ارال تۇزىنا ەرەكشە ستاتۋس بەرىلۋى مۇمكىن

استانا. KAZINFORM - ادىلەت مينيسترلىگىنىڭ رەسمي وكىلى تالعات ءۋالي ۆەدومستۆونىڭ باسپا ءسوز ءماسليحاتىندا وڭىرلەردە گەوگرافيالىق نۇسقاما رەتىندە تىركەۋگە بولاتىن ونىمدەر كوپ ەكەنىن ايتتى.

«گەوگرافيالىق نۇسقاما دەگەنىمىز بەلگىلى ءبىر گەوگرافيالىق ايماقتان شىققان جانە سول ورنالاسقان جەرىنە بايلانىستى بىرەگەي قاسيەتتەرگە نەمەسە ساپاعا يە، اۋىلشارۋاشىلىق، ازىق-تۇلىك، قولونەر مەن ونەركاسىپ ونىمدەرىن انىقتاۋ ءۇشىن پايدالانىلاتىن جانە تابيعاتى مەن مادەنيەتى، تاريحى مەن شىققان جەرىنە تىعىز بايلانىسى بار جاڭا زياتكەرلىك مەنشىك نىسانى. گەوگرافيالىق نۇسقامانى تىركەۋ قازاقستاننىڭ ءارتۇرلى ايماقتارىندا وندىرىلەتىن تاۋارلاردىڭ ۇلتتىق برەند رەتىندە دامۋىنا، سونداي-اق ولاردىڭ الەمدىك نارىقتا تانىلۋىن، ينۆەستيتسيالىق تارتىمدىلىعىن ارتتىرۋعا جانە تۋريستىك يندۋستريانى دامىتۋعا ىقپال ەتەدى»، - دەيدى ول.

تالعات ءۋالي بىلتىر قىركۇيەكتە الماتى اپورتىنا وسىنداي ستاتۋس بەرىلگەنىن ەسكە سالدى.

«سول سياقتى قازاقستاننىڭ ءاربىر وڭىرىندە گەوگرافيالىق نۇسقاما رەتىندە تىركەلۋ مۇمكىندىگى جوعارى ونىمدەر بار. مىسالى، قازاقستاندىق تارى، قىزىلوردالىق «ارال تۇزى» ، شىعىس قازاقستاننىڭ تابيعي بالى جانە باسقا دا ونىمدەر گەوگرافيالىق نۇسقاما تىركەلۋى مۇمكىن»، - دەدى رەسمي وكىل.

مينيسترلىك دەرەگىنە سۇيەنسەك، ءقازىر ەلدە 19 گەوگرافيالىق نۇسقاما رەسمي تىركەلگەن. تاعى 109 ءوتىنىش قارالىپ جاتىر.

قازىرگى ۋاقىتتا تىركەلگەن برەندتەر:

1. الماتى اپورتى

2. تالعار المۇرتى

3. نارىنقول كارتوبى

4. باقاناس كۇرىشى

5. «كوكشەتاۋ» بالمۇزداعى

6. «كوكشەتاۋ» مايى

7. بۋراباي بالى

8. قاراعاندى بالمۇزداعى

9. قاراعاندى برويلەرى

10. قوستاناي بالى

11. تۇيە سۇتىنەن جاسالعان «ارال» سابىنى

12. «ارال» جانتاق سابىنى

13. قىزىلوردا تۇزى

14. «قازالى» كامپيتى

15. «قازالى» سابىنى

16. سايرام نانى

17. TURKISTAN شوكولادى

18. TURKISTAN بالمۇزداعى

19. چاچا سۋسىنى