پاراليمپيادا ويىندارىندا قولا جۇلدە العان اتىراۋلىق پارادزيۋدوشىلارعا كولىك بەرىلدى
اتىراۋ. KAZINFORM - پاريج پاراليمپياداسىندا اتىراۋلىق پارادزيۋدوشىلار زارينا رايفوۆا مەن جۇرقامىرزا شۇكىربەكوۆ قولا جۇلدە العان ەدى. جۇلدەگەرلەر مەن ولاردىڭ باپكەرى جاندوس قيانوۆقا كولىك بەرىلدى.
اتىراۋ وبلىسىندا مۇمكىندىگى شەكتەۋلى 1367 ادام سپورتپەن شۇعىلدانادى. ونىڭ ىشىندە 16 پاراسپورتشى پاريج پاراليمپياداسىندا سپورتتىڭ بىرنەشە تۇرىنەن - پارادزيۋدو، پاراتاەكۆوندو، ۆولەيبولدى وتىرىپ ويناۋ، پاراۇستەل تەننيسى جانە پاراجەڭىل اتلەتيكادان سىنعا ءتۇستى.
ماسەلەن، پاراتاەكۆوندودان نۇرلان دومبايەۆ پەن پاراجەڭىل اتلەتيكادان گۇلباقىت قايىرجانوۆا ۇزدىك بەستىككە ەندى. ۆولەيبولدى وتىرىپ ويناۋدان ۇلتتىق قۇرامانىڭ ساپىنا اتىراۋلىقتار قۋانىش تاجىكوۆ، باۋىرجان سارتايەۆ، پەردەباي نامۇراتوۆ، اقىلبەك شىكىبايەۆ، بەرىك ىزماعانبەتوۆ، جانعالي سۇيەۋوۆ، نۇرتاۋ مۇقانبەتقالييەۆ پەن ەرلان بيتەمىروۆ كىردى. ولار كوماندامەن بىرگە بەسىنشى ورىنعا يە بولدى. پارادزيۋدودان باق سىناعان 5 پارادزيۋدوشىنىڭ ەكەۋى - زارينا رايفوۆا مەن جۇرقامىرزا شۇكىربەكوۆ پاراليمپيادانىڭ قولا جۇلدەگەرى اتاندى.
وبلىس اكىمى سەرىك شاپكەنوۆ XVII جازعى پاراليمپيادا ويىندارىنىڭ جۇلدەگەرلەرى مەن قاتىسۋشىلارىن سپورتتاعى جوعارى جەتىستىگىمەن قۇتتىقتادى.
«سىزدەر پاريج پاراليمپياداسىنداعى جەتىستىكتەرىڭىزبەن جاستارعا ۇلگى كورسەتتىڭىزدەر. اتىراۋ جۇرتشىلىعى دا ەل نامىسى جولىندا ايانباي تەر توگىپ، بيىك ماقساتقا كوز تىككەن وزدەرىڭىزدى ماقتان تۇتادى. الدا الار اسۋ بيىك بولىپ، جۇلدەلەرىڭىز كوبەيسىن»، - دەدى سەرىك شاپكەنوۆ.
اكىم اتىراۋ سپورتىن دامىتۋعا ۇلەس قوسىپ جۇرگەن سپورتشىلارعا العىس حات پەن اقشالاي سەرتيفيكات تاپسىردى. «Infinity Eco Park» كومپانياسى پاريج پاراليمپياداسىنىڭ قولا جۇلدەگەرلەرى زارينا رايفوۆا مەن جۇرقامىرزا شۇكىربەكوۆكە، ولاردىڭ باپكەرى جاندوس قيانوۆقا «Zeekr» اۆتوكولىگىن سىيعا تارتتى.
ەسكە سالا كەتەلىك، بۇدان بۇرىن اتىراۋلىقتار پاريج وليمپياداسىنان ورالعان ءابيبا مەن ەسميگۇلگە كولىك سىيلاعانىن جازعان ەدىك.