پاراليمپيادا چەمپيونى داۆيد ديگتياريەۆ جاڭا پاتەر جانە 25 ميلليون تەڭگەنىڭ اقشالاي سەرتيفيكاتىنا يە بولدى
كوكشەتاۋ. قازاقپارات - اقمولا وبلىسىنىڭ اكىمى مارات احمەتجانوۆ پاريج قالاسىندا وتكەن وليمپيادا جانە پاراليمپيادا ويىندارىندا توپ جارعان جانە قاتىسقان سپورتشىلاردى سالتاناتتى تۇردە ماراپاتتادى.
جيىندا ءسوز سويلەگەن ايماق باسشىسى مارات احمەتجانوۆ سپورتشىلاردى جانە جاتتىقتىرۋشىلاردى ءتورت جىلدا ءبىر كەلەتىن بايراقتى جارىستا جەتكەن جەتىستىكتەرىمەن قۇتتىقتادى.
«سىزدەردىڭ جەڭىستەرىڭىز - باتىلدىق پەن شەكسىز ادامي مۇمكىندىكتەردىڭ ايقىن كورىنىسى. ول كوپ جىلعى ەڭبەكتىڭ، ەرىك-جىگەردىڭ جانە ومىرلىك قيىندىقتاردان باس تارتپاۋ قابىلەتىنىڭ ناتيجەسى. مەملەكەت وسى ماڭىزدى سالاعا جان-جاقتى قولداۋ كورسەتەدى. پرەزيدەنت قاسىم-جومارت توقايەۆ وليمپيادا ويىندارىنا قاتىسۋشىلارمەن كەزدەسۋدە سپورت سالاسىنداعى نەگىزگى مىندەتتەر مەن باسىمدىقتاردى تۇجىرىمدادى. بولاشاقتا ءبىز العا قويعان ماقساتتارعا جەتۋ ءۇشىن جۇمىس ىستەيتىن بولامىز. قازاقستاندىق سپورتتىڭ بولاشاعى سىزدەردىڭ ءارقايسىلارىڭىزعا بايلانىستى»، - دەدى مارات احمەتجانوۆ.
سالتاناتتى شارادا ايماق باسشىسى پاراليمپيادانىڭ ەكى دۇركىن چەمپيونى داۆيد دەگتياريەۆكە 3 بولمەلى پاتەرگە جانە اقشالاي سىياقىعا، كۇمىس مەدال يەگەرى ەركىن عابباسوۆقا 2 بولمەلى پاتەرگە جانە اقشالاي سىياقىعا سەرتيفيكاتتار تابىس ەتتى. ال ولاردىڭ جاتتىقتىرۋشىلار يۋري كولەسنيكوۆ پەن ءمۇسلىم سارسەمبەكوۆكە اقشالاي سەرتيفيكات بەرىلدى. سونىمەن بىرگە، قىزدار اراسىندا وليمپياداعا قاتىسقان كارينا يبراگيموۆا مەن ونىڭ جاتتىقتىرۋشىسى الەكساندر ۆىسوتسكي باعالى سىيلىققا يە بولدى. ءوز كەزەگىندە سپورتشىلار كورسەتىلگەن قولداۋعا العىس ايتىپ، جوعارى جەتىستىكتەرگە جەتۋگە ۋادە بەردى.
«وسىنشاما قولداۋ ءبىلدىرىپ وتىرعان جانكۇيەرلەرىمە، تۋعان-تۋىستارىما جانە وبلىس باسشىلىعىنا شىنايى العىسىمدى بىلدىرەمىن. جەڭىس تۇعىرىنان كورىنىپ كەلە جاتقانىمىز سىزدەردىڭ قولداۋلارىڭىزدىڭ ارقاسىندا، سەنىمدەرىڭىزدى الداعى ۋاقىتتا دا اقتاۋعا تىرىسامىز»، - دەپ العىسىن ءبىلدىردى پاراليمپيادانىڭ ەكى دۇركىن چەمپيونى داۆيد دەگتياريەۆ.
ايتا كەتسەك، داۆيد دەگتياريەۆ پاريجدە وتكەن پاراليمپيادا ويىندارىندا پاۋەرليفتينگتەن 54 كەلىگە دەيىنگى ساناتتاعىلار اراسىندا چەمپيون اتانعان بولاتىن. ال ەركىن عابباسوۆ 10 مەتر قاشىقتىققا پنيەۆماتيكالىق مىلتىقتان وق اتۋدان جارىستىڭ فينالىندا كۇمىس مەدال جەڭىپ الدى.
اۆتور
اسلان وسپانوۆ