتۋىنشا، قۇنى 344 ميلليون دوللار بولاتىن جوبا ەكى ەل اراسىنداعى ىنتىماقتاستىقتىڭ قانداي ناتيجەلەرگە اكەلەتىنىن كورسەتتى.
- قازاقستان مەن دانيا گەوگرافيالىق تۇرعىدان ءبىر-بىرىنەن الىس ورنالاسقان مەملەكەتتەر بولعانىمەن، بۇل بىرلەسىپ جۇمىس ىستەۋگە كەدەرگى ەمەس. بۇگىن اشىلعان جاڭا كاسىپورىن - سونىڭ ايقىن دالەلى. ەڭ باستىسى - بىرگە جۇمىس ىستەۋگە دەگەن نيەتىمىز، ءبىر-بىرىمىزگە دەگەن سەنىم جانە ۇزاق مەرزىمدى سەرىكتەستىككە دايىندىعىمىز. بۇگىن ءبىز سونىڭ ناقتى ۇلگىسىن كورىپ وتىرمىز، - دەدى دانيا سىرتقى ىستەر ءمينيسترى.
راسمۋسسەن قازاقستاننىڭ الەۋەتىن وتە جوعارى باعالايتىنىن جانە بۇل ەل ورتالىق ازياداعى ەكونوميكالىق ءوسىمى جوعارى مەملەكەتتەردىڭ ءبىرى ەكەنىن اتاپ ءوتتى. سول سەبەپتى Carlsberg سىندى ءىرى كومپانيالار قازاقستانعا قىزىعۋشىلىق تانىتىپ، قوماقتى ينۆەستيتسيا سالىپ جاتىر. ول مۇنى جاي اقشا بەرۋ ەمەس، ۇزاق مەرزىمدى مىندەتتەمە رەتىندە كورەتىنىن ايتادى.
- ەكى ەل اراسىنداعى بەرىك ءارى ۇزاق مەرزىمدى قارىم-قاتىناستاردى نەگىزىنەن كومپانيالار جانە ينۆەستيتسيالار قالىپتاستىرادى. دانيالىق كومپانيا قازاقستانعا ينۆەستيتسيا سالعاندا، ول اقشا عانا ەمەس، تەحنولوگيا، تاجىريبە، جۇمىس ورىندارى جانە، ەڭ ماڭىزدىسى، ەلدىڭ بولاشاعىنا دەگەن سەنىمدى ارقالاپ كەلەدى. سەرىكتەستىك وسىلايشا ناقتى ىسكە، ءىرى جوباعا اينالادى، - دەدى ول.
Carlsberg قازاقستاندا وتىز جىلدان بەرى جۇمىس ىستەپ كەلەدى. ال بۇل جاڭا جوبا تاعى 200 جۇمىس ورنىن اشۋعا مۇمكىندىك بەرەدى. مينيستر Carlsberg-تىڭ بۇل ينۆەستيتسياسى قازاقستانعا باسقا دا دانيالىق كومپانيالاردىڭ قارجى قۇيۋىنا جول اشادى دەگەن ۇمىتتە.
- اۋداندىق تا، وڭىرلىك دەڭگەيدە دە جوباعا قولداۋ كورسەتىلدى. وسى رەتتە جەرگىلىكتى بيلىك ورگاندارىنا العىس ايتقىم كەلەدى. جاس كەزىمدە ءوزىم دە اكىمدىكتە جۇمىس ىستەگەنمىن. سوندىقتان بۇل جوبانىڭ ءبىر جىلدان از ۋاقىت ىشىندە جۇزەگە اسىرىلعانىنا وتە قاتتى تاڭعالدىم. وسىلايشا قازاقستاننىڭ بيزنەس ءۇشىن جاعداي قالىپتاستىرا الاتىنىن كوردىك، - دەدى شەتەلدىك شەنەۋنىك.
ول كاسىپورىندا پايدالانىلاتىن بارلىق ءونىمنىڭ p ى جەرگىلىكتى وڭىردە وندىرىلەتىنىنە ءمان بەردى. بۇل ءوز كەزەگىندە قوسىمشا ەكونوميكالىق بەلسەندىلىكتى قالىپتاستىرىپ، جاڭا مۇمكىندىكتەرگە جول اشادى دەيدى.
- بۇل - ەكى تاراپقا دا ءتيىمدى ىنتىماقتاستىق. سەبەبى جوبا قازاقستاننىڭ ەكونوميكاسىنا، سونىڭ ىشىندە ءوڭىر ەكونوميكاسىنا ۇلەس قوسىپ قانا قويماي، دانياداعى بيزنەستىڭ دامۋىنا دا ماڭىزدى سەرپىن بەرەدى، - دەپ اتاپ ءوتتى ول.
دانيا سىرتقى ىستەر ءمينيسترىنىڭ قازاقستانداعى جوسپارى
1-قازان مارتەبەلى قوناق زاۋىت اشىلۋىنان بولەك قونايەۆتا وتەتىن ءىرى قازاقستان- دانيا بيزنەس فورۋمىنا قاتىسادى.
ال 2 قازان استانادا لارس لەككە راسمۋسسەن قاسىم-جومارت توقايەۆپەن جانە سىرتقى ىستەر ءمينيسترى مۇحتار تىلەۋبەردىمەن كەزدەسەدى. كەزدەسۋدەن كەيىن ساۋدا-ەكونوميكالىق جانە ينۆەستيتسيالىق ىنتىماقتاستىق جونىندەگى ەكىجاقتى كوميسسيا قۇرۋ جانە ءوزارا تۇسىنىستىك تۋرالى مەموراندۋمعا قول قويىلماق.
- دانيا مەن قازاقستان اراسىنداعى كەلىسسوزدەر ەۋروپالىق وداقتىڭ ورتالىق ازيامەن قارىم-قاتىناستى كەڭەيتۋ نيەتىمەن ۇندەسەدى. كەزدەسۋلەردە دانيانىڭ عانا ەمەس، ەۋروپالىق وداققا مۇشە باسقا ەلدەردىڭ دە ورتالىق ازياداعى قىزمەتىن ءارى قاراي كەڭەيتۋگە باعىتتالعان مەموراندۋمدارعا قول قويۋ جوسپارلانىپ وتىر، - دەدى لارس لەككە راسمۋسسەن.
ەسكە سالساق، دانيالىق FLSmidth قازاقستانداعى ءوندىرىستى لوكاليزاتسيالاۋعا ينۆەستيتسيا قۇياتىنى حابارلاندى.