پاراليمپيادا-2024: قازاقستان قورجىنىنا تاعى ءبىر قولا مەدال ءتۇستى
14:17, 08 - قىركۇيەك 2024
استانا. KAZINFORM - فرانسيا استاناسى پاريج قالاسىندا ءوتىپ جاتقان پاراليمپيادا ويىندارىندا قازاقستان قورجىنىنا تاعى ءبىر مەدال ءتۇستى.
بۇگىن پارا دزيۋدودان ايەلدەر اراسىندا 70+ كەلى سالماق دارەجەسىندە J2 كلاسىندا ەل نامىسىن قورعاعان زارينا رايفوۆا قولا مەدال جەڭىپ الدى.
ول قولا جۇلدە ءۇشىن بەلدەسۋدە يتالياندىق كارولينا كوستادان باسىم ءتۇستى. بۇعان دەيىن، جۇبانىش بەلدەسۋىندە، زارينا اۆستراليالىق تەيلور گوسەنستى يپپونمەن جەڭگەن بولاتىن. شيرەك فينالدا رايفوۆا قىتايلىق ۆان ح. يپپونمەن ەسە جىبەردى.
وسىلايشا، قازاقستان قۇراماسىنىڭ مەدالدار سانى 10 عا جەتتى.
ەستەرىڭىزگە سالا كەتەيىك، وسىعان دەيىن قازاقستان قۇراماسى 2 التىن، 3 كۇمىس، 4 قولاعا قول جەتكىزگەنىن جازعان بولاتىنبىز.
اۆتور كۇنسۇلتان وتارباي